મોરબીમાં ખેડૂતોની લડતને મળ્યો નારી શક્તિનો સાથ

Morbi Jetpar Farmers Protest: મોરબી જિલ્લામાં ખેડૂતોના હિતોની લડાઈ હવે વધુ વ્યાપક સ્વરૂપ ધારણ કરી રહી છે. ખેડૂતો દ્વારા શરૂ કરાયેલા આમરણાંત ઉપવાસને દિવસેને દિવસે લોકોનો અભૂતપૂર્વ ટેકો મળી રહ્યો છે. ખાસ કરીને મહિલાઓ, યુવતીઓ અને ગ્રામજનો મોટી સંખ્યામાં ઉપવાસ સ્થળે પહોંચી ખેડૂતો સાથે એકતા દર્શાવી રહ્યા છે.આ સમગ્ર ઘટનાક્રમનો ડ્રોન વીડિયો સોશિયલ મીડિયા પર વાયરલ થતાં સમગ્ર ગુજરાતનું ધ્યાન મોરબી તરફ ખેંચાયું છે.ખેડૂતોની માંગને સમર્થન આપવા માટે વિવિધ ગામોમાંથી મહિલાઓ મોટી સંખ્યામાં ઉપવાસ સ્થળે પહોંચી હતી.તેમના હાથમાં બેનરો અને પ્લેકાર્ડ હતા,જેના માધ્યમથી ખેડૂતોને ન્યાય આપવાની માંગ કરવામાં આવી હતી.

મહિલાઓએ જણાવ્યું કે ખેડૂતો માત્ર પોતાના હક્ક માટે લડી રહ્યા છે અને તેમની માંગને સરકાર તેમજ સંબંધિત તંત્રએ ગંભીરતાથી સાંભળવી જોઈએ.મોરબી જિલ્લામાં ખાનગી વીજ કંપનીની વીજ લાઇનો પસાર કરવા અને વીજ પોલ ઊભા કરવાની કામગીરીને લઈને ખેડૂતોનો વિરોધ વધુ ઉગ્ર બન્યો છે. ખેડૂતોનો આક્ષેપ છે કે તેમની જમીનમાં કામગીરી શરૂ કરવામાં આવી રહી છે, પરંતુ તેના બદલામાં યોગ્ય વળતર આપવામાં આવ્યું નથી. આ મુદ્દે મોરબી જિલ્લાના જેતપર ગામે ખેડૂતો 18 જૂનથી આમરણાંત ઉપવાસ આંદોલન પર બેઠા છે.

નારી શક્તિની ઉપસ્થિતિએ સમગ્ર આંદોલનને નવી દિશા આપી
આંદોલન દરમિયાન સ્થાનિક દીકરીઓ દ્વારા એક હૃદયસ્પર્શી નાટક પણ રજૂ કરવામાં આવ્યું હતું. નાટકમાં ખેડૂતોની હાલની પરિસ્થિતિ, પાકને પડતી મુશ્કેલીઓ, આર્થિક સંકટ અને કંપનીઓ સામે ખેડૂતોની લડતને જીવંત રીતે રજૂ કરવામાં આવી હતી. સાથે જ કંપનીઓની કથિત મનમાની અને ખેડૂતો પર પડતા પ્રભાવને નાટ્ય સ્વરૂપે રજૂ કરતાં ઉપસ્થિત લોકો ભાવુક બની ગયા હતા.નાટકમાં દર્શાવવામાં આવ્યું હતું કે એક તરફ ખેડૂત દિવસ-રાત મહેનત કરીને અનાજનું ઉત્પાદન કરે છે, જ્યારે બીજી તરફ અનેક મુશ્કેલીઓનો સામનો કરવો પડે છે.પાણીની સમસ્યા, વધતા ખર્ચ, બજારમાં યોગ્ય ભાવનો અભાવ અને અન્ય પ્રશ્નો વચ્ચે ખેડૂતોની સ્થિતિ કેવી રીતે નાજુક બની રહી છે તે અસરકારક રીતે રજૂ કરવામાં આવ્યું હતું.

