Ahmedabad માં પ્લેન ઇન્ટર્ન ડોક્ટર્સની હોસ્ટેલ પર પડ્યું, સફેદ કફન ખૂટતાં મહિલાઓએ સાડીઓ આપી!

આજે બપોરે અમદાવાદમાં બનેલી વિમાન દુર્ઘટનાએ શહેરને સ્તબ્ધ કરી દીધું છે. એર ઇન્ડિયાનું પ્લેન AI171 સિવિલ હોસ્પિટલ નજીક, ખાસ કરીને અતુલ્ય બિલ્ડિંગ 1, 2, 3, 4 – જ્યાં રેસિડેન્ટ અને ઇન્ટર્ન ડોક્ટર્સ રહેતા હતા – ત્યાં ભયાવહ રીતે તૂટી પડ્યું છે. આ ઘટનાએ માત્ર ઇમારતોને જ નહીં, પરંતુ માનવતાના હૃદયને પણ ચીરી નાખ્યું છે.

પ્લેન ધડાકાભેર પડતાની સાથે જ આગનો વિકરાળ ગોળો ફાટી નીકળ્યો હતો, જેના કારણે ઘટનાસ્થળે પહોંચેલા બચાવકર્મીઓ પણ કંપારી ઉઠ્યા હતા. આગની ભયાવહતા એટલી હતી કે અનેક દેહના ટુકડા થઈ ગયા હતા, જેના કારણે મૃતદેહોની ઓળખ કરવી અશક્ય બની ગઈ છે. આ દ્રશ્યો એટલા હૃદયદ્રાવક છે કે તેને શબ્દોમાં વર્ણવવા પણ મુશ્કેલ છે.

આ દુર્ઘટનાની ભયાનકતાના કારણે રાહત અને બચાવ કામગીરીમાં પણ ભારે પડકારોનો સામનો કરવો પડ્યો. સ્થિતિ એટલી કફોડી બની હતી કે સ્ટ્રેચર, સફેદ કપડાં અને કફન ખૂટી પડ્યા. આવા કપરા સમયે, માનવતાના દર્દને પારખીને મહિલાઓએ પોતાની સાડીઓ અને દુપટ્ટા કાઢીને પીડિતોને ઢાંકવા આપવા પડ્યા. આ દ્રશ્યોએ દરેકની આંખોમાં આંસુ લાવી દીધા.

આ પણ વાંચો : કાળમુખો અકસ્માત, Ahmedabad માં પ્લેન ક્રેશ, બ્રિટન-કેનેડા-પોર્ટુગલના નાગરિકો પણ ભોગ બન્યા!

આગ બુઝાવવા માટે ફાયર બ્રિગેડની ટીમો સતત પ્રયાસ કરતી હતી, પરંતુ પાણીના ટેન્ક વારંવાર ખાલી થઈ જતા હતા અને તેમને પાણી ભરવા માટે સતત પાછા જવું પડતું હતું, જેના કારણે આગને કાબૂમાં લેવામાં વિલંબ થયો.

આ પણ વાંચો : ઈતિહાસનું પુનરાવર્તન? Ahmedabad એ 1988 માં જોઈ હતી આવી જ ભયાવહ વિમાન દુર્ઘટના, 133 ના ગયા હતા જીવ!

ટ્રેજેડી એટલી મોટી હતી કે મૃતદેહો ઓળખી શકાય તેમ નહોતા. તાત્કાલિક ધોરણે તમામ ઉપલબ્ધ એમ્બ્યુલન્સ અને ખાનગી વાહનોને કામે લગાડવામાં આવ્યા જેથી ઇજાગ્રસ્તો અને મૃતદેહોને હોસ્પિટલ પહોંચાડી શકાય. અમદાવાદ પર આજે જાણે આકાશમાંથી કાળ તૂટી પડ્યો છે, અને આ ઘટનાએ સમગ્ર દેશને શોકમાં ગરકાવ કરી દીધો છે. આ ભયાવહ દુર્ઘટનાના મૂળ કારણોની સઘન તપાસ થવી જોઈએ અને જવાબદારોને સજા થવી જોઈએ.

આ પણ વાંચો : Ahmedabad : પ્લેન 1.38 વાગ્યે ટેકઓફ થયું અને 1.40 વાગ્યે ક્રેશ થયું, જુઓ Video