<div><strong>IND vs SL</strong>: ICC વર્લ્ડ ટેસ્ટ ચેમ્પિયનશિપ 2025-27ના નવા ચક્રમાં ભારત અને શ્રીલંકા વચ્ચેની ટેસ્ટ શ્રેણી માટે ક્રિકેટ ચાહકોનો ઉત્સાહ ચરમસીમાએ છે. ભારત સામે 15 ઓગસ્ટથી ગાલે ઇન્ટરનેશનલ ક્રિકેટ સ્ટેડિયમમાં શરૂ થનારી પ્રથમ ટેસ્ટ મેચ માટે શ્રીલંકા ક્રિકેટ બોર્ડે પોતાની 16 સભ્યોની ટીમની જાહેરાત કરી છે. શ્રીલંકાની ટીમની કમાન ધનંજય ડી સિલ્વાને સોંપવામાં આવી છે, જ્યારે કમિન્ડુ મેન્ડિસને વાઇસ-કેપ્ટન બનાવવામાં આવ્યા છે. ટીમમાં અનુભવ અને યુવા પ્રતિભાનું સંતુલન જોવા મળી રહ્યું છે. જોકે, સૌથી મોટો ચર્ચાનો વિષય લાંબા સમય બાદ નિરોશન ડિકવેલાની ટેસ્ટ ટીમમાં વાપસી છે.</div>
<div>&nbsp;</div>
<div><strong>નિરોશન ડિકવેલાની લાંબા સમય બાદ વાપસી</strong></div>
<div>કુસલ મેન્ડિસ ઈજાગ્રસ્ત થતાં શ્રીલંકાએ અનુભવી વિકેટકીપર-બેટ્સમેન નિરોશન ડિકવેલા પર ફરી વિશ્વાસ મૂક્યો છે. 33 વર્ષીય ડિકવેલાએ છેલ્લે 2023માં ન્યૂઝીલેન્ડ સામે ટેસ્ટ મેચ રમી હતી. ડિકવેલાએ અત્યાર સુધી 54 ટેસ્ટ મેચમાં 2,757 રન બનાવ્યા છે અને તેના નામે 22 અડધી સદી છે. ભારત જેવી મજબૂત ટીમ સામે ગાલેમાં તેનો અનુભવ શ્રીલંકા માટે મહત્વપૂર્ણ બની શકે છે.</div>
<div>&nbsp;</div>
<div><strong>કુસલ મેન્ડિસ અને પથુમ નિસાન્કા બહાર</strong></div>
<div>શ્રીલંકાને પ્રથમ ટેસ્ટ પહેલાં બે મોટા ઝટકા લાગ્યા છે. વિકેટકીપર-બેટ્સમેન કુસલ મેન્ડિસ હેમસ્ટ્રિંગની ઈજાને કારણે પ્રથમ ટેસ્ટમાંથી બહાર છે. બીજી તરફ ઓપનર પથુમ નિસાન્કા કાંડાની સર્જરી બાદ સંપૂર્ણ ફિટ ન હોવાથી ટેસ્ટ શ્રેણીમાંથી બહાર થયો છે. બંને ખેલાડીઓની ગેરહાજરીથી શ્રીલંકાના બેટિંગ ઓર્ડર પર અસર પડી શકે છે. તેમની જગ્યાએ ટીમ મેનેજમેન્ટે અનુભવી ડિકવેલા અને યુવા ખેલાડીઓ પર ભરોસો મૂક્યો છે.</div>
<div>&nbsp;</div>
<div><strong>બે નવા ચહેરાઓને તક</strong></div>
<div>શ્રીલંકાની 16 સભ્યોની ટીમમાં યુવા ખેલાડીઓને પણ તક આપવામાં આવી છે. અનકેપ્ડ ઓફ-સ્પિનર કેસરા નુવંથાને પ્રથમ વખત રાષ્ટ્રીય ટેસ્ટ ટીમમાં સ્થાન મળ્યું છે. આ ઉપરાંત સ્થાનિક ક્રિકેટમાં સતત સારું પ્રદર્શન કરનાર પાસિન્દુ સુરિયાબંદારાને પણ ટીમમાં સામેલ કરવામાં આવ્યો છે. ગાલે ટેસ્ટમાં તેને ટેસ્ટ ડેબ્યૂ કરવાની તક મળી શકે છે.</div>
<div>&nbsp;</div>
<div><strong>શ્રીલંકાની ઓપનિંગ જોડી પર નજર</strong></div>
