સુરતમાં મિલકતની લાલચમાં પુત્રએ ઘરને જ આગ ચાંપી!

સુરત શહેરમાંથી માનવતા અને લોહીના સંબંધોને લજવતી એક ચોંકાવનારી ઘટના સામે આવી છે. નાનપુરાની જમરૂખગલીમાં મિલકત પચાવી પાડવાની હઠે ચઢેલા એક કળિયુગી પુત્રએ પોતાના જ પિતાના આશિયાનાને આગના હવાલે કરી દીધું હતું. પિતાએ રહેવા માટે ઘર આપવાનો ઇનકાર કરતા આવેશમાં આવેલા પુત્રએ મધરાતે પેટ્રોલ છાંટી આખું મકાન ભસ્મીભૂત કરી નાખ્યું હતું.

મિલકતનો વિવાદ

નાનપુરાના ગોવર્ધનવાડમાં રહેતા રિક્ષાચાલક ઉમેશભાઈ પટેલે પોતાના ઘરનો ગ્રાઉન્ડ ફ્લોર વિશાલ નામના શખ્સને સાઈન બોર્ડની દુકાન માટે ભાડે આપ્યો હતો. જોકે, ઉમેશભાઈનો પુત્ર સની પટેલ છેલ્લા ઘણા સમયથી ખોટા માર્ગે ચઢી ગયો હતો અને આ દુકાન ખાલી કરાવીને પચાવી પાડવા માંગતો હતો.

પિતાએ ભાડૂતને કાઢવાની ના પાડતા સનીએ અવારનવાર ઘર સળગાવી દેવાની ધમકી આપી હતી. ગત રાત્રે જ્યારે આખું ઘર અને મોહલ્લો નિદ્રાધીન હતો, ત્યારે સનીએ બારી વાટે પેટ્રોલ છાંટી આગ ચાંપી દીધી હતી.

₹18 લાખની મિલકત રાખમાં ફેરવાઈ આ આગ એટલી વિકરાળ હતી કે જોતજોતામાં દુકાન અને ઉપરના માળે આવેલું ઘર લપેટમાં આવી ગયું હતું. ફાયર બ્રિગેડની ટીમે ભારે જહેમત બાદ આગ પર કાબૂ મેળવ્યો હતો, પરંતુ ત્યાં સુધીમાં ભાડૂતનો ₹12 લાખનો સામાન અને ઘરનું ₹6 લાખનું સ્ટ્રક્ચર મળી કુલ ₹18 લાખનું નુકસાન થયું હતું.

પિતા ઉમેશભાઈએ હિંમત બતાવી પોતાના જ સગા પુત્ર વિરુદ્ધ અઠવાલાઇન્સ પોલીસ મથકે ફરિયાદ નોંધાવી હતી, જેના આધારે પોલીસે આરોપી સની પટેલની ધરપકડ કરી છે.

બદલાતી પેઢી અને ઘટી રહેલી સંવેદના આજની પેઢીમાં સંસ્કારોનું સિંચન ઘટ્યું હોય કે પછી રાતોરાત મિલકત મેળવી લેવાની લાલચ, આવા કિસ્સાઓ સમાજ માટે ચિંતાનો વિષય છે.

આવા સમાન કિસ્સામાં ગત અઠવાડિયે રાજકોટમાં મામૂલી મોબાઈલ પાસવર્ડ માટે જીવ આપતો કિશોર હોય કે સુરતમાં મિલકત માટે પિતાનું ઘર સળગાવતો યુવાન, આ ઘટનાઓ સાબિત કરે છે કે આજની નવી પેઢીમાં ધીરજનો અભાવ અને સંબંધો કરતા ભૌતિક સંપત્તિનું મહત્વ વધી રહ્યું છે.

જ્યારે સંતાનો જ માતા-પિતાની મહેનતની કમાણીને ક્રોધમાં હોમી દે ત્યારે સામાજિક મૂલ્યોના પતનનો ભય સ્પષ્ટ દેખાય છે.