Pune : સેલ્ફીના ભાર તળે દબાયેલા પુલની ભીડની પ્રથમ તસવીર આવી સામે...

પુણે (Pune)ના ઈન્દ્રાયણી નદી પરનો એક 30 વર્ષ જૂનો પદયાત્રી પુલ ધરાશાયી થતાં ભયાવહ દુર્ઘટના સર્જાઈ છે. આ હૃદયદ્રાવક ઘટનામાં ઓછામાં ઓછા 4 લોકોના કરુણ મોત થયા છે અને 50 થી વધુ લોકો ગંભીર રીતે ઘાયલ થયા છે, જેમાંથી 7 લોકો ICU માં જીવન-મરણ વચ્ચે ઝોલા ખાઈ રહ્યા છે. આ દુર્ઘટના પાછળનું સૌથી મોટું કારણ છે - માનવીય બેદરકારી અને સેલ્ફીનો મોહ!

પ્રાથમિક અહેવાલો અનુસાર, ભારે વરસાદને કારણે ઇન્દ્રાયણી નદી ભયાવહ રીતે વહી રહી હતી. નદીનું આ રૌદ્ર સ્વરૂપ જોવા અને તેની સાથે સેલ્ફી તેમજ રીલ બનાવવાની ઘેલછામાં મોટી સંખ્યામાં લોકો આ જર્જરિત પુલ પર એકઠા થયા હતા. ચેતવણી બોર્ડની સ્પષ્ટ અવગણના કરીને, પ્રવાસીઓએ પુલ પર ભીડ ભેગી કરી, જેના કારણે પુલ તેના ક્ષમતા કરતા અનેકગણો ભાર સહન કરી શક્યો નહીં અને તૂટી પડ્યો.

અથર્વ હોસ્પિટલમાં 11 ઘાયલો સારવાર હેઠળ છે, જેમાંથી 7 ની હાલત નાજુક હોવાનું જણાવાયું છે. આ ઘટના ફરી એકવાર દર્શાવે છે કે, સાહસ અને ઉત્સાહની આડમાં સલામતીને કેવી રીતે અવગણવામાં આવે છે. સત્તાવાળાઓ દ્વારા મૂકવામાં આવેલા ચેતવણી બોર્ડ માત્ર શોભાના ગાંઠિયા ન હોવા જોઈએ, પરંતુ તેનું કડક પાલન થવું અનિવાર્ય છે.

આ પણ વાંચો : Bengaluru : રેપિડો ડ્રાઈવરનો મહિલા યાત્રી પર હુમલો, ભાષા અને ભાડાના વિવાદે ભયાવહ રૂપ લીધું, Video Viral

આ દુર્ઘટના માત્ર એક પુલ ધરાશાયી થવાની ઘટના નથી, પરંતુ વધતી જતી સેલ્ફી સંસ્કૃતિ અને નિયમો પ્રત્યેની બેદરકારીનું જીવતું જાગતું ઉદાહરણ છે. શું આ દુર્ઘટનામાંથી આપણે કોઈ બોધપાઠ શીખીશું, કે પછી આવી જ રીતે જીવ ગુમાવતા રહીશું? આ એક ગંભીર પ્રશ્ન છે, જેનો જવાબ સમાજે શોધવો જ પડશે.

આ પણ વાંચો : 2027 ની જનગણના માટે અધિસૂચના જાહેર, આઝાદી પછીની 8 મી અને જાતિ આધારિત ગણતરી પર ભાર!