<div>પથુમ નિસાન્કાની ગેરહાજરીમાં નિશાન મદુશંકા અને લાહિરુ ઉદારા શ્રીલંકા માટે ઓપનિંગ કરી શકે છે. મદુશંકાએ ભારત સામેની પ્રેક્ટિસ મેચમાં અડધી સદી ફટકારીને પોતાની તૈયારીનો સંકેત આપી દીધો છે. મધ્યમ ક્રમમાં દિનેશ ચંદીમલ, કમિન્ડુ મેન્ડિસ અને કેપ્ટન ધનંજય ડી સિલ્વા જેવા અનુભવી ખેલાડીઓ ટીમને મજબૂતી આપશે.</div>
<div>&nbsp;</div>
<div><strong>ગાલેમાં સ્પિનર્સ બનશે મોટું હથિયાર</strong></div>
<div>ગાલેની પિચ પર સ્પિન બોલિંગ હંમેશાં મહત્વપૂર્ણ રહી છે. શ્રીલંકાની ટીમમાં પ્રભાત જયસૂર્યા અને રમેશ મેન્ડિસ જેવા સ્પિનરો છે. કેસરા નુવંથાને પણ અંતિમ પ્લેઇંગ-11માં સ્થાન મળે તો શ્રીલંકાનું સ્પિન આક્રમ વધુ મજબૂત બની શકે છે. ઝડપી બોલિંગમાં અસિતા ફર્નાન્ડો, લાહિરુ કુમારા, વિશ્વા ફર્નાન્ડો અને દિલશાન મદુશંકા વિકલ્પ તરીકે હાજર છે.</div>
<div>&nbsp;</div>
<div><strong>ગાલેમાં ભારત સામે શ્રીલંકાનો રેકોર્ડ</strong></div>
<div>ભારત અને શ્રીલંકા વચ્ચે ગાલે ઇન્ટરનેશનલ ક્રિકેટ સ્ટેડિયમમાં અત્યાર સુધીમાં પાંચ ટેસ્ટ મેચ રમાઈ છે. શ્રીલંકાએ ત્રણ જ્યારે ભારતે બે મેચમાં જીત મેળવી છે. જોકે, બંને ટીમો વચ્ચે ગાલેમાં છેલ્લી ટેસ્ટ મેચ 2017માં રમાઈ હતી, જેમાં ભારતે 304 રનથી શાનદાર જીત મેળવી હતી. હવે લગભગ લાંબા અંતર બાદ બંને ટીમો ફરી ગાલેના મેદાન પર ટેસ્ટ ક્રિકેટમાં આમને-સામને થશે. ભારત સામેની પ્રથમ ટેસ્ટમાં શ્રીલંકા ઘરઆંગણે સ્પિન અને અનુભવના આધારે ભારતીય ટીમને પડકાર આપવાનો પ્રયાસ કરશે. બીજી તરફ, ડિકવેલાની વાપસી અને યુવા ખેલાડીઓને મળેલી તકને કારણે ગાલે ટેસ્ટ વધુ રસપ્રદ બનવાની શક્યતા છે.</div>
<div>&nbsp;</div>
<div><strong>ભારત-શ્રીલંકા ટેસ્ટ શ્રેણીનું શેડ્યૂલ</strong></div>
<div>પ્રથમ ટેસ્ટ: 15 થી 19 ઓગસ્ટ, ગાલે</div>
<div>બીજી ટેસ્ટ: 23 થી 27 ઓગસ્ટ, કોલંબો</div>
<div>મેચનો સમય: સવારે 10:00 વાગ્યે (ભારતીય સમય)</div>
<div>ભારતીય ટીમ પણ ગાલે પહોંચી ગઈ છે અને બંને ટીમો ટેસ્ટ શ્રેણી માટે અંતિમ તૈયારીઓમાં વ્યસ્ત છે.</div>
<div>&nbsp;</div>
<div><strong>શ્રીલંકાની 16 સભ્યોની ટીમ</strong></div>
<div>ધનંજય ડી સિલ્વા (કેપ્ટન), કમિન્ડુ મેન્ડિસ (વાઇસ-કેપ્ટન), લાહિરુ ઉદારા, નિશાન મદુશંકા, દિનેશ ચંદીમલ, પાસિન્દુ સુરિયાબંદારા, સોનલ દિનુષા, નિરોશન ડિકવેલા (વિકેટકીપર), રમેશ મેન્ડિસ, પ્રભાત જયસૂર્યા, કેસરા નુવંથા, મિલાન રત્નાયકે, અસિતા ફર્નાન્ડો, લાહિરુ કુમારા, વિશ્વા ફર્નાન્ડો અને દિલશાન મદુશંકા.</div>

ડિકવેલાની વાપસીથી વધ્યો રોમાંચ

August 12, 2026 | 16:07 IST