આંધ્રપ્રદેશઃ સગીર પ્રેમિકાને તેના પ્રેમીએ સળગાવી દિધી

આંધ્રપ્રદેશના કડપ્પા જિલ્લામાં એક વિદ્યાર્થિનીને તેના પ્રેમીએ આગ ચાંપી દીધી હતી. રવિવારે 16 વર્ષીય યુવતીનું હોસ્પિટલમાં સારવાર દરમિયાન મોત નીપજ્યું હતું.  
મૃતક યુવતી ધોરણ 11ની વિદ્યાર્થિની હતી. કડપ્પામાં રાજીવ ગાંધી ઇન્સ્ટિટ્યૂટ ઓફ મેડિકલ સાયન્સિસ (રિમ્સ)માં સારવાર દરમિયાન તેમનું મોત નીપજ્યું હતું. યુવતીએ તેના ડાઇંગ ડેક્લેરેશનમાં કહ્યું હતું કે વિગ્નેશે તેની સાથે લગ્ન કરવાનું કહેતા તેને આગ ચાંપી દીધી હતી. આ ઘટના શનિવારે બડવેલ શહેર નજીક બની હતી. આરોપી વિગ્નેશ અને પીડિતા બાળપણથી જ મિત્રો હતા.
પોલીસના જણાવ્યા અનુસાર, આરોપીએ હાલમાં જ બીજી યુવતી સાથે લગ્ન કર્યા હતા, પરંતુ પીડિતા સાથે સંબંધ જાળવી રાખવા માંગતો હતો. આરોપીએ શનિવારે પીડિતાને ફોન કર્યો હતો અને તેણીને મળવા માંગતો હતો. તેણે પીડિતાને કહ્યું કે જો તે તેને નહીં મળે તો તે પોતાનો જીવ લઈ લેશે. પીડિતા મળવા માટે સંમત થઈ અને તેની કોલેજથી ઓટો રિક્ષામાં સવાર થઈ. થોડે દૂર ગયા પછી વિગ્નેશ પણ તેની સાથે જોડાઈ ગયો.
તેઓ બંને બેડવેલથી લગભગ 10 કિમી દૂર સેન્ચ્યુરી પ્લાયવુડ ફેક્ટરી નજીક પહોંચ્યા હતા.  આરોપીએ યુવતી પર પેટ્રોલ રેડ્યું હતું અને તેને આગ ચાંપી દીધી હતી. તેની ચીસો સાંભળીને આસપાસના ખેતરોમાં કામ કરતા ખેડૂતો તેના બચાવમાં દોડી આવ્યા હતા અને આગ બુઝાવી હતી, ત્યાં સુધીમાં આરોપી નાસી છૂટ્યો હતો. ઘટના અંગે સ્થાનિકોએ તાત્કાલિક પોલીસને જાણ કરી હતી. પોલીસે પીડિતાને સારવાર માટે બડવેલની હોસ્પિટલમાં દાખલ કરી હતી. બાદમાં તેમને કડપ્પાની રાજીવ ગાંધી ઇન્સ્ટિટ્યૂટ ઓફ મેડિકલ સાયન્સિસમાં દાખલ કરવામાં આવ્યા હતા.
પીડિતા 80 ટકા દાઝી ગઈ હતી. રવિવારે સવારે હોસ્પિટલમાં સારવાર દરમિયાન તેમનું મોત નીપજ્યું હતું. જિલ્લા ન્યાયાધીશે રાજીવ ગાંધી ઇન્સ્ટિટ્યૂટ ઓફ મેડિકલ સાયન્સિસમાં તેમનું નિવેદન નોંધ્યું હતું. પોલીસે જણાવ્યું હતું કે, આરોપીની શનિવારે રાત્રે ધરપકડ કરવામાં આવી હતી.
મુખ્યમંત્રી એન ચંદ્રબાબુ નાયડુએ બાળકીના મોત પર દુખ વ્યક્ત કર્યું હતું. તેમણે અધિકારીઓને આ કેસની ઝડપી સુનાવણી માટે ફાસ્ટ ટ્રેક કોર્ટ સ્થાપવાનો નિર્દેશ આપ્યો હતો. તેમણે અધિકારીઓને એ સુનિશ્ચિત કરવા પણ જણાવ્યું હતું કે આ જઘન્ય ગુના માટે ગુનેગારને મોતની સજા મળે.
-આઈએએનએસ