લાચાર પિતા!, હોસ્પિટલે ન આપી એમ્બ્યુલન્સ, દીકરીના મૃતદેહને થેલીમાં લપેટીને 90 કિ.મી.નો સફર કર્યો...

મહારાષ્ટ્રના પાલઘર જિલ્લામાંથી સ્વાસ્થ્ય તંત્રની ઘોર બેદરકારી અને ગરીબો પ્રત્યેની સંવેદનહીનતાનો એક હૃદયદ્રાવક કિસ્સો સામે આવ્યો છે. અહીં એક દહાડી મજૂર પિતાને પોતાની નવજાત, મૃત દીકરીના મૃતદેહને માત્ર 20 રૂપિયાની પ્લાસ્ટિક થેલીમાં મૂકીને 90 કિલોમીટર લાંબો પ્રવાસ કરવા મજબૂર થવું પડ્યું. આ ઘટનાએ સરકારી હોસ્પિટલોમાં ગરીબ દર્દીઓ સાથે થતા વ્યવહાર અને એમ્બ્યુલન્સ સેવાઓની ઉપલબ્ધતા પર ગંભીર સવાલો ઊભા કર્યા છે.

એમ્બ્યુલન્સ આપવાનો ઇનકાર અને પિતાની મજબૂરી...

સખરમ અને તેમની પત્ની દહાડી મજૂરી કરીને ગુજરાન ચલાવે છે. જ્યારે તેમની પત્નીને પ્રસુતિ પીડા ઉપડી, ત્યારે સમયસર સરકારી એમ્બ્યુલન્સ ન મળતાં તેમની દીકરીનો જન્મ મૃત્યુ સાથે થયો. આ દુર્ભાગ્યપૂર્ણ ઘટના બાદ, હોસ્પિટલ સત્તાવાળાઓએ મૃત નવજાત શિશુને ઘરે લઈ જવા માટે એમ્બ્યુલન્સ આપવાનો સીધો ઇનકાર કરી દીધો. નિરાધાર અને મજબૂર બનેલા પિતા સખરમે અંતે 20 રૂપિયાની એક પ્લાસ્ટિક થેલી ખરીદી, જેમાં તેમણે પોતાની મૃત દીકરીના નાના મૃતદેહને મૂકી, 90 કિલોમીટર દૂર આવેલા પોતાના ગામ જવા માટે નીકળ્યા.

સ્વાસ્થ્ય તંત્રની સંવેદનહીનતા પર પ્રશ્નાર્થ...

આ ઘટના માત્ર એમ્બ્યુલન્સની અછતનો કિસ્સો નથી, પરંતુ તે ભારતના સ્વાસ્થ્ય તંત્રની સંવેદનહીનતા અને ગરીબો પ્રત્યેના ઉપેક્ષિત વલણને છતી કરે છે. એક ગરીબ પરિવાર માટે આવા દુ:ખના સમયે પણ માનવીય સહાનુભૂતિનો અભાવ શા માટે? શું સરકારી હોસ્પિટલોમાં આવા કિસ્સાઓમાં ખાસ વ્યવસ્થા ન હોવી જોઈએ?

આ પણ વાંચો : હિમાચલ પ્રદેશના લાહૌલ-સ્પીતિમાં ટેમ્પો ટ્રાવેલર પલટી, 2 પ્રવાસીઓના મોત, 21 ઈજાગ્રસ્ત

હેલ્થ વિભાગનો પોકળ દાવો...

આ મામલે જ્યારે હેલ્થ વિભાગ પર સવાલો ઉઠ્યા, ત્યારે તેમણે દાવો કર્યો કે, "પિતાએ જ એમ્બ્યુલન્સ લેવા ઇનકાર કર્યો હતો." જોકે, આ દાવો સખરમની મજબૂરી અને પરિસ્થિતિ સાથે સુસંગત નથી લાગતો. એક ગરીબ પિતા જે પોતાની મૃત દીકરીને થેલીમાં લઈને જવા મજબૂર થાય, તે એમ્બ્યુલન્સનો ઇનકાર શા માટે કરે? આ સ્પષ્ટપણે દર્શાવે છે કે, તંત્ર પોતાની નિષ્ફળતા છુપાવવા માટે આવા ખોટા દાવા કરી રહ્યું છે.

આ પણ વાંચો : Ahmedabad Plane Crash: કેપ્ટન સુમિત સભરવાલના પિતા દીકરાના મૃતદેહને જોઈ ભાંગી પડ્યા

પાલઘરની આ ઘટના એ દર્પણ છે જે ભારતના ગ્રામીણ અને ગરીબ વિસ્તારોમાં સ્વાસ્થ્ય સેવાઓની વાસ્તવિકતા દર્શાવે છે. સરકાર અને સંબંધિત વિભાગોએ આ મામલે ગંભીરતાથી નોંધ લઈને જવાબદારો સામે કડક કાર્યવાહી કરવી જોઈએ, અને ભવિષ્યમાં આવા કિસ્સાઓ ન બને તે માટે સ્વાસ્થ્ય સુવિધાઓમાં સુધારા કરવા જોઈએ. ગરીબ હોવું એ ગુનો નથી, અને તેમને પણ સન્માન અને માનવીય વ્યવહાર મળવો જોઈએ.

આ પણ વાંચો : Pune : સેલ્ફીના ભાર તળે દબાયેલા પુલની ભીડની પ્રથમ તસવીર આવી સામે...