ગુજરાતમાં બેવડી ઋતુનો અનુભવ

ગુજરાતમાં હાલમાં બેવડી ઋતુનો અનુભવ થઈ રહ્યો છે, જ્યાં રાત્રે અને વહેલી સવારે સામાન્ય ઠંડી અનુભવાય છે, જ્યારે બપોરના સમયે ઉનાળાના પ્રારંભ જેવી ગરમીનો અહેસાસ થાય છે. ભારતીય હવામાન વિભાગ (IMD) દ્વારા આજે (9 ફેબ્રુઆરી, 2026) અને આગામી 7 દિવસ સુધી રાજ્યમાં સુષ્ક અને સામાન્ય હવામાન રહેશે તેવી આગાહી કરવામાં આવી છે. લઘુત્તમ તાપમાનમાં કોઈ મોટો ફેરફાર જોવા મળશે નહીં, અને વરસાદની કોઈ શક્યતા નથી.

હવામાન વિભાગની વિગતવાર આગાહી અનુસાર, હાલમાં પ્રદેશના નીચલા સ્તરે ઉત્તર-પૂર્વથી પૂર્વ દિશાના પવનો ફૂંકાઈ રહ્યા છે. આ પવનોને કારણે વાતાવરણમાં થોડો ફેરફાર જોવા મળી રહ્યો છે, પરંતુ અમદાવાદમાં આજે આકાશ મુખ્યત્વે સ્વચ્છ રહેવાની શક્યતા છે, જ્યાં લઘુત્તમ તાપમાન 16 ડિગ્રી સેલ્સિયસ આસપાસ રહેશે. આગામી દિવસોમાં વાતાવરણમાં કોઈ ખાસ મોટો ફેરફાર થવાની સંભાવના નથી. આ વખતે લોકોને ઠંડીનો અનુભવ ઓછો થયો છે તેનું મુખ્ય કારણ એ છે કે સામાન્ય રીતે આવતા ઉત્તર દિશાના ઠંડા પવનો લાંબા સમય સુધી ટકી શક્યા નથી. જો ઠંડા પવનો આવ્યા પણ હોય તો તે માત્ર એકાદ દિવસ પૂરતા જ હતા, ત્યારબાદ ફરીથી ઉત્તર-પૂર્વથી પૂર્વના પવનો શરૂ થઈ ગયા હતા, જેના પરિણામે તાપમાનમાં કોઈ મોટો ઘટાડો જોવા મળ્યો નથી.

અરબી સમુદ્રમાં ચક્રવાત પરિભ્રમણ નબળું પડી ગયું છે, અને મન્નારના અખાત પર સક્રિય ઉપલા સ્તરનું ચક્રવાત પરિભ્રમણ ગઈકાલે નબળું પડી ગયું છે, જેની અસર ઓછી થઈ ગઈ છે. દરમિયાન, દક્ષિણ અને પશ્ચિમ-મધ્ય અરબી સમુદ્ર, માલદીવ અને કોમોરિન વિસ્તારમાં છૂટાછવાયા નીચાથી મધ્યમ વાદળો છવાયેલા છે, જેમાં નબળાથી મધ્યમ સંવહન સક્રિય છે. જોકે, આની અસર ગુજરાત પર નહિવત છે, અને રાજ્યમાં 13મી ફેબ્રુઆરી સુધી હવામાન શુષ્ક રહેશે.

હવામાન નિષ્ણાતોના જણાવ્યા અનુસાર, 10થી 12 ફેબ્રુઆરી દરમિયાન સૌરાષ્ટ્ર, ગુજરાત અને કચ્છમાં તાપમાનમાં થોડો ઘટાડો શક્ય છે, છતાં આગાહી સમયમાં તાપમાન સામાન્ય કરતાં વધુ જ રહેશે. ઉત્તર ભારતમાં પશ્ચિમી વિક્ષોભની અસર જોવા મળી રહી છે, જેના કારણે ત્યાં ઠંડી અને વરસાદની શક્યતા છે, પરંતુ ગુજરાતમાં તેની અસર ઓછી છે. આ બદલાતા હવામાનને કારણે શરદી અને વાયરલ ચેપનું જોખમ વધી જાય છે, તેથી લોકોએ સાવચેતી રાખવી જોઈએ.

છેલ્લા ત્રણ દિવસમાં રાજ્યના વિવિધ શહેરોમાં મહત્તમ અને લઘુત્તમ તાપમાનના આંકડા નીચે મુજબ છે:

મહત્તમ તાપમાન (ડિગ્રી સેલ્સિયસમાં):

અમદાવાદ 32 32.5 32.6 ડીસા 33.1 33.5 32.8 ગાંધીનગર 31.5 31.8 32.4 વલ્લભ વિદ્યાનગર 30.1 33.3 32.7 વડોદરા 33.6 33 33.4 સુરત 35.4 35.3 34.2 ભુજ 33.3 33 33.5 નલિયા 34.5 32.6 32.5 કંડલા પોર્ટ 33.3 32.5 33.7 અમરેલી 33.5 32.1 32.9 ભાવનગર 32.3 31.1 31.8 દ્વારકા 31.8 30.5 30.8 ઓખા 27.2 28.4 26.8 પોરબંદર 32.4 33.2 32.4 રાજકોટ 35 35 34.2 વેરાવળ 29.4 28.4 32.2 સુરેન્દ્રનગર 33.2 33 33.2 મહુવા 32.8 33.2 32.6 કેશોદ 33.4 33.2 33.9

લઘુત્તમ તાપમાન (ડિગ્રી સેલ્સિયસમાં):

  અમદાવાદ 18.8 19 16.2 ડીસા 16.3 14.8 13.4 ગાંધીનગર 18.5 18.8 15.2 વલ્લભ વિદ્યાનગર 17.8 18.2 17 વડોદરા 18 17.2 17 સુરત 19 18.8 18.4 ભુજ 17.2 17.8 16.8 નલિયા 14.3 13.2 11.8 કંડલા પોર્ટ 18.5 17.5 16.4 અમરેલી 16.2 15.6 16 ભાવનગર 18.8 19.4 16.7 દ્વારકા 19 19 18.6 ઓખા 19.4 18.6 18 પોરબંદર 14.3 16.5 15.4 રાજકોટ 17.8 17.2 17.5 વેરાવળ 19.2 17.9 19.9 સુરેન્દ્રનગર 19.8 19 17 મહુવા 17.3 17.5 16.5 કેશોદ 16.2 14.3 15.8

 

આજના વર્તમાન તાપમાન અનુસાર, અમદાવાદમાં 31.2°C, વડોદરામાં 30.8°C, સુરતમાં 31.6°C અને રાજકોટમાં 32.2°C નોંધાયું છે. હવામાન વિભાગે લોકોને આ બદલાતા વાતાવરણમાં સ્વાસ્થ્યની કાળજી લેવાની સલાહ આપી છે, કારણ કે મિશ્ર હવામાનથી વાયરલ કેસોમાં વધારો થઈ શકે છે.