bjpનો માસ્ટર પ્લાન અને કોંગ્રેસની જન આક્રોશ યાત્રા

ગુજરાતની 15મી વિધાનસભાના બજેટ સત્રનો આજથી પ્રારંભ થઈ રહ્યો છે, જે રાજ્યના રાજકારણમાં ગરમાવો લાવનારું સાબિત થશે. સત્રના પ્રથમ દિવસે જ રાજ્યપાલના આભાર પ્રસ્તાવ બાદ વિધાનસભાના ઉપાધ્યક્ષ પદ માટે મહત્વપૂર્ણ ચૂંટણી યોજાવા જઈ રહી છે. આ પ્રતિષ્ઠાભર્યા જંગમાં BJP તરફથી પૂર્ણેશ મોદીએ ઉમેદવારી નોંધાવી છે, જ્યારે કોંગ્રેસ પક્ષ તરફથી શૈલેષ પરમાર મેદાનમાં છે. સત્રની શરૂઆત પૂર્વે જ બન્ને પક્ષોએ પોતપોતાની રણનીતિ ઘડવા માટે બેઠકોનો દોર શરૂ કરી દીધો છે, જેનાથી સ્પષ્ટ થાય છે કે આગામી દિવસોમાં ગૃહમાં ભારે રકઝક જોવા મળી શકે છે.

વિપક્ષને હાવી ન થવા દેવા માટે સત્તાધારી પક્ષ સજ્જ

મુખ્યમંત્રી ભૂપેન્દ્ર પટેલ અને પ્રદેશ પ્રમુખ જગદીશ વિશ્વકર્માની હાજરીમાં વિધાનસભાના ચોથા માળે શાસક પક્ષના ખંડમાં એક હાઈ-પ્રોફાઈલ બેઠક યોજાવાની છે. આ બેઠકનો મુખ્ય હેતુ વિપક્ષ દ્વારા ઉઠાવવામાં આવનારા સંભવિત આક્ષેપો અને પ્રશ્નોનો જડબાતોડ જવાબ આપવા માટેનો 'માસ્ટર પ્લાન' તૈયાર કરવાનો છે. ભાજપ તેના મંત્રીઓ અને ધારાસભ્યોને સરકારની જનકલ્યાણકારી યોજનાઓ અને વિકાસકામોને ગૃહમાં મજબૂતીથી રજૂ કરવા માટે વિગતવાર માર્ગદર્શન આપશે. ખાસ કરીને બજેટ સત્ર દરમિયાન વિપક્ષને કોઈ પણ મુદ્દે હાવી ન થવા દેવા માટે સત્તાધારી પક્ષ સજ્જ દેખાઈ રહ્યો છે.

લોકહિતના મુદ્દાઓ પર જવાબ માંગવા કોંગ્રેસના ધારાસભ્યો મક્કમ

બીજી તરફ, વિપક્ષ કોંગ્રેસે પણ મર્યાદિત સંખ્યાબળ હોવા છતાં સરકારને ભીંસમાં લેવા માટે કમર કસી છે. કોંગ્રેસ કાર્યાલય ખાતે ધારાસભ્યોની બેઠકમાં ભ્રષ્ટાચાર, વિવિધ ગેરરીતિઓ અને રાજ્યમાં તૂટતા બ્રિજ જેવા ગંભીર મુદ્દે સરકારને ઘેરવાની વ્યૂહરચના બનાવવામાં આવશે. પ્રજાના પ્રશ્નોને વાચા આપવા માટે કોંગ્રેસ દ્વારા 'જન આક્રોશ યાત્રા'નું પણ આયોજન કરવામાં આવ્યું છે. લોકહિતના મુદ્દાઓ પર સરકાર પાસે જવાબ માંગવા કોંગ્રેસના ધારાસભ્યો મક્કમ જણાય છે, જે આ બજેટ સત્રને વધુ સંઘર્ષમય બનાવશે.

18 ફેબ્રુઆરીએ રાજ્યનું વર્ષ 2026-27નું બજેટ રજૂ કરાશે

સંસદીય કાર્ય મંત્રી ઋષિકેશ પટેલે માહિતી આપી હતી કે, આગામી 18 ફેબ્રુઆરીએ રાજ્યનું વર્ષ 2026-27નું બજેટ રજૂ કરવામાં આવશે. આ બજેટ છેવાડાના માનવીથી લઈને ઉદ્યોગ જગત સુધીના તમામ વર્ગોને સંતોષનારૂં અને ગુજરાતના સર્વાંગી વિકાસને વેગ આપનારૂં હશે તેવો દાવો સરકારે કર્યો છે. નાયબ મુખ્યમંત્રી હર્ષ સંઘવીએ પણ તમામ પક્ષોને રાજકીય ટીકાઓ છોડીને વિકાસલક્ષી ચર્ચાઓમાં સહભાગી થવા અપીલ કરી છે. આ સાથે જ તેમણે અમદાવાદ અને વડોદરાની શાળાઓમાં મળેલ બોમ્બની ધમકી અંગે કડક તપાસના આદેશો આપી પોલીસ કમિશનરો આ મામલે ઝીણવટભરી તપાસ કરી રહ્યા હોવાનું જણાવ્યું હતું. આમ, આ બજેટ સત્ર વિકાસ અને વિવાદ બંનેનો સંગમ બની રહેશે.