સુરતમાં પત્ની અને સગા નાના ભાઈએ જ ઘડ્યું હત્યાનું કાવતરું! દિયર-ભાભીના કથિત સંબંધનો ચોંકાવનારો ખુલાસો

Surat Laskana Murder Mystery Solved: સુરતના લસકાણા વિસ્તારમાં સંબંધોને શર્મસાર કરી નાખતી હત્યાની ચોંકાવનારી ઘટના સામે આવી છે. અહીં 30 વર્ષીય યુવકની ગળું દબાવી હત્યા કરવામાં આવી હતી. શરૂઆતમાં આ મામલો પોલીસ માટે કોયડો બન્યો હતો, પરંતુ લસકાણા પોલીસે ગણતરીના કલાકોમાં હત્યાનો ભેદ ઉકેલી નાખ્યો હતો. પોલીસ તપાસમાં જે ખુલાસો થયો તે જાણીને પોલીસ પણ ચોંકી ઊઠી હતી. યુવકની હત્યા કોઈ અજાણ્યા શખ્સે નહીં, પરંતુ તેની જ પત્ની અને સગા નાના ભાઈએ મળીને કરી હોવાનો આરોપ છે. દિયર-ભાભીના કથિત પ્રેમસંબંધમાં પતિ અડચણરૂપ બનતો હોવાથી બંનેએ હત્યાનું કાવતરું ઘડ્યું હોવાનો પોલીસનો દાવો છે.

સુરતના લસકાણામાં યુવકની લાશ મળી આવતાં ચકચાર
મળતી માહિતી મુજબ, મૂળ ઉત્તર પ્રદેશના હમીરપુર જિલ્લાના ચંદુપુર ગામનો રહેવાસી 30 વર્ષીય અમરબાબુ મુલચન્દ્ર નિષાદ સુરતના લસકાણા ગામના કોઠી ફળિયામાં રહેતો હતો. 10 નવેમ્બરના રોજ લસકાણા DGVCL BRTS બસ સ્ટેન્ડ સામે સર્વિસ રોડ પરથી તેનો મૃતદેહ મળી આવ્યો હતો. યુવકનું ગળું દબાવી હત્યા કરવામાં આવી હોવાની આશંકા વચ્ચે લસકાણા પોલીસે હત્યાનો ગુનો નોંધી તપાસ શરૂ કરી હતી.

દિયર-ભાભીના કથિત પ્રેમસંબંધમાં પતિ બનતો હતો અડચણ
પોલીસ તપાસમાં મૃતક અમરબાબુની પત્ની રીનાદેવી (29) અને તેના સગા નાના ભાઈ શિવા ઉર્ફે શિવબાબુ (27) વચ્ચે છેલ્લા એક વર્ષથી પ્રેમસંબંધ હોવાની વિગતો સામે આવી હતી. પોલીસના જણાવ્યા અનુસાર, અમરબાબુ દારૂ પીવાની લત ધરાવતો હતો અને અવારનવાર પત્ની સાથે ઝઘડો તથા મારઝૂડ કરતો હતો. પોલીસનો દાવો છે કે પતિના કથિત ત્રાસથી કંટાળીને અને પોતાના સંબંધમાં અમરબાબુ અડચણરૂપ બનતો હોવાથી રીનાદેવી અને શિવબાબુએ તેની હત્યાનું કાવતરું ઘડ્યું હતું. બંને છેલ્લા દોઢ મહિનાથી હત્યાનું આયોજન કરી રહ્યા હોવાની વિગતો પણ તપાસમાં સામે આવી છે.

રિક્ષામાં બેસાડી અવાવરું જગ્યાએ લઈ ગયો, પછી દોરીથી ગળું દબાવ્યું
પોલીસ તપાસમાં સામે આવેલી વિગતો મુજબ, ઘટનાની રાત્રે અમરબાબુ દારૂના નશામાં ઘરેથી બહાર નીકળી ગયો હતો. ત્યારબાદ શિવબાબુ તેને શોધવા નીકળ્યો હતો. અમરબાબુ નશાની હાલતમાં મળી આવતાં શિવબાબુએ તેને રિક્ષામાં બેસાડ્યો હતો. રિક્ષાચાલકને રૂ. 200 ભાડું આપીને તે અમરબાબુને અલગ-અલગ જગ્યાએ ફેરવતો રહ્યો હતો. ત્યારબાદ તેને વિપુલનગર નજીક એક બસની આડમાં સુવડાવી દીધો હતો, જેથી આસપાસના લોકોની નજર ન પડે. પોલીસના જણાવ્યા અનુસાર, શિવબાબુએ ત્યાંથી સામાનના ડિસ્પ્લેમાં લટકાવેલી દોરી મેળવી તેનો ફાંસો બનાવ્યો હતો. અમરબાબુ નશાની હાલતમાં ઊંધો પડ્યો હતો ત્યારે તેના ગળામાં દોરીનો ફાંસો નાખીને ગળું દબાવી દીધું હતું. હત્યા કર્યા બાદ મૃતદેહને લસકાણા જલારામ મંદિરથી વિપુલનગર તરફ જતા સર્વિસ રોડ પર ફેંકી તે ઘરે પરત ફર્યો હતો.

CCTV ફૂટેજ અને ટેકનિકલ તપાસથી પોલીસને મળી કડી
હત્યાનો ભેદ ઉકેલવા લસકાણા પોલીસની ટીમોએ ઘટનાસ્થળ અને વિપુલનગર ચાર રસ્તા આસપાસના CCTV કેમેરાના ફૂટેજ તપાસ્યા હતા. આ ઉપરાંત ટેકનિકલ સર્વેલન્સ અને બાતમીદારોની મદદથી પણ તપાસ આગળ વધારવામાં આવી હતી. તપાસ દરમિયાન પરિવારના સભ્યોની હિલચાલ શંકાસ્પદ જણાતાં પોલીસે મૃતકની પત્ની રીનાદેવી અને નાના ભાઈ શિવબાબુની પૂછપરછ કરી હતી. પોલીસના જણાવ્યા મુજબ, પૂછપરછ દરમિયાન બંનેની સંડોવણી સામે આવી હતી. ત્યારબાદ પોલીસે બંનેની ધરપકડ કરી કાયદેસરની કાર્યવાહી હાથ ધરી છે.

સુરત હત્યા કેસમાં દિયર-ભાભીની ધરપકડ
સુરતના લસકાણા વિસ્તારમાં બનેલી આ ઘટનાએ પારિવારિક સંબંધો અને વિશ્વાસને લઈને અનેક સવાલો ઊભા કર્યા છે. પોલીસના પ્રાથમિક તપાસના દાવા પ્રમાણે, કથિત પ્રેમસંબંધ અને ઘરેલુ વિવાદને કારણે હત્યાનું કાવતરું ઘડવામાં આવ્યું હતું. જોકે, સમગ્ર કેસમાં આરોપીઓ સામેના આક્ષેપો અને ઘટનાક્રમ અંગેની અંતિમ વિગતો હવે કાનૂની કાર્યવાહી તથા વધુ તપાસમાં સ્પષ્ટ થશે.