અમદાવાદ એરપોર્ટ: મુસાફરના પેટમાંથી સોનું ઝડપાયું

ગુજરાતના અમદાવાદ ઇન્ટરનેશનલ એરપોર્ટ પર સોનાની દાણચોરીનો એક અત્યંત ચોંકાવનારો અને જીવલેણ કિસ્સો સામે આવ્યો છે. કસ્ટમ્સ વિભાગના એર ઇન્ટેલિજન્સ યુનિટ (AIU) એ સતર્કતા દાખવીને એક ભારતીય મુસાફરની ધરપકડ કરી છે, જેણે પોતાના શરીરમાં સોનાની કેપ્સ્યુલ્સ છુપાવીને સ્મગલિંગ કરવાનો પ્રયાસ કર્યો હતો.

ચોક્કસ બાતમી અને મુસાફરની અટકાયત : 

આ ઘટના 19 ફેબ્રુઆરીના રોજ બની હતી. અબુ ધાબીથી એર અરેબિયાની ફ્લાઈટ નંબર 3L 111 દ્વારા અમદાવાદ ઉતરેલા શાહરુખ નામના મુસાફર પર કસ્ટમ્સ અધિકારીઓને શંકા ગઈ હતી. એડવાન્સ પેસેન્જર ઇન્ફોર્મેશન સિસ્ટમ (APIS) પ્રોફાઇલિંગ દ્વારા મળેલી ચોક્કસ બાતમીના આધારે અધિકારીઓએ આ મુસાફરને અટકાવ્યો હતો. શરૂઆતમાં મુસાફરે અધિકારીઓને ગેરમાર્ગે દોરવાનો પ્રયાસ કર્યો હતો, પરંતુ કડક પૂછપરછ દરમિયાન તેણે કબૂલાત કરી હતી કે તેણે સોનાની કેપ્સ્યુલ્સ ગળીને પેટમાં છુપાવી છે.

હોસ્પિટલમાં મેડિકલ તપાસ અને રિકવરી પ્રોસેસ : 

મુસાફરની કબૂલાત બાદ કસ્ટમ્સ વિભાગે કાયદેસરની પ્રક્રિયા હાથ ધરી હતી. ચીફ જ્યુડિશિયલ મેજિસ્ટ્રેટની મંજૂરી મેળવ્યા બાદ મુસાફરને તાત્કાલિક અમદાવાદની સિવિલ હોસ્પિટલમાં ખસેડવામાં આવ્યો હતો. ત્યાં કરવામાં આવેલા એક્સ-રે રિપોર્ટમાં તેના પેટમાં શંકાસ્પદ વસ્તુઓ હોવાની પુષ્ટિ થઈ હતી. ડોક્ટરોની દેખરેખ હેઠળ મુસાફરના શરીરમાંથી કુદરતી પ્રક્રિયા દ્વારા કુલ 4 શંકાસ્પદ વસ્તુઓ બહાર કાઢવામાં આવી હતી.

જપ્ત કરાયેલા સોનાની કિંમત અને વિગત : 

સરકારી મૂલ્યાંકનકાર દ્વારા કરવામાં આવેલી તપાસમાં બહાર આવ્યું કે, રિકવર કરાયેલી 4 વસ્તુઓ પૈકી 3 પીળા રંગની નળાકાર કેપ્સ્યુલ્સમાં 24 કેરેટ શુદ્ધ સોનું હતું. આ સોનાનું કુલ વજન 135.200 ગ્રામ નોંધાયું છે, જેની બજાર કિંમત અંદાજે 21,89,564 રૂપિયા આંકવામાં આવી છે. જ્યારે ચોથી વસ્તુ લોખંડનો ગોળો હોવાનું માલૂમ પડ્યું હતું.

કસ્ટમ્સ એક્ટ હેઠળ કાયદેસરની કાર્યવાહી : 

કસ્ટમ્સ વિભાગે કસ્ટમ્સ એક્ટ, 1962ની વિવિધ કલમો હેઠળ સોનું જપ્ત કરી લીધું છે અને આરોપી શાહરુખની ધરપકડ કરી છે. એર ઇન્ટેલિજન્સ યુનિટ હવે એ દિશામાં તપાસ કરી રહ્યું છે કે આ દાણચોરી પાછળ કઈ મોટી ગેંગનો હાથ છે અને સોનું કોને પહોંચાડવાનું હતું. એરપોર્ટ પર કડક ચેકિંગ હોવા છતાં, દાણચોરો દ્વારા પોતાના જીવને જોખમમાં મૂકીને અપનાવવામાં આવતી આવી પદ્ધતિઓએ સુરક્ષા એજન્સીઓને પણ વિચારતી કરી દીધી છે.