PGVCLનું સૌરાષ્ટ્રમાં આજે 'વીજ જોડાણ કાપો' અભિયાન!

પશ્ચિમ ગુજરાત વીજ કંપની લિમિટેડ (PGVCL) દ્વારા આજે 25 ફેબ્રુઆરીના રોજ સૌરાષ્ટ્ર અને કચ્છના 12 સર્કલમાં વીજ બિલના બાકીદારો વિરુદ્ધ એક મોટી ઝુંબેશ છેડવામાં આવી છે.

મોરબી જિલ્લાના હળવદ શહેરમાં પણ પીજીવીસીએલની ટીમોએ મેદાનમાં ઉતરીને લાંબા સમયથી બિલ નહીં ભરનારા ગ્રાહકોના કનેક્શન કાપવાની કાર્યવાહી તેજ કરી છે.

650 કરોડથી વધુની વસૂલાત બાકી

માર્ચ મહિનો (નાણાકીય વર્ષનો અંત) નજીક આવતા જ PGVCLએ લિસ્ટ તૈયાર કર્યું છે જેમાં રેસીડેન્સીયલ, ઇન્ડસ્ટ્રીયલ અને ખેતીવાડી ક્ષેત્રના અંદાજે 28.68 લાખ ગ્રાહકો પાસે કુલ રૂ. 652.99 કરોડનું લેણું બાકી છે. આ એવા ગ્રાહકો છે જેમણે છેલ્લા 2 થી 6 મહિનાથી વીજ બિલ ભર્યું નથી.

સમજાવટ નહીં, હવે માત્ર કાર્યવાહી

રાજકોટના ડેપ્યુટી એન્જિનિયર ડી.એન. પટેલે જણાવ્યું હતું કે, "આજે વસૂલાત માટે સમજાવટનો દિવસ નથી, પરંતુ કનેક્શન કાપવાનો જ દિવસ છે." સામાન્ય રીતે ટીમ જ્યારે ઘરે જાય ત્યારે ગ્રાહકો બિલ ભરી દેતા હોય છે, પરંતુ આ વખતે તંત્રએ કડક વલણ અપનાવ્યું છે જેથી ગ્રાહકોને સમયસર બિલ ભરવાની ટેવ પડે. સમગ્ર સૌરાષ્ટ્ર-કચ્છમાં ૨૭૦૦ જેટલી ટીમો આ કામગીરીમાં જોડાઈ છે.

હળવદમાં ટીમો ત્રાટકી

હળવદ શહેરમાં પણ સવારથી જ વીજ કંપનીની વિવિધ ટીમોએ વિસ્તારોમાં જઈને લેણદારોના જોડાણ કાપવાનું શરૂ કર્યું છે. રહેણાંક મકાનો હોય કે વ્યવસાયિક એકમો, જેમના બિલ બાકી છે તેમના કનેક્શન સ્થળ પર જ કાપી નાખવામાં આવી રહ્યા છે. જરૂર જણાયે પોલીસ પ્રોટેક્શન લેવાની પણ તૈયારી રાખવામાં આવી છે.

પાલિકાઓને રાહત

આ મેગા ડ્રાઈવમાં નગરપાલિકાઓના વીજ જોડાણોનો સમાવેશ કરવામાં આવ્યો નથી. પાલિકાઓના બિલ બાકી હોવા છતાં, તે 'આવશ્યક સેવા' હેઠળ આવતી હોવાથી હાલમાં તેમના કનેક્શન કાપવામાં આવશે નહીં.

ગ્રાહકોને અપીલ કરવામાં આવી છે કે તેઓ પોતાના વીજ બિલની ભરપાઈ વહેલી તકે કરી દે, અન્યથા વીજ જોડાણ કપાયા બાદ ફરીથી કનેક્શન મેળવવા માટે દંડ અને વસૂલાતની લાંબી પ્રક્રિયામાંથી પસાર થવું પડશે.