Vadodara : નવરચના સ્કૂલ ફરી ધમકીના નિશાન પર, બોમ્બની આશંકાએ શાળા ખાલી કરાવાઈ

વડોદરા શહેરની જાણીતી નવરચના સ્કૂલને ફરી એકવાર બોમ્બથી ઉડાવી દેવાની ધમકી મળતાં ભારે ખળભળાટ મચી ગયો છે. આ બીજી વખત આવી ધમકી મળતા શાળા સંચાલકો અને વાલીઓમાં ચિંતા વ્યાપી છે, જ્યારે વિદ્યાર્થીઓની સુરક્ષાને ધ્યાનમાં રાખીને તાત્કાલિક ધોરણે તેમને રજા આપી શાળામાંથી બહાર કાઢવામાં આવ્યા હતા.

ઈમેલ દ્વારા ધમકી અને તાત્કાલિક કાર્યવાહી...

મળતી માહિતી મુજબ, કોઈ અજાણ્યા ઈસમે ઈમેલ દ્વારા શાળાને આ ધમકી મોકલી હતી. ધમકી મળતા જ શાળા પ્રશાસન હરકતમાં આવ્યું હતું અને તાત્કાલિક પોલીસને જાણ કરવામાં આવી હતી. માહિતી મળતાની સાથે જ વડોદરા પોલીસનો કાફલો, બોમ્બ સ્ક્વોડ અને ડોગ સ્ક્વોડ ઘટનાસ્થળે ધસી આવ્યા હતા.

સઘન તપાસ છતાં શંકાસ્પદ કંઈ મળ્યું નથી...

પોલીસ અને સુરક્ષા એજન્સીઓએ શાળા પરિસરમાં અને આસપાસના વિસ્તારોમાં સઘન તપાસ હાથ ધરી હતી. શાળાના દરેક ખૂણેખૂણાની ઝીણવટભરી ચકાસણી કરવામાં આવી હતી, પરંતુ અત્યાર સુધીની તપાસમાં કોઈપણ શંકાસ્પદ વસ્તુ મળી નથી.

આ પણ વાંચો : Sabarkantha માં ભયાનક અકસ્માત, ખાનગી બસ ટ્રકમાં ઘૂસતાં 2 ના મોત, 8 થી વધુ ઘાયલ

આ ઘટનાને કારણે વિદ્યાર્થીઓ, વાલીઓ અને શાળાના સ્ટાફમાં ભયનો માહોલ છે. પોલીસે ધમકી આપનાર અજાણ્યા ઈસમ વિરુદ્ધ ગુનો નોંધી, ઈમેલના સ્ત્રોત અને તેની પાછળના હેતુને શોધવા માટે તપાસના ચક્રો ગતિમાન કર્યા છે. અગાઉ પણ ધમકી મળી હોવાથી પોલીસ આ મામલાને ગંભીરતાથી લઈ રહી છે અને વધુ સાવચેતી વર્તી રહી છે.

આ પણ વાંચો : Surat માં ધોધમાર વરસાદ, પ્રિ-મોન્સૂન કામગીરીની પોલ ખૂલી, અનેક વિસ્તારો જળબંબાકાર!