Luxury Bus Tanker Collision Derol Bharuch: ગુજરાતમાં આજે 20 નવેમ્બરની વહેલી સવારે બે અલગ-અલગ માર્ગ અકસ્માતની ઘટનાઓએ હાહાકાર મચાવ્યો છે. ભરૂચના દેરોલ નજીક દિલ્હી-મુંબઈ એક્સપ્રેસ હાઈવે પર લક્ઝરી બસ અને ટેન્કર વચ્ચે ભયાનક ટક્કર થતાં બસના ડ્રાઈવર અને ક્લીનરનાં મોત નીપજ્યાં છે, જ્યારે 49 મુસાફરો ઘાયલ થયા છે. બીજી તરફ, અમરેલી-સાવરકુંડલા સ્ટેટ હાઈવે પર એસટી બસ અને બાઈક વચ્ચે ગમખ્વાર અકસ્માતમાં એક જ પરિવારના ત્રણ સભ્યો સહિત ચાર લોકોનાં મોત થયાં છે. બંને ઘટનાઓને પગલે હાઈવે પર અફરાતફરીનો માહોલ સર્જાયો હતો.
ભરૂચના દેરોલ નજીક લક્ઝરી બસ-ટેન્કર વચ્ચે અકસ્માત, 2નાં મોત
ભરૂચ જિલ્લાના દેરોલ નજીક દિલ્હી-મુંબઈ એક્સપ્રેસ હાઈવે પર આજે વહેલી સવારે આશરે 5:30 વાગ્યે ધડાકાભેર અકસ્માત સર્જાયો હતો. ધોરાજીથી સુરત જાન લઈને જઈ રહેલી લક્ઝરી બસ અને ટેન્કર વચ્ચે જોરદાર ટક્કર થઈ હતી. અકસ્માત એટલો ગંભીર હતો કે લક્ઝરી બસના ચાલક નવીન દાના ભારાઈ અને ક્લીનર રમેશ ગોવિંદ સોલંકીને ગંભીર ઈજાઓ પહોંચી હતી. બંનેને બચાવી શકાયા નહોતા અને તેમનાં મોત નીપજ્યાં હતાં. અકસ્માતની જાણ થતાં જ ઘટનાસ્થળે લોકોનાં ટોળાં એકત્ર થઈ ગયાં હતાં. બસમાં સવાર મુસાફરોમાં ચીસાચીસ અને અફરાતફરી મચી ગઈ હતી. ઘટનાની ગંભીરતાને ધ્યાનમાં રાખીને 108 એમ્બ્યુલન્સની ટીમ તાત્કાલિક ઘટનાસ્થળે પહોંચી હતી. ઈજાગ્રસ્તોની સંખ્યા વધુ હોવાથી આસપાસની 7થી 8 એમ્બ્યુલન્સની મદદ પણ લેવામાં આવી હતી.
નાના બાળકો સહિત 49 મુસાફરો ઘાયલ
મળેલી માહિતી મુજબ, અકસ્માતમાં 6થી 7 વર્ષનાં બાળકો સહિત આશરે 30થી 35 મુસાફરોને તાત્કાલિક સારવાર માટે ખસેડવામાં આવ્યા હતા. જોકે, સમગ્ર ઘટનામાં કુલ 49 ઘાયલોને ભરૂચ સિવિલ હોસ્પિટલમાં લાવવામાં આવ્યા હતા. હોસ્પિટલમાં સારવાર બાદ 19 લોકોને વધુ સારવાર માટે દાખલ કરવામાં આવ્યા છે, જ્યારે સામાન્ય ઈજાઓ ધરાવતા અન્ય મુસાફરોને પ્રાથમિક સારવાર આપ્યા બાદ રજા આપવામાં આવી છે. આ મામલે ભરૂચ રૂરલ પોલીસે અકસ્માતનો ગુનો નોંધીને આગળની તપાસ હાથ ધરી છે.
અમરેલી-સાવરકુંડલા હાઈવે પર એસટી બસ અને બાઈક વચ્ચે ટક્કર, 4નાં મોત
બીજી તરફ, અમરેલી-સાવરકુંડલા સ્ટેટ હાઈવે પર શેત્રુંજી નદીના પુલ નજીક મંદિર પાસે એસટી બસ અને બાઈક વચ્ચે ગંભીર અકસ્માત સર્જાયો હતો. અકસ્માત બાદ એસટી બસ રસ્તા પરથી ઉતરીને ખાડામાં જઈ પડી હતી. આ દુર્ઘટનામાં બાઈક પર સવાર એક જ પરિવારના ત્રણ સભ્યો અને એસટી બસના ડ્રાઈવર સહિત ચાર લોકોનાં મોત થયાં છે. જ્યારે ત્રણ લોકો ઘાયલ થયા છે. મળતી માહિતી મુજબ, અમરેલી તાલુકાના દેવભૂમિ દેવળિયા ગામનો સોલંકી પરિવાર બાઈક પર સવાર થઈને સાવરકુંડલા તરફ જઈ રહ્યો હતો. આ દરમિયાન સાવરકુંડલાથી અમરેલી તરફ આવી રહેલી એસટી બસ સાથે બાઈકની ટક્કર થઈ હતી. અકસ્માતમાં પરિવારના પિતા, પુત્ર અને પુત્રીનાં કરુણ મોત નીપજ્યાં હતાં, જ્યારે માતાને ગંભીર ઈજાઓ પહોંચી છે. આ અકસ્માતમાં એસટી બસના ચાલક મેહુલ દિલુ વાળાનું પણ મોત થયું છે. આમ, આ ઘટનામાં કુલ ચાર લોકોએ જીવ ગુમાવ્યા છે અને ત્રણ લોકો ઘાયલ થયા છે.
પોલીસ અને સ્થાનિક લોકો ઘટનાસ્થળે દોડી ગયા
અકસ્માતની જાણ થતાં જ સ્થાનિક લોકો અને પોલીસનો કાફલો ઘટનાસ્થળે દોડી ગયો હતો. ઈજાગ્રસ્તોને તાત્કાલિક સારવાર માટે અમરેલી સિવિલ હોસ્પિટલમાં ખસેડવામાં આવ્યા હતા. અકસ્માતને કારણે હાઈવે પર અફરાતફરીનો માહોલ સર્જાયો હતો. ઘટનાની જાણ થતાં અમરેલી જિલ્લા ભાજપ પ્રમુખ અતુલ કાનાણી સહિત ભાજપના આગેવાનો પણ સિવિલ હોસ્પિટલ પહોંચ્યા હતા. અમરેલી તાલુકા પોલીસે ઘટનાસ્થળે પહોંચીને અકસ્માત અંગે વધુ તપાસ શરૂ કરી છે. ગુજરાતમાં એક જ સવારમાં બનેલી આ બે ગંભીર અકસ્માતની ઘટનાઓમાં કુલ છ લોકોનાં મોત અને 52 લોકો ઘાયલ થયાં છે. ભરૂચમાં લક્ઝરી બસ-ટેન્કરની ટક્કર અને અમરેલીમાં એસટી બસ-બાઈક અકસ્માતે માર્ગ સુરક્ષા અંગે ફરી ચિંતા ઊભી કરી છે.