પિતાએ જ સગીર દીકરીને ગર્ભવતી બનાવી હોવાનો આરોપ! ફરિયાદ રદ કરાવવા પહોંચ્યો હાઈકોર્ટ, DNA રિપોર્ટથી મોટો વળાંક

Porbandar Father Rapes Minor Daughter: ગુજરાતના પોરબંદરમાં સગીર દીકરી સાથે દુષ્કર્મ અને તેને ગર્ભવતી બનાવવાના ગંભીર કેસમાં ગુજરાત હાઈકોર્ટમાં ચોંકાવનારો વળાંક આવ્યો છે. પોતાની જ 17 વર્ષીય દીકરી પર દુષ્કર્મ આચરવાનો આરોપ ધરાવતા પિતાએ પત્નીની સંમતિથી પોલીસ ફરિયાદ રદ કરાવવા હાઈકોર્ટના દરવાજા ખખડાવ્યા હતા. જોકે, સુનાવણી દરમિયાન સામે આવેલા DNA રિપોર્ટ બાદ મામલો વધુ ગંભીર બન્યો હતો. કોર્ટે પીડિતાની માતા અને તેના વકીલને પણ આકરા શબ્દોમાં ટકોર કરી હતી.

પોરબંદરમાં પિતા સામે સગીર દીકરી પર દુષ્કર્મની ફરિયાદ
મળતી માહિતી મુજબ, ચાલુ વર્ષે પોરબંદરના મરીન પોલીસ સ્ટેશનમાં એક મહિલાએ પોતાના પતિ વિરુદ્ધ ફરિયાદ નોંધાવી હતી. ફરિયાદમાં આક્ષેપ કરવામાં આવ્યો હતો કે તેના પતિએ પોતાની જ 17 વર્ષીય સગીર દીકરી પર દુષ્કર્મ આચર્યું હતું, જેના કારણે દીકરી ગર્ભવતી બની હતી. ફરિયાદના આધારે પોલીસે આરોપી પિતાની ધરપકડ કરી હતી અને સમગ્ર મામલે કાયદેસરની તપાસ શરૂ કરી હતી. આ ઘટનાએ પોરબંદર સહિત સમગ્ર ગુજરાતમાં ચકચાર મચાવી હતી.

પત્નીની સંમતિથી ફરિયાદ રદ કરાવવા હાઈકોર્ટમાં અરજી
આ કેસમાં આરોપી પિતાએ પોતાની પત્નીની સંમતિનો આધાર લઈને ગુજરાત હાઈકોર્ટમાં અરજી દાખલ કરી હતી. અરજીમાં પોલીસ ફરિયાદ રદ કરવાની માગ કરવામાં આવી હતી. આટલું જ નહીં, પીડિતાની માતાએ કોર્ટમાં રજૂ કરેલા એફિડેવિટમાં દાવો કર્યો હતો કે આવી કોઈ ઘટના બની જ નથી. જોકે, કેસની સુનાવણી દરમિયાન પોલીસ તરફથી રજૂ કરવામાં આવેલા DNA રિપોર્ટને કારણે મામલાએ ગંભીર વળાંક લીધો હતો.

DNA રિપોર્ટ સામે આવતાં હાઈકોર્ટની કડક ટકોર
સુનાવણી દરમિયાન પોલીસે સગીરાના ગર્ભના DNA પરીક્ષણનો રિપોર્ટ કોર્ટ સમક્ષ રજૂ કર્યો હતો. આ રિપોર્ટમાં ગર્ભના DNA અને આરોપી પિતાના DNA વચ્ચે મેળ હોવાનું સામે આવ્યું હતું. આ પુરાવાને પગલે ફરિયાદમાં કરવામાં આવેલા આક્ષેપોની ગંભીરતા કોર્ટ સમક્ષ વધુ સ્પષ્ટ થઈ હતી. આ સ્થિતિમાં ગુજરાત હાઈકોર્ટે પીડિતાની માતા પ્રત્યે નારાજગી વ્યક્ત કરી હતી. અહેવાલ મુજબ, કોર્ટે આકરા શબ્દોમાં ટકોર કરતાં કહ્યું હતું કે, દીકરીને તમારા જેવી માતા હોય તેના કરતાં તો ન હોય એ સારું. કોર્ટે પીડિતાના વકીલને પણ પૈસા માટે કોઈપણ કામ ન કરવાની કડક સલાહ આપી હતી.

સગીરાની સુરક્ષા અને ન્યાયનો ગંભીર સવાલ
પોરબંદરનો આ કેસ માત્ર એક ગંભીર ફોજદારી ફરિયાદ પૂરતો મર્યાદિત નથી, પરંતુ સગીરાની સુરક્ષા, પરિવારની જવાબદારી અને ન્યાયિક પ્રક્રિયાની ગંભીરતા સામે પણ સવાલ ઊભા કરે છે. ખાસ કરીને જ્યારે ફરિયાદ રદ કરાવવાની અરજીમાં માતા તરફથી ઘટના બની જ ન હોવાનો દાવો કરવામાં આવ્યો હોય અને બીજી તરફ DNA રિપોર્ટ જેવા વૈજ્ઞાનિક પુરાવા કોર્ટ સમક્ષ રજૂ થયા હોય. હાલ આ મામલે કાયદાકીય કાર્યવાહી અને તપાસ આગળ વધી રહી છે. આરોપી સામેના આક્ષેપોનો અંતિમ નિર્ણય કોર્ટમાં પુરાવા અને કાયદાકીય પ્રક્રિયાના આધારે થશે.