Ahmedabad  : પ્લેન 1.38 વાગ્યે ટેકઓફ થયું અને 1.40 વાગ્યે ક્રેશ થયું, જુઓ Video

આજે બપોરે અમદાવાદ શહેર એક ભયાવહ વિમાન દુર્ઘટનાનો સાક્ષી બન્યું હતું. પ્રાપ્ત માહિતી અનુસાર, લંડન જતી એર ઈન્ડિયાની ફ્લાઈટ AI171 અમદાવાદ એરપોર્ટ પરથી ઉડાન ભર્યાના ગણતરીની મિનિટોમાં જ મેઘાણીનગર નજીક ધડાકાભેર ક્રેશ થઈ હતી. આ ઘટનાને પગલે સમગ્ર વિસ્તારમાં ભારે નાસભાગ અને અફરાતફરીનો માહોલ સર્જાયો હતો.

પ્રાથમિક અહેવાલો મુજબ, આ પ્લેનમાં અંદાજે 200 થી વધુ મુસાફરો સવાર હતા અને તેમાં કાર્ગો પણ હતું. પ્લેન ક્રેશ થતા જ ઘટનાસ્થળેથી ધુમાડાના ગુડગુડાટ આકાશમાં છવાઈ ગયા હતા, જે દૂર દૂરથી દ્રશ્યમાન થતા હતા. આ દુર્ઘટના રહેણાંક વિસ્તારની નજીક બની હોવાથી જાનહાનિનો આંકડો મોટો હોવાની આશંકા સેવાઈ રહી છે, જોકે સત્તાવાર આંકડા હજુ જાહેર કરાયા નથી.

ઘટનાની જાણ થતા જ મુખ્યમંત્રી તાબડતોબ સુરતથી અમદાવાદ જવા રવાના થયા હતા. કેન્દ્રીય ગૃહમંત્રી અમિત શાહે પણ રાજ્યના DGP સાથે ટેલિફોનિક વાતચીત કરીને સમગ્ર પરિસ્થિતિની વિગતવાર માહિતી મેળવી હતી અને તાત્કાલિક રાહત તથા બચાવ કામગીરી હાથ ધરવા સૂચના આપી હતી. નેશનલ સિક્યુરિટી ગાર્ડ (NSG) ની ટીમ પણ તાત્કાલિક ધોરણે ઘટનાસ્થળે પહોંચી ગઈ છે અને રાહત-બચાવ કાર્યમાં જોડાઈ ગઈ છે.

આ પણ વાંચો : મેઘાણીનગર IGP ગ્રાઉન્ડમાં પ્લેન ક્રેશ થયું, પ્લેનમાં 242 લોકો હતા સવાર

હાલ ફાયર બ્રિગેડ, પોલીસ, NDRF, અને સ્થાનિક પ્રશાસનની ટીમો દ્વારા યુદ્ધના ધોરણે બચાવ કામગીરી ચાલી રહી છે. ઈજાગ્રસ્તોને તાત્કાલિક હોસ્પિટલ ખસેડવામાં આવી રહ્યા છે. આ ભયાવહ દુર્ઘટનાનું કારણ જાણવા માટે ડિરેક્ટોરેટ જનરલ ઓફ સિવિલ એવિએશન (DGCA) દ્વારા ઊંડાણપૂર્વક તપાસ હાથ ધરવામાં આવશે. આ દુર્ઘટનાએ સમગ્ર દેશમાં શોક અને ચિંતાની લાગણી ફેલાવી દીધી છે.

આ પણ વાંચો : AMC ની ઘોર બેદરકારી, જળકુંભીમાં ફસાઈ જગન્નાથજીની જળયાત્રા, મેયર સહિતને જવાનોનો સહારો લેવો પડ્યો...