ચંડોળા તળાવના મતદારોના નામ દૂર કરવા સામે હોબાળો

અમદાવાદના ચંડોળા તળાવ વિસ્તારમાં મ્યુનિસિપલ કોર્પોરેશન દ્વારા કરવામાં આવેલા ડિમોલિશન બાદ હવે રાજકીય ગરમાવો જોવા મળી રહ્યો છે. આ વિસ્તારના સેંકડો નાગરિકોના નામ મતદાર યાદીમાંથી દૂર કરવામાં આવતા વિવાદ સર્જાયો છે. વિપક્ષી નેતા શહેઝાદખાન પઠાણે આ મામલે સત્તાધારી પક્ષના કાર્યકરો સામે ગંભીર આક્ષેપો કરી કાયદાકીય કાર્યવાહીની માંગ કરી છે.

ભાજપના કાર્યકરો સામે ડમી અરજીના આક્ષેપો : 

દાણીલીમડા વોર્ડના કોર્પોરેટર અને વિપક્ષના નેતાએ ઇસનપુર પોલીસ સ્ટેશન પહોંચી રજૂઆત કરી હતી કે ભાજપના કાર્યકરો દ્વારા જાણીજોઈને ફોર્મ નંબર 7 ભરીને ડમી અરજીઓ કરવામાં આવી છે. આશરે 400 જેટલી આવી અરજીઓ દ્વારા ચંડોળા તળાવના રહેવાસીઓના નામ મતદાર યાદીમાંથી કમી કરવાના પ્રયાસો થયા છે. જે લોકોએ આ અરજીઓ કરી છે તેમને વિસ્થાપિતો ઓળખતા પણ નથી તેવું બહાર આવ્યું છે.

વિસ્થાપિતોની કફોડી સ્થિતિ : 

ચંડોળા તળાવમાં થયેલા ડિમોલિશનને કારણે અનેક પરિવારો બેઘર બન્યા છે. હાલમાં આ લોકો પાસે કોઈ કાયમી સરનામું નથી. કેટલાક લોકો ફૂટપાથ પર તો કેટલાક સંબંધીઓના ઘરે આશરો લઈ રહ્યા છે. તંત્ર દ્વારા તેમને EWS આવાસો આપવાની ખાતરી આપવામાં આવી હતી, પરંતુ હજુ સુધી આવાસ ફાળવવામાં આવ્યા નથી. આવી સ્થિતિમાં તેમના મતાધિકાર છીનવાઈ રહ્યા હોવાથી નારાજગી જોવા મળી રહી છે.

ન્યાયિક લડતની તૈયારી : 

ચૂંટણી પંચ દ્વારા હાથ ધરવામાં આવેલા મતદાર યાદી સુધારણા કાર્યક્રમ દરમિયાન આ ગેરરીતિ થઈ હોવાનો દાવો કરવામાં આવ્યો છે. વિપક્ષનું કહેવું છે કે જ્યાં સુધી કોર્પોરેશન કે સરકાર આ લોકોને નવા આવાસ ન ફાળવે ત્યાં સુધી તેમના નામ જૂના બૂથમાં જ યથાવત રાખવા જોઈએ. જો આ બાબતે તાત્કાલિક યોગ્ય નિરાકરણ નહીં આવે અને તપાસ નહીં થાય, તો આગામી સમયમાં આ મામલે કોર્ટના દ્વાર ખખડાવવાની ચીમકી પણ આપવામાં આવી છે.