Delhi Blast: કાર માલિકની કરી અટકાયત

દિલ્હીમાં થયેલા ભયાનક કાર વિસ્ફોટોમાં મૃત્યુઆંક વધીને 9 થયો, જેમાં 2 મહિલાઓ સહિત 9 લોકોના મોત થયા છે અને 24 ઈજાગ્રસ્ત છે. આ ઘટના સોમવારે સાંજે 6:52 વાગ્યે લાલ કિલ્લા મેટ્રો સ્ટેશનના ગેટ નંબર 1 પાસે એક ચાલતી સફેદ i20 કારમાં થઈ હતી. વિસ્ફોટ થયેલી કારના CCTV ફૂટેજ મંગળવારે સામે આવ્યા છે, જેમાં મેટ્રો સ્ટેશન પાર્કિંગમાંથી બહાર નીકળતી વખતે કાળું માસ્ક પહેરેલો એક વ્યક્તિ કારમાં બેઠેલો જોવા મળ્યો હતો. 

7 મૃતકોના DNA ટેસ્ટ કરાયા

પોલીસ સૂત્રો દ્વારા આ વ્યક્તિની ઓળખ પુલવામાના રહેવાસી ડૉ. મોહમ્મદ ઉમર નબી તરીકે કરવામાં આવી છે. પોલીસના જણાવ્યા મુજબ, ડૉ. ઉમરે વિસ્ફોટકો સાથે પોતાને ઉડાવી દીધો હતો, જે આત્મઘાતી હુમલાના એંગલ તરફ ઈશારો કરે છે. કાશ્મીર પોલીસે તેની ઓળખની પુષ્ટિ કરવા અને DNA ટેસ્ટિંગ માટે પુલવામામાંથી તેની માતા અને 2 ભાઈઓની અટકાયત કરી છે. 2 મૃતદેહોની ઓળખ થઈ ગઈ છે, જ્યારે બાકીના 7 મૃતકોના DNA ટેસ્ટ કરવામાં આવશે.

આ પણ વાંચો: લાલકિલ્લા બ્લાસ્ટનો કાશ્મીરી ડૉક્ટર સાથે સંબંધ

પોલીસે ગેરકાયદે પ્રવૃત્તિઓ હેઠળ FIR નોંધી

મળતી માહિતી મુજબ, આતંકવાદી ડૉ. ઉમર લગભગ અઢીથી ત્રણ કલાક સુધી લાલ કિલ્લા પાર્કિંગમાં પાર્ક કરેલી i20 કારમાં બેઠો રહ્યો હતો અને એક ક્ષણ માટે પણ તે કારમાંથી બહાર નીકળ્યો ન હતો. પોલીસ માની રહી છે કે, ફરીદાબાદ મોડ્યુલનો ભાગ રહેલો ડૉ. ઉમર પાર્કિંગમાં કોઈની રાહ જોઈ રહ્યો હતો અથવા કોઈ સૂચનાઓની રાહ જોઈ રહ્યો હતો. આ વિસ્ફોટના સંદર્ભમાં દિલ્હી પોલીસે ગેરકાયદેસર પ્રવૃત્તિઓ અધિનિયમ હેઠળ FIR નોંધી છે. જોકે, ઘટનાસ્થળે RDXના કોઈ પુરાવા મળ્યા નથી.

2 મેટ્રો સ્ટેશનના દરવાજા બંધ 

દરમિયાન, સુરક્ષા એજન્સીઓએ સાવચેતીના ભાગરૂપે 2 મેટ્રો સ્ટેશનના દરવાજા બંધ કરી દીધા છે અને લાલ કિલ્લાને 13 નવેમ્બર સુધી જાહેર જનતા માટે બંધ રાખવામાં આવ્યો છે. કારના માલિક સલમાન નામના વ્યક્તિની પણ પોલીસે અટકાયત કરી છે, જેણે જણાવ્યું કે, તેણે આ કાર ઓખલા વિસ્તારના રહેવાસી નદીમને વેચી હતી, જેની હવે તપાસ કરવામાં આવી રહી છે.