ડી ગુકેશે કર્યો હિસાબ બરાબર, હિકારુને હરાવ્યો

વિશ્વ ચેસ ચેમ્પિયન ડી ગુકેશે સેન્ટ લૂઈસમાં ચાલી રહેલી 'ક્લચ ચેસ: ચેમ્પિયન્સ શોડાઉન' ટુર્નામેન્ટના પ્રથમ દિવસે અદભુત પ્રદર્શન કરીને પોઈન્ટ ટેબલમાં લીડ હાંસલ કરી છે. આ શોર્ટ રેપિડ ટુર્નામેન્ટમાં ચેસ જગતના ટોચના ખેલાડીઓ જેવા કે, મેગ્નસ કાર્લસન, હિકારુ નાકામુરા, ફેબિયાનો કારુઆના અને ભારતીય ચેમ્પિયન ડી ગુકેશ ભાગ લઈ રહ્યા છે. પહેલા રાઉન્ડમાં ગુકેશને કાર્લસન સામે 1.5-0.5થી હાર મળી હતી, પરંતુ ત્યારબાદ તેણે જોરદાર વાપસી કરી. 

બીજા રાઉન્ડના પોઈન્ટ

બીજા રાઉન્ડમાં નાકામુરાને 1.5-0.5થી અને ત્રીજા રાઉન્ડમાં કારુઆનાને 2-0થી પરાજિત કરીને ગુકેશે પોતાની તાકાત સાબિત કરી. પ્રથમ દિવસના અંતે ડી ગુકેશ 6 પોઈન્ટ સાથે ટોચ પર રહ્યો, ત્યારબાદ કાર્લસન 3.5, નાકામુરા 3 અને કારુઆના 1.5 પોઈન્ટ સાથે પાછળ રહ્યા.

હિકારુ એ જીત પછી ગુકેશને ઉઠાવીને પ્રેક્ષકો તરફ ફેંક્યો

આ જીત માત્ર ટુર્નામેન્ટમાં લીડ લેવા પૂરતી સીમિત ન હતી, પરંતુ ડી ગુકેશ માટે આ એક અંગત હિસાબ બરાબર કરવાની ક્ષણ પણ હતી. થોડા અઠવાડિયા પહેલા 'ચેકમેટ: USA Vs IND' નામની એક પ્રદર્શની મેચમાં હિકારુ નાકામુરાએ જીત પછી ગુકેશના કિંગ પીસને ઉઠાવીને પ્રેક્ષકો તરફ ફેંકી દીધો હતો, જેને ઘણા ચેસ પ્રેમીઓએ ખેલદિલી વિરુદ્ધનું કૃત્ય ગણાવ્યું હતું. તે સમયે ડી ગુકેશ શાંત રહ્યો અને કોઈ પ્રતિક્રિયા આપી ન હતી. જોકે, આ વખતે 'ક્લચ ચેસ: ચેમ્પિયન્સ શોડાઉન'માં તેણે કંઈ પણ કહ્યા વિના અને કોઈ હાવભાવ વિના, ફક્ત બોર્ડ પરની ચાલથી જ અપમાનનો જવાબ આપ્યો.

આ પણ વાંચો: ડી ગુકેશની ઐતિહાસિક જીત: નોર્વે ચેસમાં મેગ્નસ કાર્લસનને હરાવ્યો

ગુકેશે પોતાના સંયમને જાળવી રાખ્યો

સેન્ટ લૂઈસમાં મળેલી હાર બાદ નાકામુરા એ પોતાનો બચાવ કરતા સ્પષ્ટતા કરી હતી કે તે કોઈ અપમાન નહોતું. તેણે કહ્યું હતું કે, જો કેન્ડીડેટ્સ જેવી કોઈ ગંભીર ટુર્નામેન્ટમાં આવું થયું હોત તો કોઈ ખેલાડીએ આવું ન કર્યું હોત. તે સમયે નાકામુરા એ મજાકમાં કહ્યું હતું કે, જો ગુકેશ આગલી વખતે હારશે તો તે બોલિવૂડ ગીત ગાશે, પરંતુ ગુકેશે પોતાના સંયમને જાળવી રાખ્યો હતો. ડી ગુકેશ એ શાંતિ અને ગરિમા જાળવીને પોતાની જીતથી સાબિત કર્યું કે, શબ્દો કરતાં 'ચાલ' વધુ અસરકારક હોય છે.

ટુર્નામેન્ટમાં કુલ નવ રાઉન્ડ હશે

'ક્લચ ચેસ: ચેમ્પિયન્સ શોડાઉન'નું આયોજન 25થી 30 ઓક્ટોબર દરમિયાન મિસૌરીમાં સેન્ટ લૂઈસ ચેસ ક્લબ ખાતે થઈ રહ્યું છે. આ ટુર્નામેન્ટમાં કુલ નવ રાઉન્ડ હશે, જે ડબલ રાઉન્ડ-રોબિનના ફોર્મેટમાં રમાશે. આ ટુર્નામેન્ટની ખાસિયત એ છે કે, દરેક રાઉન્ડ સાથે પોઈન્ટ અને ઈનામની રકમ વધતી જાય છે, અને બીજા દિવસની મેચોમાં તો ડબલ પોઈન્ટ્સ આપવામાં આવશે.