કેનેડામાં એર ઇન્ડિયાનો પાયલોટ નશામાં ઝડપાયો

કેનેડામાં ફ્લાઈટ ઉપડે તે પહેલાં એર ઈન્ડિયાનો પાયલોટ નશામાં હોવાનું જાણવા મળ્યું. વાનકુંવરથી દિલ્હી આવી રહેલી ફ્લઈટનો પાયલોટ નશાની હાલતમાં પકડાયો છે. તેના કારણે ફ્લાઈટ પણ મોડી ઉપડતાં પેસેન્જરો પરેશાન થયા હતા. કેનેડાએ એર ઈન્ડિયાને જાણ કરીને  26 જાન્યુઆરી સુધીમાં પાયલોટ સામે કાર્યવાહી કરવા નિર્દેશ આપ્યો છે.

એર ઇન્ડિયાએ એક નિવેદનમાં જણાવ્યું કે, 23 ડિસેમ્બર, 2025 ના રોજ વાનકુંવરથી દિલ્હી જતી ફ્લાઇટ AI 186, કોકપીટ ક્રૂ મેમ્બરને ટેકઓફ પહેલાં દૂર કરવામાં આવતા છેલ્લી ઘડીએ મોડી પડી હતી. કેનેડાએ એર ઇન્ડિયાને જાણ કરી છે કે 23 ડિસેમ્બર, 2025 ના રોજ આંતરરાષ્ટ્રીય ફ્લાઇટ ચલાવતાં પહેલા તેના એક પાયલોટ નશામાં હોવાનું જાણવા મળ્યું હતું. આ કેનેડિયન કાયદાઓનું સ્પષ્ટ ઉલ્લંઘન છે. કેનેડાના ટ્રાન્સપોર્ટ રેગ્યુલેટર ટ્રાન્સપોર્ટ કેનેડાએ આ બાબતની તપાસ કરવા, યોગ્ય પગલાં લેવા અને 26 જાન્યુઆરી, 2026 સુધીમાં કરેલી કાર્યવાહી અંગે રિપોર્ટ કરવા જણાવ્યું છે.

પાયલોટ બ્રેથલાઈઝર (BA) ટેસ્ટમાં નિષ્ફળ ગયાના એક દિવસ પછી સૂચના મોકલવામાં આવી હતી. ટ્રાન્સપોર્ટ કેનેડાએ ભવિષ્યમાં આવી ઘટનાઓ અટકાવવા માટે એર ઇન્ડિયાને તેની સેફ્ટી મેનેજમેન્ટ સિસ્ટમ (SMS) હેઠળ સુધારાત્મક પગલાં લેવાનો નિર્દેશ આપ્યો છે.

RCMP પુષ્ટિ અને સંભવિત કાર્યવાહી

ટ્રાન્સપોર્ટ કેનેડા દ્વારા 24 ડિસેમ્બરે એર ઈન્ડિયાને મોકલવામાં આવેલા પત્રમાં જણાવાયું કે, રોયલ કેનેડિયન માઉન્ટેડ પોલીસ (RCMP) એ એરલાઈનને જાણ કરી હતી કે, 23 ડિસેમ્બરે ફ્લાઇટ AI 186 ના કેપ્ટન નશામાં હતા અને ફ્લાઇટ ચલાવવા માટે અયોગ્ય જણાયા હતા. વાનકુંવર ઈન્ટરનેશનલ એરપોર્ટ પર RCMP દ્વારા કરવામાં આવેલા બે બ્રેથલાઈઝર પરીક્ષણોમાં આ વાતની પુષ્ટિ થઈ હતી, ત્યારબાદ પાયલોટને વિમાનમાંથી દૂર કરવામાં આવ્યો હતો અને ફરજ પરથી દૂર કરવામાં આવ્યો હતો.

