માત્ર 17 વર્ષની ઉંમરે માયાએ શું કરી બતાવ્યું? તૂટ્યો સાનિયા મિર્ઝાનો 22 વર્ષ જૂનો રેકોર્ડ!

Maya Rajeshwaran Revati Breaks Sania Mirza Record: ભારતીય મહિલા ટેનિસમાં 17 વર્ષની માયા રાજેશ્વરન રેવતીએ પોતાની શાનદાર રમતથી નવી ઓળખ બનાવી છે. માયાએ ITF W35 લાગોસ ટુર્નામેન્ટમાં સિંગલ્સનો ખિતાબ જીતીને ટેનિસ દિગ્ગજ સાનિયા મિર્ઝાનો 22 વર્ષ જૂનો રેકોર્ડ તોડ્યો છે. તેની આ ઐતિહાસિક જીતથી ભારતીય ટેનિસમાં નવી આશા જાગી છે.

ફાઇનલમાં સીધા સેટોમાં જીત મેળવી
કોઈમ્બતુરમાં જન્મેલી માયા રાજેશ્વરન રેવતીએ ટુર્નામેન્ટની ફાઇનલમાં સ્પેનની સિલિયા સર્વિનો રુઇઝને 6-4, 6-2થી હરાવી હતી. આ જીત સાથે માયાએ પોતાની કારકિર્દીનો પ્રથમ પ્રોફેશનલ સિંગલ્સ ખિતાબ પોતાના નામે કર્યો. ખિતાબ જીતતી વખતે માયાની ઉંમર માત્ર 17 વર્ષ અને 3 મહિના હતી. આ સિદ્ધિ સાથે તે W35 સ્તરે સિંગલ્સ ટાઇટલ જીતનારી સૌથી નાની ઉંમરની ભારતીય મહિલા ખેલાડી બની. માયાએ દબાણભરી ફાઇનલમાં શાનદાર રમતનું પ્રદર્શન કરીને પોતાની પ્રતિભા સાબિત કરી.

સાનિયા મિર્ઝાનો રેકોર્ડ તૂટ્યો
ભારતીય ટેનિસની જાણીતી ખેલાડી સાનિયા મિર્ઝાએ વર્ષ 2004માં 17 વર્ષ અને 10 મહિનાની ઉંમરે લાગોસમાં આ સિદ્ધિ મેળવી હતી. હવે માયાએ તેનાથી ઓછી ઉંમરે ખિતાબ જીતીને નવો રેકોર્ડ સ્થાપિત કર્યો છે. માયાની આ સફળતા ભારતીય મહિલા ટેનિસ માટે મહત્ત્વપૂર્ણ છે. નાની ઉંમરે આંતરરાષ્ટ્રીય સ્તરે ખિતાબ જીતવો તેની મહેનત અને રમત પ્રત્યેના સમર્પણને દર્શાવે છે.

ડબલ્સમાં પણ માયાની શાનદાર સફળતા
માયાએ આ ટુર્નામેન્ટમાં સિંગલ્સની સાથે ડબલ્સમાં પણ પોતાની રમતનો જાદુ બતાવ્યો હતો. યુક્રેનની યેલિઝાવેટા કોટલ્યાર સાથે જોડી બનાવીને તેણે ડબલ્સનો ખિતાબ પણ જીત્યો હતો. આમ, માયાએ ટુર્નામેન્ટમાં બેવડી સફળતા મેળવી અને પોતાની ક્ષમતા સાબિત કરી.

કોણ છે માયા રાજેશ્વરન રેવતી?
માયાને માત્ર 8 વર્ષની ઉંમરે તેના પિતા રાજેશ્વરન દ્વારા ટેનિસ રમવાની પ્રેરણા મળી હતી. શરૂઆતની તાલીમ અને પ્રો સર્વ ટેનિસ એકેડેમીમાં અભ્યાસ બાદ તેણે જુનિયર સ્તરે અનેક ITF ટાઇટલ જીત્યાં. પોતાની રમતને વધુ નિખારવા માટે માયાએ સ્પેનના મેલોર્કામાં આવેલી રાફેલ નડાલ એકેડેમીમાં તાલીમ લીધી હતી. ત્યારબાદ તેણે ફ્રાન્સના કાન્સ સ્થિત એલિટ ટેનિસ સેન્ટરમાં પણ પોતાની રમત પર મહેનત કરી.

સાનિયા મિર્ઝાને માને છે પોતાની આદર્શ
સાનિયા મિર્ઝાનો રેકોર્ડ તોડ્યા બાદ માયાએ તેમની પ્રશંસા કરતાં કહ્યું કે સાનિયા એક દંતકથા છે અને હંમેશા રહેશે. માયાના જણાવ્યા અનુસાર, સાનિયા બાળપણથી જ તેની આદર્શ રહી છે અને તેમના કારણે ભારતમાં ટેનિસને વિશેષ ઓળખ મળી છે. 17 વર્ષની ઉંમરે મળેલી આ સફળતા માયાની કારકિર્દી માટે મહત્ત્વપૂર્ણ પગલું છે. હવે ટેનિસ ચાહકોની નજર તેની આગામી ટુર્નામેન્ટ્સ અને આંતરરાષ્ટ્રીય પ્રદર્શન પર રહેશે.