જંગલેશ્વરમાં ગેરકાયદે ‘રેન્ટલ નેટવર્ક’નો પર્દાફાશ

રાજકોટના કુખ્યાત જંગલેશ્વર વિસ્તારમાં તંત્ર દ્વારા હાથ ધરવામાં આવેલા મેગા ડિમોલિશન પછી ગેરકાયદે ‘રેન્ટલ નેટવર્ક’ અને ગુનાહિત તત્વોના અભેદ ગઢનો સનસનીખેજ પર્દાફાશ થયો છે. પોલીસ તપાસમાં ખુલાસો થયો છે કે ૧૧ હિસ્ટ્રીશીટરોએ સરકારી જમીન પર ગેરકાયદેસર મકાનો અને ઓરડીઓ ખડકીને ભાડે આપીને લાખોની કમાણી કરી રહ્યા હતા. આ મિલકતોનો ઉપયોગ નશાના કાળા કારોબાર, જુગાર અને અન્ય ગુનાહિત પ્રવૃત્તિઓ માટે થતો હતો. ડિમોલિશનમાં ૮ મકાનો, ૯૭ ઓરડીઓ અને ૩ દુકાનો તોડી પાડવામાં આવ્યા છે, જેનાથી ગુનેગારોની આર્થિક કરોડરજ્જુ તોડી નાખવામાં આવી છે.

મિલકતો અને મુખ્ય આરોપીઓની વિગતો તપાસમાં રહેમત ઉર્ફે રામની જુણેજા પાસે ૩ આલીશાન મકાન અને ૪૮ રૂમોનું વિશાળ નેટવર્ક મળી આવ્યું છે. આ ઉપરાંત સમીર ઉર્ફે સંજલા પાસે ૧૬ રૂમો, અસીમ ઉમરેટા પાસે ૧૨ રૂમો, જાવેદ જુસેબ અને તોશીફ ઉમરેટા પાસે ૮-૮ રૂમો અને સમીર ઉર્ફે મૂર્ધા પઠાણ પાસે ૩ રૂમો મળી આવ્યા છે. DCP ક્રાઈમ બ્રાન્ચ જગદીશ બાંગરવાએ જણાવ્યું કે આ મિલકતોમાંથી મળતું ભાડું ગુનેગારોની આર્થિક તાકાત વધારતું હતું અને તેનો ઉપયોગ ગુનાહિત પ્રવૃત્તિઓને વેગ આપવા માટે કરવામાં આવતો હતો.

જંગલેશ્વરમાં ગુનાખોરીનો ડરામણો ચહેરો જંગલેશ્વર વિસ્તાર છેલ્લા લાંબા સમયથી નશાના કાળા કારોબાર માટે કુખ્યાત છે. તપાસમાં સામે આવ્યું કે અહીંથી ગાંજો, ચરસ, અફીણ અને અન્ય ડ્રગ્સનું વેચાણ થતું હતું. છેલ્લા ૧૦ વર્ષમાં અહીં દારૂના ૨૭૬ કેસ, જુગારના ૬૫ કેસ, હત્યાના ૪ અને હત્યાના પ્રયાસના ૩ બનાવો બન્યા છે. આ ઉપરાંત ૬૧ ગેરકાયદેસર હથિયારો પણ મળી આવ્યા છે, જે દર્શાવે છે કે આ વિસ્તાર ગુનેગારો માટે માત્ર રહેઠાણ જ નહીં પરંતુ હથિયાર અને નશાના કારોબારનું મુખ્ય કેન્દ્ર બની ગયું હતું.

મૂર્ઘા ગેંગ પર તંત્રનો સકંજો રાજકોટ ક્રાઈમ બ્રાન્ચે જંગલેશ્વરમાં સક્રિય કુખ્યાત મૂર્ઘા ગેંગ પર સકંજો કસ્યો છે. ગેંગના ૨૧ શખ્સો સામે ગુજસીટોક (GUJCTOC) હેઠળ ગુનો નોંધી કાર્યવાહી હાથ ધરાઈ છે. આ ગેંગ સામે છેલ્લા ૧૦ વર્ષમાં દારૂ-જુગાર સિવાયના ૩૬ ગંભીર ગુનાઓ નોંધાયા છે. તંત્ર દ્વારા છેલ્લા ૮ વર્ષમાં આ વિસ્તારના ૫૮ રીઢા ગુનેગારો સામે PASA હેઠળ પણ કાર્યવાહી કરવામાં આવી છે.

ડિમોલિશનની અસર અને ભવિષ્ય મેગા ડિમોલિશનથી જંગલેશ્વર વિસ્તારમાં ગુનાખોરીનું મૂળ તોડી નાખવામાં આવ્યું છે. પોલીસનું કહેવું છે કે આ કાર્યવાહીથી ગુનેગારોની આર્થિક તાકાત નબળી પડી છે અને વિસ્તારમાં શાંતિ સ્થાપિત થઈ રહી છે. જોકે, સ્થાનિક લોકોને વૈકલ્પિક આવાસ અને પુનર્વસનની વ્યવસ્થા કરવી પડશે. તંત્રે આવા અન્ય વિસ્તારોમાં પણ આવી કાર્યવાહી વધારવાનું વચન આપ્યું છે જેથી શહેરને ગુનામુક્ત બનાવી શકાય. આ ઘટના ગુનેગારો અને તંત્ર વચ્ચેના સંઘર્ષનું પ્રતીક બની છે અને તેના લાંબા ગાળાના પરિણામો જોવા મળશે.