અમદાવાદ શહેરના વેજલપુર વિસ્તારમાં આવેલી બકેરી સિટી પાસેના કૃષ્ણનગર રો-હાઉસમાં મોડી રાત્રે એક હૃદયદ્રાવક ઘટના બની છે. મધરાતે જ્યારે આખો પરિવાર ગાઢ નિદ્રામાં હતો, ત્યારે અચાનક લાગેલી ભીષણ આગમાં પિતા અને તેમના નવ વર્ષના માસૂમ પુત્રનું મોત નિપજ્યું છે. આ દુર્ઘટનામાં પરિવારના અન્ય ત્રણ સભ્યોનો ચમત્કારિક બચાવ થયો છે.
ભરનિદ્રામાં લાગેલી આગ અને ગુંગળામણ :&nbsp;
ઘટનાની વિગત મુજબ, વેજલપુરના મકરબા રોડ પર સ્થિત કૃષ્ણનગર રો-હાઉસમાં ગોહિલ પરિવાર રહે છે. સોમવાર અને મંગળવારની મધ્યરાત્રિએ આશરે સાડા ત્રણ વાગ્યાના અરસામાં મકાનના નીચેના ભાગમાં આગ ફાટી નીકળી હતી. થોડી જ વારમાં ધુમાડો આખા ઘરમાં ફેલાઈ ગયો હતો. ધુમાડાના કારણે શ્વાસ લેવામાં તકલીફ પડતા ઘરના મહિલા સભ્ય જાગી ગયા હતા, પરંતુ ત્યાં સુધીમાં આગે વિકરાળ સ્વરૂપ ધારણ કરી લીધું હતું.
બચાવવા માટેના નિષ્ફળ પ્રયાસો :&nbsp;
મૃતક ધ્રુવભાઈના પત્ની મિતલબેને પોતાના પતિ અને પુત્ર શાશ્વતને બચાવવા માટે અથાગ પ્રયત્નો કર્યા હતા. રૂમમાં ગાઢ અંધારું અને કાળાધબ્બ ધુમાડાને કારણે કંઈ પણ જોવું મુશ્કેલ હતું. મિતલબેને ધ્રુવભાઈને જગાડવાનો પ્રયાસ કર્યો હતો, પરંતુ ધુમાડાની અસરને કારણે તેઓ ભાન ગુમાવી ચૂક્યા હતા. મિતલબેન ભારે જહેમત બાદ પતિને બાજુના રૂમ સુધી ખેંચી લાવ્યા હતા, પરંતુ પુત્ર શાશ્વત ધુમાડામાં ક્યાંય ખોવાઈ ગયો હતો. અંતે, ગુંગળામણ વધતા મિતલબેન, તેમના સાસુ અને પુત્રી બાલ્કની મારફતે પડોશીના મકાનમાં જઈને નીચે ઉતરી ગયા હતા અને જીવ બચાવ્યો હતો.
ફાયર બ્રિગેડની કામગીરી અને શોર્ટ સર્કિટનું અનુમાન :&nbsp;
સ્થાનિક લોકોએ તત્કાલ ફાયર બ્રિગેડ અને 108 એમ્બ્યુલન્સને જાણ કરી હતી. ફાયર વિભાગની બેથી વધુ ગાડીઓ ઘટનાસ્થળે પહોંચી હતી અને પાણીનો મારો ચલાવી આગ પર કાબૂ મેળવ્યો હતો. ફાયર ફાયટરોએ મકાનમાં ફસાયેલા ધ્રુવભાઈ અને 9 વર્ષીય શાશ્વતને બેભાન હાલતમાં બહાર કાઢ્યા હતા. બંનેને તાત્કાલિક સોલા સિવિલ હોસ્પિટલ ખસેડવામાં આવ્યા હતા, જ્યાં ફરજ પરના તબીબોએ તેમને મૃત જાહેર કર્યા હતા. પ્રાથમિક તપાસમાં આગ લાગવાનું કારણ ઈલેક્ટ્રિક શોર્ટ સર્કિટ હોવાનું મનાઈ રહ્યું છે.
પોલીસ તપાસ ચાલુ :&nbsp;
વેજલપુર પોલીસ પણ ઘટનાસ્થળે પહોંચી હતી અને અકસ્માત મોતનો ગુનો નોંધી વધુ તપાસ હાથ ધરી છે. એફએસએલ (FSL)ની મદદથી આગનું ચોક્કસ કારણ જાણવા માટેના પ્રયાસો શરૂ કરવામાં આવ્યા છે. પિતા-પુત્રના એકસાથે મોતના સમાચારથી સમગ્ર સોસાયટી અને વેજલપુર વિસ્તારમાં શોકનું મોજું ફરી વળ્યું છે.

અમદાવાદ વેજલપુર આગની ઘટના

કૃષ્ણનગર રો-હાઉસમાં શોર્ટ સર્કિટથી ફાટી નીકળેલી આગમાં આખો પરિવાર હોમાયો; ત્રણનો બચાવ

February 24, 2026 | 14:30 IST