મહેસાણા-ઊંઝા હાઈવે પર આજે વહેલી સવારે એક અત્યંત ગમખ્વાર અકસ્માત સર્જાયો છે. રાજસ્થાનના પાલી ખાતે લગ્ન પ્રસંગમાં હાજરી આપીને ખુશી-ખુશી અમદાવાદ પરત ફરી રહેલા કુમાવત પરિવારને ઉનાવા નજીક કાળ આંબી ગયો હતો. આ ભયાનક દુર્ઘટનામાં માસૂમ બાળક સહિત પરિવારના 4 સભ્યોના ઘટનાસ્થળે જ મોત નીપજ્યા છે, જ્યારે અન્ય 6 લોકો ગંભીર રીતે ઈજાગ્રસ્ત થયા છે.
ઘટનાની વિગત અને જાનહાની :&nbsp;
અમદાવાદના રામોલ વિસ્તારમાં રહેતો કુમાવત પરિવાર વતનમાં લગ્ન પતાવીને ઈકો કારમાં પરત આવી રહ્યો હતો. ઉનાવા હાઈવે પર ચાલકે સ્ટીયરિંગ પરથી કાબૂ ગુમાવતા કાર ધડાકાભેર ડિવાઈડર સાથે અથડાઈ હતી. અકસ્માત એટલો પ્રચંડ હતો કે કારનો કચ્ચરઘાણ નીકળી ગયો હતો. આ દુર્ઘટનામાં રામલાલ કુમાવત, કૈલાશભાઈ કુમાવત, કોમલબેન અને એક નાનકડા બાળકનું કમકમાટીભર્યું મોત નીપજ્યું છે.
પોલીસ કાર્યવાહી અને તપાસ :&nbsp;
અકસ્માતની જાણ થતા જ ઉનાવા પોલીસનો કાફલો તાત્કાલિક ઘટનાસ્થળે પહોંચી ગયો હતો. પોલીસે તમામ મૃતદેહોને પોસ્ટમોર્ટમ માટે ઉનાવા સીએચસી (CHC) ખાતે ખસેડ્યા છે. ઈજાગ્રસ્તોને તાત્કાલિક સારવાર માટે નજીકની હોસ્પિટલમાં દાખલ કરવામાં આવ્યા છે. પ્રાથમિક દ્રષ્ટિએ વધુ પડતી ઝડપ અથવા ચાલકની ઉંઘ અકસ્માતનું કારણ હોઈ શકે તેમ મનાય છે.
રામોલ વિસ્તારમાં શોકનું મોજું :&nbsp;
અમદાવાદના રામોલ વિસ્તારમાં રહેતા આ પરિવારના સમાચાર મળતા જ સમગ્ર પંથકમાં સન્નાટો વ્યાપી ગયો છે. જે ઘરમાં લગ્નની યાદો અને ખુશીઓ આવવાની હતી, ત્યાં હવે માતમ છવાઈ ગયો છે. હાઈવે પર વિખરાયેલો સામાન અને લોહીના ડાઘા જોઈને રાહદારીઓના કાળજા પણ કંપી ઉઠ્યા હતા.

મહેસાણા ઊંઝા હાઈવે અકસ્માત

ઊંઝા હાઈવે પર ઈકો કાર ડિવાઈડર સાથે અથડાતા અમદાવાદના કુમાવત પરિવારના 5 સભ્યોના કરુણ મોત

February 21, 2026 | 11:00 IST