જૂનાગઢની ઝાંઝરડા ચોકડી પાસે PNG ગેસ લાઇનમાં આગથી ત્રણના મોત, ચાર લોકો દાઝ્યા

જૂનાગઢના ઝાંઝરડા રોડ પર બુધવારે વહેલી સવારે આગ લાગી હતી. ટોરેન્ટ ગેસની પાઈપ લાઈન તૂટતાં વિકરાળ આગ લાગી હતી. દુર્ઘટનામાં ત્રણ લોકોના મોત થયા છે. જ્યારે ચાર લોકો ઇજાગ્રસ્ત થતાં હોસ્પિટલમાં સારવાર માટે ખસેડાયા છે.  

જૂનાગઢની ઝાંઝરડા ચોકડી પાસે ખોદકામ ચાલી રહ્યું હતું તે સમયે ટોરેન્ટ ગેસની લાઇન તૂટતાં ભયંકર બ્લાસ્ટ થયો હતો. બ્લાસ્ટ બાદ વિકરાળ આગ લાગી હતી. વિકરાળ આગે નજીકના 8 જેટલા વાહનો અને 8 જેટલી દુકાનોને ઝપેટમાં લીધી હતી. આગમાં માતા-દીકરી સહિત ત્રણ લોકોના મોત થયા છે. જ્યારે ચાર લોકો દાઝી જતાં તેમને તાત્કાલિક સારવાર અર્થે હોસ્પિટલમાં ખસેડવામાં આવ્યા છે.

ઘટનાની જાણ થતાં ફાયર વિભાગના જવાનો, પોલીસ અને 108 એમ્બ્યુલન્સની ટીમ ઘટનાસ્થળે પહોંચી ગઇ હતી. આગની દુર્ઘટનામાં રૂપીબેન શૈલેષભાઈ સોલંકી ઉ.વ.40, ભક્તિ શૈલેષભાઈ સોલંકી ઉ.વ.4 અને હિરેનભાઈ રાબડીયા ઉ.વ.50 નું મોત થયુ છે.

ઝાંઝરડા ચોકડી વિસ્તારની આજુબાજુ ખાણીપીણીની દુકાનો અને પાનના ગલ્લા હોવાથી આગ ઝડપથી પ્રસરી હતી. ફાયરની ટીમ સતત પાણીનો મારો ચલાવી આગને કાબૂમાં લીધી હતી. આગની ઘટનાના પગલે કલેક્ટર, પોલીસ અધિકારીઓ સહિતનું તંત્ર ઘટનાસ્થળે પહોંચી ગયુ હતુ.