Kheda ONGC Pipeline Crude Oil Theft Gang Busted: ગુજરાતમાં ONGCની ક્રૂડ ઓઇલ પાઇપલાઇનમાંથી તેલ ચોરી કરવાના કૌભાંડનો ગુજરાત ATSએ પર્દાફાશ કર્યો છે. ખેડા જિલ્લાના સારસા ખાતે આવેલા ONGCના ઓઇલ કૂવામાંથી ક્રૂડ ઓઇલ ચોરી કરીને અમદાવાદમાં ખાલી કરવામાં આવતું હોવાની બાતમીના આધારે ATSએ વટવા-વિંઝોલ રિંગ રોડ પાસે આવેલા પાર્કિંગ પ્લોટમાં દરોડો પાડ્યો હતો. આ કાર્યવાહી દરમિયાન કુલ 6 આરોપીઓને ઝડપી લેવામાં આવ્યા છે. પોલીસે 8,000 લિટર ક્રૂડ ઓઇલ, ટેન્કર, આઇસર ટ્રક સહિતનો મુદ્દામાલ કબજે કર્યો છે.
ATSને મળી બાતમી, અમદાવાદના પાર્કિંગ પ્લોટમાં દરોડો
ગુજરાત ATSના DYSP એસ. એલ. ચૌધરીને બાતમી મળી હતી કે દાણીલીમડા વિસ્તારના કેટલાક શખસો અને ONGCમાં કોન્ટ્રાક્ટ પર કામ કરતો કર્મચારી મળીને ONGCની પાઇપલાઇનમાંથી ક્રૂડ ઓઇલની ચોરી કરી રહ્યા છે. ચોરી કરેલું તેલ અમદાવાદના વટવા-વિંઝોલ રિંગ રોડ પર પંચરત્ન ફ્લોરા ફ્લેટની પાછળ આવેલા હેપ્પીભાઈ ભરવાડના પાર્કિંગ પ્લોટમાં લાવવામાં આવતું હોવાની માહિતી મળી હતી. આ બાતમીના આધારે ગુજરાત ATSએ પાંચ PSI અને અન્ય પોલીસ કર્મચારીઓની ટીમ બનાવી પાર્કિંગ પ્લોટમાં દરોડો પાડ્યો હતો. દરોડા દરમિયાન ONGC લખેલા ટેન્કરમાંથી આઇસર ટ્રકમાં રાખેલા ટાંકામાં પાઇપ મારફતે ક્રૂડ ઓઇલ ખાલી કરવામાં આવતું હોવાનું સામે આવ્યું હતું. સ્થળ પરથી કુલ છ શખસોને ઝડપી લેવામાં આવ્યા હતા.
ONGCના ઓઇલ કૂવા નંબર 26માંથી 8 હજાર લિટર ક્રૂડ ઓઇલની ચોરી
ATSની પ્રાથમિક પૂછપરછમાં આરોપીઓએ ખેડા જિલ્લાના સારસા ખાતે આવેલા ONGCના ઓઇલ કૂવા નંબર 26માંથી ક્રૂડ ઓઇલ ચોરી કરીને વેચાણ માટે લાવ્યા હોવાની માહિતી સામે આવી છે. આરોપીઓએ કેશિંગ વાલ્વ અને ફાઇટર પંપની મદદથી આશરે 8,000 લિટર ક્રૂડ ઓઇલ કાઢ્યું હોવાની વિગતો તપાસમાં સામે આવી છે. ચોરી કરેલું ક્રૂડ ઓઇલ ONGC લખેલા ટેન્કરમાં ભરી અમદાવાદ લાવવામાં આવ્યું હતું અને ત્યારબાદ તેને આઇસર ટ્રકમાં ખાલી કરવામાં આવી રહ્યું હતું. આ દરમિયાન ગુજરાત ATSએ દરોડો પાડીને સમગ્ર કથિત ચોરીનો પર્દાફાશ કર્યો હતો. તપાસ દરમિયાન ટેન્કરમાંથી 4,500 લિટર અને આઇસર ટ્રકમાંથી 3,500 લિટર ક્રૂડ ઓઇલ મળી આવ્યું હતું. કુલ 8,000 લિટર ક્રૂડ ઓઇલ પોલીસે જપ્ત કર્યું છે.
ONGCના કોન્ટ્રાક્ટ કર્મચારી સહિત 6 આરોપીઓ ઝડપાયા
ગુજરાત ATSએ આ કેસમાં ગફ્ફાર અબ્દુલભાઈ રંગરેજ (ઉંમર 61), મોહસીન રફીકભાઈ રંગરેજ (ઉંમર 35), મોહમદ જાવેદ મોહમદ સાબીર રંગરેજ (ઉંમર 44), ભીખા કાળાભાઈ ચૌહાણ (ઉંમર 46), નસીરૂદ્દીન ઉર્ફે વિકી તાજુદ્દીન મલેક (ઉંમર 42) અને રાયસંગ બચુભાઈ ઠાકોર (ઉંમર 40)ની ધરપકડ કરી છે. આરોપીઓમાં અમદાવાદના દાણીલીમડા, ચંડોળા તળાવ, સરખેજ અને ખેડા જિલ્લાના મહીજ ગામના રહેવાસીઓનો સમાવેશ થાય છે. નસીરૂદ્દીન ઉર્ફે વિકી મલેક ONGCમાં કોન્ટ્રાક્ટ કર્મચારી હોવાનું સામે આવ્યું છે. તપાસમાં તેની ભૂમિકા સહિત અન્ય આરોપીઓ વચ્ચેની કથિત સાંઠગાંઠ અંગે વધુ વિગતો મેળવવામાં આવી રહી છે.
ક્રૂડ ઓઇલ ચોરી કૌભાંડમાં વધુ તપાસ હાથ ધરાઈ
ગુજરાત ATS દ્વારા ઝડપાયેલા છ આરોપીઓની પૂછપરછ કરીને ક્રૂડ ઓઇલ ચોરીના નેટવર્ક, ચોરી કરેલા તેલના વેચાણ, અન્ય સંડોવાયેલા શખસો અને આ કૌભાંડ કેટલા સમયથી ચાલતું હતું તે સહિતના મુદ્દાઓની તપાસ કરવામાં આવી રહી છે. ONGCની પાઇપલાઇનમાંથી ક્રૂડ ઓઇલ ચોરી કરીને તેનું વેચાણ કરવાના કથિત કૌભાંડમાં વધુ ખુલાસા થવાની શક્યતા છે.