સુરત મેટ્રો રેલ પ્રોજેક્ટ હવે તેના નિર્ણાયક તબક્કામાં પહોંચી ગયો છે. તાજેતરમાં શહેરના હૃદય સમાન અને સૌથી વ્યસ્ત વિસ્તાર ગણાતા ચોક બજાર ખાતે અંડરગ્રાઉન્ડ ટનલિંગનું કામ કરી રહેલું TBM (ટનલ બોરિંગ મશીન) 'અમૃત' જમીનની બહાર આવતા જ એન્જિનિયરો અને શ્રમિકોમાં ખુશીની લહેર દોડી ગઈ હતી. આ સાથે જ ડાઉનલાઇન ટનલનું કામ સફળતાપૂર્વક પૂર્ણ થયું છે.
પડકારજનક 2.8 કિલોમીટરનો પ્રવાસ
TBM 'અમૃત' મશીને સુરત રેલવે સ્ટેશનથી શરૂ કરીને ચોક બજાર સુધીનું આશરે 2.8 કિમી લાંબું અંતર કાપ્યું છે. આ સમગ્ર સેક્શન અંડરગ્રાઉન્ડ છે અને જમીનથી લગભગ 12 મીટર નીચે મશીન કાર્યરત હતું.
ચોક બજાર વિસ્તાર તેની ગીચ વસ્તી અને દાયકાઓ જૂની ઇમારતો માટે જાણીતો છે, જેના કારણે અહીં ટનલ બનાવવી એ એન્જિનિયરો માટે કોઈ મોટી આફતથી ઓછું નહોતું.
સુરક્ષા અને ટેકનિકલ સફળતા
ટનલિંગ દરમિયાન કોઈ પણ જાન-માલનું નુકસાન ન થાય તે માટે ગુજરાત મેટ્રો રેલ કોર્પોરેશન (GMRC) દ્વારા વિશેષ તકેદારી રાખવામાં આવી હતી. જૂની ઇમારતોમાં વાઇબ્રેશનના કારણે તિરાડો ન પડે તે માટે કેટલીક અતિ જોખમી ઇમારતો ખાલી કરાવાઈ હતી અને ત્યાંના રહેવાસીઓને સુરક્ષિત રીતે હોટલમાં આશ્રય આપવામાં આવ્યો હતો. કોઈ પણ મોટી દુર્ઘટના વગર આ સફળ બ્રેકથ્રુ મેળવવો એ સુરત મેટ્રોની ટેકનિકલ ક્ષમતાની મોટી જીત છે.
ક્યારે શરૂ થશે મેટ્રો?
કોરિડોર-1 (સરથાણા થી ડ્રીમ સિટી) પર અંડરગ્રાઉન્ડ સેક્શનની કામગીરી હવે ફાસ્ટ ટ્રેક પર છે. ડાઉનલાઇન બાદ હવે પેરેલલ અપલાઇન ટનલનું કામ પણ અંતિમ તબક્કામાં છે.
ચોક બજાર સ્ટેશન પર હવે ફિનિશિંગ અને ટ્રેક બિછાવવાની કામગીરી શરૂ કરવામાં આવશે. સત્તાવાર સૂત્રોના જણાવ્યા અનુસાર, સુરત મેટ્રોનો પ્રથમ તબક્કો જૂન 2026 સુધીમાં કાર્યરત થાય તેવી પૂરેપૂરી શક્યતા છે.
&nbsp;

સુરત મેટ્રો ટનલનું કામ પૂર્ણ

ગીચ વસ્તી અને જૂની ઇમારતો વચ્ચે કોઈ પણ નુકસાન વગર ટનલિંગ સફળ, જૂન'26 સુધીમાં દોડશે મેટ્રો

February 11, 2026 | 10:18 IST