નારી શક્તિની ઉપસ્થિતિએ સમગ્ર આંદોલનને નવી દિશા આપી છે.મહિલાઓએ સ્પષ્ટ શબ્દોમાં જણાવ્યું કે ખેડૂત માત્ર પરિવારનો નહીં પરંતુ સમગ્ર દેશનો અન્નદાતા છે. તેથી તેમની સમસ્યાઓનું વહેલી તકે નિરાકરણ આવવું જોઈએ.અનેક મહિલાઓએ ખેડૂતો સાથે બેસીને ઉપવાસને સમર્થન આપ્યું અને ન્યાય માટે સંઘર્ષ ચાલુ રાખવાની પ્રતિબદ્ધતા વ્યક્ત કરી.ડ્રોનથી લેવામાં આવેલા દૃશ્યોમાં ઉપવાસ સ્થળે ઉમટેલી જનમેદની સ્પષ્ટ જોવા મળી હતી.હજારો લોકો એકત્ર થતાં સમગ્ર વિસ્તાર જનસાગરમાં ફેરવાઈ ગયો હતો.સોશિયલ મીડિયા પર આ દૃશ્યો ઝડપથી વાયરલ થતાં અનેક લોકો ખેડૂતોના સમર્થનમાં પોતાની પ્રતિક્રિયાઓ વ્યક્ત કરી રહ્યા છે.

મહિલાઓએ ગરબે રમી ખાનગી વીજ કંપની સામે અનોખો વિરોધ નોંધાવ્યો
આમરણાંત ઉપવાસ આંદોલનના છઠ્ઠા દિવસે વાતાવરણ વધુ ગરમાયું હતું.મોરબી જિલ્લાના જુદા જુદા ગ્રામ્ય વિસ્તારોમાંથી મોટી સંખ્યામાં મહિલાઓ ઉપવાસી છાવણી ખાતે એકત્ર થઈ હતી. મહિલાઓએ ખાનગી વીજ કંપની સામે આક્રોશ વ્યક્ત કરવા માટે અનોખો માર્ગ અપનાવ્યો હતો અને છાવણી પર આનંદનો ગરબો ગાઈને ગરબે ઘૂમી વિરોધ પ્રદર્શન કર્યું હતું.

ડ્રોન વીડિયોમાં દેખાઈ વિશાળ જનમેદની
આંદોલન સ્થળનો ડ્રોન વીડિયો પણ સામે આવ્યો છે, જેમાં ખેડૂતોના સમર્થનમાં મોટી સંખ્યામાં લોકો ઉમટી પડ્યા હોવાનું જોવા મળે છે. આયોજકોના દાવા મુજબ, ગામના માર્ગો લોકોની ભીડથી ભરાઈ ગયા હતા અને મોટી સંખ્યામાં મહિલાઓ પણ આંદોલનમાં જોડાઈ હતી. ખેડૂતોનું કહેવું છે કે જ્યાં સુધી યોગ્ય વળતર અને તેમની માંગણીઓ અંગે સંતોષકારક નિર્ણય નહીં આવે, ત્યાં સુધી આંદોલન ચાલુ રહેશે.

માત્ર પાંચ કલાકની તૈયારીમાં રજૂ કર્યું નાટક
ગામની દીકરીઓએ માત્ર પાંચ કલાકની પ્રેક્ટિસ બાદ આ નાટક તૈયાર કર્યું હતું. આયોજકોના જણાવ્યા અનુસાર, આ નાટક મોરબી સહિત અન્ય જિલ્લાઓમાંથી આવેલી અંદાજે 8,000 થી 10,000 મહિલાઓની ઉપસ્થિતિમાં રજૂ કરવામાં આવ્યું હતું.નાટક દરમિયાન ખેડૂતોની મુશ્કેલીઓ અને જમીન સંબંધિત મુદ્દાઓને ભાવનાત્મક રીતે રજૂ કરવામાં આવ્યા હતા. આયોજકોનો દાવો છે કે નાટક બાદ ઉપસ્થિત મહિલાઓએ ખેડૂતોની લડતમાં અંત સુધી સાથ આપવાનો સંકલ્પ વ્યક્ત કર્યો હતો.

વળતર મુદ્દે ઉકેલની રાહ
ખેડૂતોની મુખ્ય માંગ યોગ્ય વળતર અને જમીન સંબંધિત પ્રક્રિયામાં પારદર્શિતા જાળવવાની છે. બીજી તરફ,ખાનગી વીજ કંપની અથવા સંબંધિત સરકારી તંત્ર તરફથી આક્ષેપો અંગે સત્તાવાર પ્રતિસાદ જાહેર થવાનો બાકી છે. આંદોલનને લઈને આગામી દિવસોમાં તંત્ર અને ખેડૂતો વચ્ચે કોઈ સમાધાનની ચર્ચા થાય છે કે નહીં તેના પર સૌની નજર છે. હાલ બંને પક્ષોની સત્તાવાર સ્થિતિ સ્પષ્ટ થયા બાદ જ સમગ્ર વિવાદનું અંતિમ ચિત્ર સામે આવશે.