છેલ્લાં ત્રણ દાયકામાં સૌથી ઉંચુ ધોરણ-10નું રેકોર્ડ બ્રેક પરિણામઃ દીકરીઓએ મેદાન માર્યુ

ગુજરાત માધ્ચમિક અને ઉચ્ચતર માધ્યમિક શિક્ષણ બોર્ડ દ્વારા માર્ચ-2025માં લેવાયેલી ધોરણ-10ની પરીક્ષાનું પરિણામ જાહેર થયુ છે. છેલ્લાં 32 વર્ષના ઈતિહાસમાં આ વર્ષે સૌથી ઉંચુ પરિણામ આવ્યુ છે. ધોરણ-10નું રેકોર્ડ બ્રેક 83.08 ટકા પરિણામ આવ્યુ છે. ગત વર્ષની સરખામણીએ આ વર્ષે 0.52 ટકા પરિણામ ઉંચુ આવ્યુ છે. ધોરણ-10ના પરિણામમાં દીકરીઓ મેદાન મારી ગઈ છે. વિદ્યાર્થીઓનું પરિણામ 79.56 ટકા જ્યારે વિદ્યાર્થિનિઓનું પરિણામ 87.24 ટકા આવ્યું છે. દીકરાઓ કરતાં દીકરીઓનું 7.68 ટકા પરિણામ વધુ આવ્યુ છે.

ગુજરાત માધ્ચમિક અને ઉચ્ચતર માધ્યમિક શિક્ષણ બોર્ડ સંલગ્ન ધોરણ-10માં કુલ 7,62,485 નિયમિત વિદ્યાર્થીઓ નોંધાયા હતા. તેમાંથી માર્ચ-2025માં લેવાયેલી પરીક્ષામાં 7,46,892 નિયમિત વિદ્યાર્થીઓએ પરીક્ષા આપી હતી. તે પૈકી 6,20,532 વિદ્યાર્થીઓ ઉત્તિર્ણ થતાં રેકોર્ડ બ્રેક 83.08 ટકા પરિણામ આવ્યુ છે. ગત વર્ષની તુલનામાં 0.52 ટકા પરિણામ ઉંચુ આવ્યુ છે.

બનાસકાંઠા જિલ્લાનું સૌથી વધુ 89.29 ટકા અને સૌથી ઓછું પરિણામ ખેડા જિલ્લાનું 72.55 ટકા પરિણામ આવ્યુ છે. 1574 શાળાઓનું 100 ટકા તેમજ 201 શાળાઓનું 30 ટકા કરતાં નીચુ પરિણામ આવ્યુ છે. જ્યારે 45 શાળાઓમાં શૂન્ય ટકા પરિણામ આવ્યુ છે. રાજ્યમાં સૌથી ઉંચુ પરિણામ મહેસાણાના વિસનગર તાલુકાના કાંસા અને ભાવનગરના ભોળાદ કેન્દ્રનું એક સરખું 99.11 ટકા આવ્યુ છે.  ખેડા જિલ્લાના અંબાવ કેન્દ્રનું સૌથી ઓછું 29.56% પરિણામ આવ્યું છે.

આ વર્ષે ગણિત, વિજ્ઞાન, ગુજરાતીમાં સૌથી વધુ વિદ્યાર્થીઓ નાપાસ થયા છે. ગણિતમાં 16.53 ટકા એટલે કે 1,13,352 વિદ્યાર્થી, વિજ્ઞાનમાં 12.16 ટકા એટલે કે 90,791 વિદ્યાર્થી અને ગુજરાતીમાં 8.71 ટકા એટલે કે 54,614 વિદ્યાર્થી નાપાસ થયા છે. ગ્રેડ વાઈઝ વિદ્યાર્થીઓની વાત કરીએ તો 28,055 વિદ્યાર્થીઓએ A-1, 86,459 વિદ્યાર્થીઓએ A-2, 1,24,274 વિદ્યાર્થીઓએ B-1 અને 1,52,084 વિદ્યાર્થીઓએ B-2,  1,45,444 વિદ્યાર્થીઓએ C-1, 78,137 વિદ્યાર્થીઓએ C-2 તેમજ 6,066 વિદ્યાર્થીઓએ D ગ્રેડ મેળવ્યો છે.

પ્રોત્સાહક ઈનામની રકમમાં 20 હજારનો વધારો

સામાજિક ન્યાય અને અધિકારીતા વિભાગે છત્રપતિ શાહુજી મહારાજ પ્રોત્સાહક ઈનામ યોજના અંતર્ગત ધોરણ 10 અને 12ની બોર્ડની પરીક્ષામાં અનુસૂચિત જાતિ- SC તેમજ સામાજિક અને શૈક્ષણિક રીતે પછાત વર્ગ- SEBCનાં પ્રથમ ત્રણ ક્રમાંક પ્રાપ્ત કરનાર વિદ્યાર્થીઓને અપાતી પ્રોત્સાહક ઈનામની રકમમાં વિવિધ કક્ષાએ રૂપિયા 20 હજારનો સુધીનો વધારો કર્યો છે. રાજ્યકક્ષાએ ધોરણ 10 અને 12ના પ્રથમ ત્રણ વિદ્યાર્થીઓને અપાતી રકમમાં વધારો કરી હવે અનુક્રમે રૂપિયા 51 હજાર, રૂપિયા 41 હજાર અને રૂપિયા 31 હજાર આપવામાં આવશે. પહેલાં પ્રથમ ક્રમાંકે આવનાર વિદ્યાર્થીને 31 હજાર, 21 હજાર અને તૃતીય સ્થાને આવનાર વિદ્યાર્થીને 11 હજાર આપવામાં આવતાં હતા.