થોડી ક્ષણનો વિવાદ અને ત્રણ મોત! બિજનૌરમાં ટ્રેક્ટરથી કચડાયા 3 લોકો

Bijnor Crime News: ઉત્તર પ્રદેશના બિજનૌર જિલ્લામાં દારૂની દુકાન પર થયેલો સામાન્ય વિવાદ ગણતરીની મિનિટોમાં ખૂની ખેલમાં ફેરવાઈ ગયો. આરોપ છે કે દારૂના કોન્ટ્રાક્ટને લઈને થયેલી બોલાચાલી બાદ દત્તિયાણા ગામના રહેવાસી વીરેન્દ્રે રસ્તા પર ઉભેલા લોકો તરફ ટ્રેક્ટર પૂરપાટ ઝડપે દોડાવી દીધું. ટ્રેક્ટરની અડફેટે આવતા ઉદયવીર, બાબુરામ અને મહેન્દ્રના મોત થયા હતા. ઘટનાને પગલે વિસ્તારમાં ભારે તણાવ સર્જાયો છે અને પોલીસ બંદોબસ્ત ગોઠવવામાં આવ્યો છે.

દારૂની દુકાન પર શરૂ થયો હતો વિવાદ
મળતી માહિતી મુજબ, દત્તિયાણા ગામના વીરેન્દ્ર અને જમાલુદ્દીનપુરના સતવીર વચ્ચે દારૂની દુકાન પર કોઈ મુદ્દે બોલાચાલી થઈ હતી. શરૂઆતમાં થયેલો આ વિવાદ બાદમાં શાંત થયો હતો. જોકે, વિવાદ બાદ કેટલાક લોકો રસ્તાની બાજુમાં ઊભા રહીને વાત કરી રહ્યા હતા. આ દરમિયાન આરોપી વીરેન્દ્રે ટ્રેક્ટર ઝડપથી હંકારીને લોકો તરફ દોડાવ્યું હોવાનો આરોપ છે. ટ્રેક્ટરની ટક્કર એટલી જોરદાર હતી કે રસ્તા પરનો વીજળીનો થાંભલો પણ તૂટી ગયો અને ત્યારબાદ ટ્રેક્ટર પલટી ગયું.

ટ્રેક્ટરની અડફેટે ત્રણ લોકો, બેના ઘટનાસ્થળે મોત
ટ્રેક્ટરની ટક્કરમાં જમાલુદ્દીનપુરના રહેવાસી બાબુરામ, ઉદયવીર અને મહેન્દ્ર ગંભીર રીતે ઘાયલ થયા હતા. બાબુરામ અને ઉદયવીરને તબીબોએ મૃત જાહેર કર્યા હતા, જ્યારે મહેન્દ્રની હાલત ગંભીર હોવાથી તેને વધુ સારવાર માટે લઈ જવામાં આવ્યા હતા. સારવાર દરમિયાન મહેન્દ્રનું પણ મોત થયું હતું. આમ, આ ઘટનામાં કુલ ત્રણ લોકોના મોત થયા છે. 

ટ્રેક્ટર પલટતાં આરોપી ડ્રાઇવર પણ ઘાયલ
ત્રણ લોકોને ટક્કર માર્યા બાદ ટ્રેક્ટર કાબૂ બહાર ગયું અને વીજળીના થાંભલા સાથે અથડાઈને પલટી ગયું. આ અકસ્માતમાં ટ્રેક્ટર ચાલક વીરેન્દ્ર પણ ગંભીર રીતે ઘાયલ થયો હતો. તેને સારવાર માટે હોસ્પિટલમાં દાખલ કરવામાં આવ્યો છે. એક મહિલા પણ ઘટનામાં ઘાયલ થઈ હોવાનું જણાવાયું છે.

ત્રણ મોત બાદ ગામમાં હોબાળો
ત્રણ લોકોના મોતના સમાચાર ફેલાતાં જ ગામમાં ભારે હોબાળો મચી ગયો હતો. મોટી સંખ્યામાં ગ્રામજનો ઘટનાસ્થળે એકઠા થયા હતા. આક્રોશિત ગ્રામજનોએ આરોપીના ઘર સામે કડક કાર્યવાહી કરવાની માંગ કરી હતી, જેમાં બુલડોઝર કાર્યવાહી કરવાની માંગ પણ ઉઠી હતી. પોલીસ અને ગ્રામજનો વચ્ચે ઉગ્ર બોલાચાલી થઈ હતી. પરિસ્થિતિને વધુ વણસતી અટકાવવા પોલીસનો મોટો કાફલો તૈનાત કરવામાં આવ્યો હતો. પોલીસે મૃતદેહોનો કબજો મેળવી પોસ્ટમોર્ટમ માટે મોકલી આપ્યા હતા.

પોલીસે તપાસ શરૂ કરી
ઘટનાની જાણ થતાં પોલીસ અધિકારીઓ ઘટનાસ્થળે પહોંચ્યા હતા અને સ્થિતિ સંભાળી હતી. પોલીસ સમગ્ર ઘટનાક્રમની તપાસ કરી રહી છે. વિવાદ કયા મુદ્દે શરૂ થયો, ટ્રેક્ટર કેવી રીતે ભીડ તરફ પહોંચ્યું અને ઘટનામાં આરોપીની ચોક્કસ ભૂમિકા શું હતી તેની તપાસ કરવામાં આવી રહી છે. પોલીસના જણાવ્યા મુજબ તપાસના આધારે આગળની કાર્યવાહી કરવામાં આવશે.