રાજકોટ: જંગલેશ્વરમાં સોમવારે મેગા બુલડોઝર ડ્રાઈવ

રાજકોટ શહેરના જંગલેશ્વર વિસ્તારમાં સોમવારે મેગા ડિમોલેશન ડ્રાઈવ હાથ ધરવામાં આવશે. નદીકાંઠા પર વર્ષોથી ઉભા થયેલા 100થી વધુ દબાણોને દૂર કરવાની કાર્યવાહી માટે રાજકોટ મ્યુનિસિપલ કોર્પોરેશન (RMC) દ્વારા વિશેષ તૈયારી પૂર્ણ કરી દેવામાં આવી છે. 

રાજકોટ મહાનગરપાલિકા (RMC) દ્વારા શહેરના જંગલેશ્વર વિસ્તારમાં જમીન સંપાદન અને દબાણ હટાવવા માટે અત્યાર સુધીની સૌથી મોટી કાર્યવાહીની તૈયારીઓ પૂર્ણ કરી લેવામાં આવી છે.  આગામી સોમવાર, 23 ફેબ્રુઆરીના રોજ જંગલેશ્વરમાં આજી નદીના કાંઠા પર અને ટીપી રોડ પર ઉભા થયેલા 153 જેટલા ગેરકાયદેસર બાંધકામોને તોડી પાડવામાં આવશે.

મ્યુનિસિપલ કમિશનર તુષાર સુમેરાએ આ અંગે વિગતો આપતા જણાવ્યું હતું કે, જંગલેશ્વર વિસ્તારમાં કુલ 1400થી વધુ આસામીઓને અગાઉથી જ નોટિસ ફટકારી દેવામાં આવી હતી. રવિવાર સુધીમાં જગ્યા ખાલી કરવા માટેની અંતિમ મુદ્દત આપવામાં આવી છે.

જોકે, જે બાંધકામો પર હાઈકોર્ટનો સ્ટે ઓર્ડર છે તેને અત્યારે સ્પર્શ કરવામાં આવશે નહીં, પરંતુ તે સિવાયના તમામ ગેરકાયદે બાંધકામો પર તંત્રનું બુલડોઝર ફરી વળશે.

7 ઝોનમાં વહેંચાશે કામગીરી

આ મેગા ડિમોલેશન ડ્રાઈવને સુચારુ રીતે પાર પાડવા માટે સમગ્ર વિસ્તારને 7 ઝોનમાં વહેંચવામાં આવ્યો છે. દરેક ઝોનની જવાબદારી એક ક્લાસ-વન અધિકારીને સોંપવામાં આવી છે. આ કામગીરી દરમિયાન કોઈ અઘટિત ઘટના ન બને તે માટે પોલીસ વિભાગ, વિજિલન્સ સ્ટાફ, PGVCL (વીજ કંપની) અને GSPC (ગેસ કંપની)ના અધિકારીઓ સાથે સંકલન સાધવામાં આવ્યું છે.

તાજેતરમાં જ આ ઓપરેશનને લઈને મ્યુનિસિપલ કમિશનર અને પોલીસ કમિશનરે રાજ્યના નાયબ મુખ્યમંત્રી હર્ષ સંઘવી સાથે મહત્વની બેઠક યોજી હતી. આ બેઠકમાં ડિમોલેશન દરમિયાન કાયદો અને વ્યવસ્થા જળવાઈ રહે તે અંગે વિસ્તૃત ચર્ચા કરવામાં આવી હતી. નદીકાંઠાની સરકારી જમીન વર્ષોથી દબાણ હેઠળ હોવાથી નદીના શુદ્ધિકરણ અને રિવરફ્રન્ટના પ્રોજેક્ટ્સમાં અવરોધ આવતો હતો, જે હવે દૂર થશે.

જંગલેશ્વરના રહેવાસીઓમાં આ કાર્યવાહીને લઈને મિશ્ર પ્રતિસાદ છે. જે લોકો વર્ષોથી અહીં વસવાટ કરે છે તેઓ પોતાના આશિયાના છીનવાઈ જવાની ચિંતામાં છે. રહેણાંક અને વાણિજ્યિક એમ બન્ને જગ્યાએ બુલડોઝર ફરી વળશે જેનો મહિલાઓમાં ઉગ્ર રોષ જોવા મળ્યો છે.

જંગલેશ્વરની મહિલાઓનું કહેવું છે કે તેમના ઘર તોડવાની સામે અન્ય ભાડાના ઘરની કરેલી સુવિધાની માંગણી પણ નકારી દીધી છે, જ્યારે શહેરના જાગૃત નાગરિકો નદીકાંઠાને પ્રદૂષણ અને દબાણમુક્ત કરવાની આ કામગીરીને આવકારી રહ્યા છે. 

સોમવારે વહેલી સવારથી જ ભારે પોલીસ બંદોબસ્ત વચ્ચે RMCનો કાફલો જંગલેશ્વરમાં ત્રાટકશે. RMCની મેગા ડ્રાઈવમાં ડીમોલીશનની કામગીરી શરુ કરાશે.