Ahmedabad : દેશભરમાં બોમ્બની ધમકી આપનાર ટેકનોક્રેટ મહિલા રેની જોશીલ્ડા ઝડપાઈ!

દેશભરમાં બોમ્બ વિસ્ફોટની ધમકીઓ આપીને હાહાકાર મચાવનારી એક ટેકનોક્રેટ મહિલા, રેની જોશીલ્ડાને અમદાવાદ સાયબર પોલીસે ચેન્નઈથી દબોચી લીધી છે. આ મહિલાએ માત્ર અમદાવાદમાં જ નહીં, પરંતુ દેશના 11 રાજ્યોમાં 100 થી વધુ અલગ-અલગ ઈમેઈલ દ્વારા ધમકીઓ મોકલી હતી, જેમાં પ્લેન ક્રેશની જવાબદારી લેવાથી લઈને સ્ટેડિયમ ઉડાવી દેવા સુધીની ધમકીઓનો સમાવેશ થાય છે.

રોબોટિક્સ એન્જિનિયરિંગનો અભ્યાસ, વર્ચ્યુઅલ અને VPN નો ઉપયોગ...

સાયબર પોલીસની તપાસમાં સામે આવ્યું છે કે, રેની જોશીલ્ડાએ રોબોટિક્સ એન્જિનિયરિંગનો અભ્યાસ કર્યો છે અને ટેકનોક્રેટ હોવાને કારણે તે અત્યંત ચાલાકીથી પોતાની ઓળખ છુપાવતી હતી. તેણે વર્ચ્યુઅલ નંબર અને VPN (વર્ચ્યુઅલ પ્રાઇવેટ નેટવર્ક) નો ઉપયોગ કરીને ગુનાને અંજામ આપ્યો હતો. તે અલગ-અલગ સોશિયલ મીડિયા એકાઉન્ટ બનાવીને મેસેજ કરતી હતી, જેથી પોલીસને તેને ટ્રેક કરવામાં મુશ્કેલી પડે. પુરાવાનો નાશ કરવાના તેણે ભરપૂર પ્રયાસો કર્યા હોવા છતાં, અમદાવાદ સાયબર પોલીસે ટેકનોલોજીકલ પુરાવાઓ એકત્રિત કરીને તેને ઝડપી પાડવામાં સફળતા મેળવી છે.

પ્લેન ક્રેશની જવાબદારી અને અન્ય ધમકીઓ...

રેની જોશીલ્ડાએ અમદાવાદમાં જ 21 બોમ્બ બ્લાસ્ટના ઈમેઈલ મોકલ્યા હતા. સૌથી ચોંકાવનારી વાત એ છે કે, તેણે સિવીલ હોસ્પિટલને મેઈલ કરીને તાજેતરમાં થયેલા પ્લેન ક્રેશની જવાબદારી પણ લીધી હતી, જે એક ગંભીર અને સંવેદનશીલ મુદ્દો છે. આ ઉપરાંત, તેણે સ્ટેડિયમને ઉડાવી દેવાની પણ ધમકી આપી હતી, જેનાથી સુરક્ષા એજન્સીઓમાં દોડધામ મચી ગઈ હતી.

આ પણ વાંચો : Vadodara : નવરચના સ્કૂલ ફરી ધમકીના નિશાન પર, બોમ્બની આશંકાએ શાળા ખાલી કરાવાઈ

વન-સાઈડ પ્રેમ સંબંધ અને મિત્રોને ફસાવવાનો કારસો...

પોલીસ તપાસમાં એક આશ્ચર્યજનક ખુલાસો થયો છે કે, રેની જોશીલ્ડાએ વન-સાઈડ પ્રેમ સંબંધના કારણે પણ ફેક એકાઉન્ટ બનાવીને લોકોને પરેશાન કરતી હતી. આ ઉપરાંત, તેણે પોતાના બે-ત્રણ મિત્રોને ફસાવવા માટે પણ આ પ્રકારના ગુના આચર્યા હોવાનું સામે આવ્યું છે. સાયબર પોલીસ છેલ્લા 6 મહિનાથી તેને સતત ટ્રેક કરી રહી હતી અને આખરે તેને પકડવામાં સફળતા મળી છે. આ ધરપકડ દર્શાવે છે કે, સાયબર ગુનેગારો ગમે તેટલા હોશિયાર હોય, પરંતુ કાયદાના હાથ લાંબા હોય છે અને તેઓ આખરે પકડાઈ જ જાય છે.

આ પણ વાંચો : Sabarkantha માં ભયાનક અકસ્માત, ખાનગી બસ ટ્રકમાં ઘૂસતાં 2 ના મોત, 8 થી વધુ ઘાયલ