હડકવો ઉપડ્યા બાદ યુવક 24 કલાકમાં થયો સ્વસ્થ

બનાસકાંઠા જિલ્લાના વડગામ તાલુકાના નરાસળ ગામે ગત શુક્રવારની રાત્રે એક અત્યંત ચોંકાવનારી ઘટના સામે આવી હતી, જેમાં એક યુવકને અચાનક હડકવો ઉપડતા આખું ગામ હેબતાઈ ગયું હતું. આ યુવકને 3 મહિના પહેલા કૂતરાએ બચકાં ભર્યા હતા, જેની અસર અત્યારે દેખાતા તે શ્વાનની જેમ ભસવા લાગ્યો હતો અને 4 પગે ચાલીને લોકોને કરડવા દોડતો હતો. સ્થિતિ એટલી ગંભીર હતી કે, તેને કાબૂમાં લેવા માટે દોરડાથી બાંધીને પાલનપુર સિવિલ હોસ્પિટલ ખસેડવામાં આવ્યો હતો. તબીબી વિજ્ઞાન મુજબ, હડકવાના લક્ષણો દેખાયા બાદ દર્દીનું બચવું અશક્ય હોય છે, પરંતુ આ કિસ્સામાં કંઈક અલગ જ ચમત્કાર જોવા મળ્યો છે.

હડકવાના દર્દીને 'હાઇડ્રોફોબિયા' થાય

હોસ્પિટલમાં દાખલ કર્યાના માત્ર 24 કલાકમાં જ આ યુવકનો હડકવા ગાયબ હોય તેમ એકદમ સ્વસ્થ થઈ ગયો છે. બનાસ મેડિકલ હોસ્પિટલના ડોક્ટરોએ જણાવ્યું કે, જ્યારે દર્દીને લાવવામાં આવ્યો ત્યારે તેનામાં હડકવાના તમામ ક્લિનિકલ લક્ષણો હતા અને તેણે હોસ્પિટલમાં પણ ભારે ધમાલ મચાવી હતી, જેના કારણે તેને બેભાન કરવો પડ્યો હતો. જોકે, રવિવાર સવાર સુધીમાં યુવક સંપૂર્ણ ભાનમાં આવી ગયો હતો અને આશ્ચર્યની વાત એ છે કે, તે ડોક્ટરોની નજર સામે જ પાણી પી રહ્યો છે અને ભોજન પણ લઈ રહ્યો છે. સામાન્ય રીતે હડકવાના દર્દીને 'હાઇડ્રોફોબિયા' એટલે કે પાણીનો ડર લાગતો હોય છે, જે આ દર્દીમાં હવે જોવા મળતો નથી.

આ કેસની ઊંડી તપાસ કરવી જરૂરી

આ રહસ્યમય કિસ્સાએ મેડિકલ જગતને પણ વિચારતું કરી દીધું છે. ડોક્ટરોનું માનવું છે, કે આ હડકવો છે કે મગજની કોઈ અન્ય બીમારી તેની ઊંડી તપાસ કરવી જરૂરી છે. યુવકે પોતે જણાવ્યું છે કે, તેણે અગાઉ હડકવાની રસી લીધી હતી, જે હવે તપાસનો વિષય છે. હાલમાં સ્પેશિયલ ડૉક્ટરોની ટીમ આ કેસનું વિશ્લેષણ કરી રહી છે અને વિવિધ રિપોર્ટ્સ બાદ જ સાચું કારણ જાણી શકાશે. જે રીતે યુવક હિંસક બન્યા બાદ ફરી સામાન્ય સ્થિતિમાં આવ્યો છે, તે જોતા આ કિસ્સો તબીબી ઇતિહાસમાં એક મોટો કોયડો બની ગયો છે.