રાજકોટ જિલ્લાના જેતપુર પાસે આવેલા જેતલસર જંકશન રેલવે બ્રિજ પર રવિવારે વહેલી સવારે એક ભયાનક માર્ગ અકસ્માત સર્જાયો હતો. જૂનાગઢ ભવનાથ ખાતે મહાશિવરાત્રીનો મેળો માણીને પરત ફરી રહેલા ચાર મિત્રોની કાર કાબૂ બહાર જઈ પુલના સ્ટ્રક્ચર સાથે ધડાકાભેર અથડાઈ હતી.
આ ટક્કર એટલી પ્રચંડ હતી કે કારના પતરાં ચીરાઈ ગયા હતા અને કાર બે ભાગમાં વહેંચાઈ ગઈ હતી.
ઘટનાની વિગતો&nbsp;
રવિવારની વહેલી સવારે જ્યારે આ મિત્રો જૂનાગઢથી પરત ફરી રહ્યા હતા, ત્યારે જેતલસર બ્રિજ પર ડ્રાઈવરે સ્ટેયરિંગ પરથી કાબૂ ગુમાવ્યો હતો. આ દુર્ઘટનામાં રાયડી ગામની 21 વર્ષીય મુસ્કાન બગડા અને નવાગઢના 20 વર્ષીય અરુણ વાળાનું ઘટનાસ્થળે જ કમકમાટીભર્યું મોત નીપજ્યું હતું. અન્ય એક મિત્ર જયદીપ ચૌહાણને ગંભીર હાલતમાં જેતપુર સિવિલ હોસ્પિટલ ખસેડવામાં આવ્યો હતો, પરંતુ ટૂંકી સારવાર બાદ તેણે પણ દમ તોડ્યો હતો.
આ અકસ્માતમાં અમિત પરમાર નામનો યુવાન ગંભીર રીતે ઇજાગ્રસ્ત થયો છે, જે હાલ જૂનાગઢની હોસ્પિટલમાં જીવન-મરણ વચ્ચે ઝોલા ખાઈ રહ્યો છે.
પોલીસ કાર્યવાહી
અકસ્માતની જાણ થતા જ સ્થાનિકો અને જેતપુર તાલુકા પોલીસનો કાફલો ઘટનાસ્થળે પહોંચી ગયો હતો. ક્રેઈનની મદદથી કારના ભંગારને દૂર કરી ટ્રાફિક હળવો કરવામાં આવ્યો હતો. પોલીસે અકસ્માતનો ગુનો નોંધી વધુ તપાસ હાથ ધરી છે.
પ્રાથમિક દ્રષ્ટિએ અતિશય ઝડપ અથવા મોડી રાત્રિના ઉજાગરાને કારણે ડ્રાઈવરને ઝોકું આવી ગયું હોવાની શંકા સેવાઈ રહી છે.
મહાશિવરાત્રીના પવિત્ર પર્વ પર ભક્તિના માહોલ વચ્ચે સર્જાયેલા આ અકસ્માતે મૃતક યુવાનોના પરિવારજનોમાં ભારે આક્રંદ મચાવ્યું છે.

શિવરાત્રિ મેળા બાદ અકસ્માત

રાજકોટમાં ભવનાથનો મેળો માણી પરત ફરતી વખતે જેતલસર બ્રિજ પર સર્જાયો ગમખ્વાર અકસ્માત

February 15, 2026 | 16:37 IST