પોસ્ટ ઓફિસ ખોલવા પહોંચી પત્ની, પાછળથી આવ્યો પતિ અને પછી સર્જાઈ હચમચાવનારી ઘટના!

Keralam Crime News: કેરળમના ઇડુક્કી જિલ્લામાંથી ચોંકાવનારી ઘટના સામે આવી છે. કુઝિથોઝુ વિસ્તારની એક પોસ્ટ ઓફિસમાં પતિએ પોતાની પત્ની પર લોખંડના સળિયાથી હુમલો કર્યો હતો. ત્યારબાદ પતિએ રિવોલ્વરથી પોતાને ગોળી મારી દીધી હતી. પોલીસના જણાવ્યા અનુસાર, આ ઘટનામાં પતિનું ઘટનાસ્થળે જ મોત થયું છે, જ્યારે ગંભીર રીતે ઘાયલ પત્નીની હાલત નાજુક છે.

પોસ્ટ ઓફિસ ખોલવા પહોંચેલી પત્ની પર પતિનો હુમલો
પોલીસ પાસેથી મળેલી માહિતી મુજબ, શ્રીજા કુઝિથોઝુની પોસ્ટ ઓફિસમાં કામચલાઉ પોસ્ટમાસ્ટર તરીકે ફરજ બજાવતી હતી. ઘટના સવારે આશરે 9:30 વાગ્યે બની હતી. શ્રીજા પોસ્ટ ઓફિસ ખોલવા માટે પહોંચી હતી ત્યારે તેનો પતિ સંતોષ ત્યાં આવ્યો હતો. આરોપ છે કે સંતોષે શ્રીજા પર લોખંડના સળિયાથી હુમલો કર્યો હતો. હુમલામાં તેના માથામાં ગંભીર ઈજાઓ પહોંચી હતી. ત્યારબાદ નજીકના લોકો ઘટનાસ્થળે પહોંચ્યા ત્યારે સંતોષે તેમની તરફ બંદૂક તાકી તેમને દૂર રહેવા મજબૂર કર્યા હતા. થોડા સમય બાદ તેણે રિવોલ્વરથી પોતાને ગોળી મારી દીધી હતી.

પત્નીની હાલત ગંભીર, ખાનગી હોસ્પિટલમાં સારવાર
હુમલામાં ગંભીર રીતે ઘાયલ થયેલી શ્રીજાને તાત્કાલિક કટ્ટપ્પાની એક ખાનગી હોસ્પિટલમાં દાખલ કરવામાં આવી હતી. પોલીસના જણાવ્યા અનુસાર, તેના માથામાં ગંભીર ઈજાઓ થઈ છે અને હાલ તેની સ્થિતિ નાજુક છે. બીજી તરફ, સંતોષનું ઘટનાસ્થળે જ મોત થયું હોવાનું પોલીસે જણાવ્યું છે.

કૌટુંબિક વિવાદની આશંકા, પોલીસ તપાસ શરૂ
પોલીસની પ્રાથમિક માહિતી મુજબ, દંપતી વચ્ચે છેલ્લા કેટલાક સમયથી કૌટુંબિક બાબતોને લઈને વારંવાર ઝઘડા થતા હતા. જોકે, પોસ્ટ ઓફિસમાં થયેલા હુમલા પાછળનું ચોક્કસ કારણ હજુ સુધી સ્પષ્ટ થયું નથી. પોલીસ તમામ પાસાંને ધ્યાનમાં રાખીને તપાસ કરી રહી છે.

ફોરેન્સિક ટીમે ઘટનાસ્થળેથી પુરાવા એકત્ર કર્યા
ઘટનાની જાણ થતાં પોલીસ અને ફોરેન્સિક નિષ્ણાતોની ટીમ પોસ્ટ ઓફિસ પહોંચી હતી. ટીમે ઘટનાસ્થળેથી જરૂરી પુરાવા એકત્ર કરવાની કામગીરી હાથ ધરી હતી. જિલ્લા પોલીસ વડાએ પણ ઘટનાસ્થળની મુલાકાત લીધી હતી. પોલીસ અધિકારીઓના જણાવ્યા અનુસાર, મૃતદેહને પોસ્ટમોર્ટમ માટે મોકલતા પહેલાં જરૂરી પ્રાથમિક તપાસ અને કાનૂની પ્રક્રિયાઓ પૂર્ણ કરવામાં આવશે. હાલ આ ઘટનાને લઈને વધુ તપાસ ચાલુ છે અને હુમલાનું ચોક્કસ કારણ જાણવા પોલીસ પ્રયાસ કરી રહી છે.