આ ઘટના કેનેડિયન એવિએશન રેગ્યુલેશન્સ તેમજ એર ઈન્ડિયાના ફોરેન એર ઓપરેટર સર્ટિફિકેટ (FAOC 1946) ની શરતોનું ઉલ્લંઘન કરે છે. FAOC ની શરત મુજબ વિદેશી એર ઓપરેટર સુરક્ષિત કામગીરી સુનિશ્ચિત કરે. ટ્રાન્સપોર્ટ કેનેડાએ સંકેત આપ્યો છે કે RCMP અને તેનો પોતાનો વિભાગ આ મામલે કાનૂની કાર્યવાહી કરી શકે છે.

DGCA એ વિગતો માગી

મામલાની ગંભીરતાને ધ્યાનમાં રાખીને એર ઈન્ડિયાએ કેનેડિયન અધિકારીઓ પાસેથી બ્રેથલાઈઝર પરીક્ષણની સંપૂર્ણ વિગતો, જેમાં દારૂની માત્રા પણ શામેલ છે, માંગી છે. એરલાઈને ભારતના એવિએશન રેગ્યુલેટર, DGCA ને પણ આ ઘટના વિશે જાણ કરી છે.

ઓપરેશન સિંદૂરને કારણે પાકિસ્તાની હવાઈ ક્ષેત્ર બંધ થયા પછી એર ઈન્ડિયાની ઉત્તર અમેરિકાથી ભારત જતી લાંબા અંતરની ફ્લાઇટ્સને રિફ્યુઅલિંગ રોકવાની ફરજ પડી છે. AI 186 બે પાઇલટ્સ (દરેકમાં એક કેપ્ટન અને એક સહ-પાઇલટ) દ્વારા વાનકુંવરથી વિયેના સુધી ચલાવવાનું હતું. ત્રીજો સેટ વિયેનાથી દિલ્હી સુધી ફ્લાઇટનું સંચાલન કરશે.

નશામાં રહેલા પાયલટનો વિયેનામાં લેઓવર હતો અને તે વાનકુંવર ડ્યુટી-ફ્રીથી દારૂ ખરીદી રહ્યો હોવાના અહેવાલ છે. તે કેનેડાથી બોર્ડિંગ કરી રહ્યો હતો અને ઑસ્ટ્રિયામાં ઉતરવાનો હતો. તેથી બંને વિદેશી સ્ટેશનો પર સામાન્ય રીતે બ્રેથલાઈઝર પરીક્ષણો લેવામાં આવતા નથી. જોકે, ડ્યુટી-ફ્રી સ્ટાફે તેના શ્વાસમાં દારૂની ગંધ આવી અને પોલીસને જાણ કરી. પોલીસે CCTV ફૂટેજનો ઉપયોગ કરીને તેને એર ઈન્ડિયાની ફ્લાઇટમાં શોધી કાઢ્યો.

'12 કલાક પહેલા દારૂ પર પ્રતિબંધ'

ફ્લાઇટ ઉપડે તેના ઓછામાં ઓછા 12 કલાક પહેલા દારૂ પીવો સખત પ્રતિબંધિત છે. કોઈ પાયલટ આ નિયમનું પાલન કરી શકતો નથી. તો તેમણે તબીબી કારણોસર ફ્લાઇટ ચલાવવાનો ઇનકાર કરવો જોઈએ. આમ કરવાથી તેમની નોકરી, લાઇસન્સ અને કારકિર્દીનું રક્ષણ થઈ શકે છે.

એર ઇન્ડિયાએ એક નિવેદનમાં જણાવ્યું હતું કે, "૨૩ ડિસેમ્બર, ૨૦૨૫ ના રોજ, વાનકુંવરથી દિલ્હી જતી ફ્લાઇટ AI 186 માં છેલ્લી ઘડીએ વિલંબ થયો. કારણકે ટેકઓફ પહેલાં કોકપીટ ક્રૂ મેમ્બરને દૂર કરવામાં આવ્યો હતો. કેનેડિયન અધિકારીઓએ પાયલટની ફરજ માટે ફિટનેસ અંગે ચિંતા વ્યક્ત કરી હતી, જેના પગલે તેને વધુ પૂછપરછ માટે લઈ જવામાં આવ્યો હતો."