Sabarkantha માં ભયાનક અકસ્માત, ખાનગી બસ ટ્રકમાં ઘૂસતાં 2 ના મોત, 8 થી વધુ ઘાયલ

સાબરકાંઠા (Sabarkantha) જિલ્લાના કાટવાડ નજીક આજે એક ભયાનક માર્ગ અકસ્માત સર્જાયો હતો. મુંબઈના બોરીવલીથી ઉદયપુર જઈ રહેલી એક ખાનગી બસ કાટવાડ ઓવરબ્રિજ પાસે ઉભેલી એક ટ્રકની પાછળ ઘૂસી જતાં આ ગંભીર અકસ્માત થયો હતો. આ દુર્ઘટનામાં બે મુસાફરોના કરુણ મોત થયા છે, જ્યારે 8 થી વધુ લોકો ઈજાગ્રસ્ત થયા હોવાના અહેવાલ છે.

બસની સાઈડ ચિરાઈ ગઈ, મુસાફરોમાં અફરાતફરી...

પ્રાથમિક માહિતી અનુસાર, બસ બેફામ ગતિએ ટ્રકની પાછળ ધસી ગઈ હતી, જેના કારણે બસની ડાબી સાઈડ સંપૂર્ણપણે ચિરાઈ ગઈ હતી. અકસ્માત એટલો ભયાવહ હતો કે બસમાં બેઠેલા મુસાફરોમાં અફરાતફરી અને ચીસાચીસ મચી ગઈ હતી. ઘટનાસ્થળે લોહીલુહાણ દ્રશ્યો જોવા મળ્યા હતા.

તાત્કાલિક બચાવ કામગીરી અને રાહત કાર્ય...

અકસ્માતની જાણ થતા જ સ્થાનિક તંત્ર અને રાહત ટીમો તાત્કાલિક ઘટનાસ્થળે પહોંચી ગઈ હતી. ફાયર વિભાગે ઝડપી કાર્યવાહી કરીને બસમાં ફસાયેલા એક સ્ત્રી અને એક પુરુષના મૃતદેહને બહાર કાઢ્યા હતા. 108 એમ્બ્યુલન્સ અને ફાયર બ્રિગેડની ટીમોએ યુદ્ધના ધોરણે બચાવ કામગીરી હાથ ધરી હતી.

આ પણ વાંચો : Ahmedabad Plane Crash : 251 મૃતદેહોના DNA મેચ, 8ના સેમ્પલ રિપીટ થશે, ઓળખ પ્રક્રિયા ચાલુ

ઈજાગ્રસ્તોને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા હતા. ગંભીર ઈજા પામેલા લોકોને પ્રાથમિક સારવાર બાદ વધુ સારવાર માટે મોટી હોસ્પિટલમાં રીફર કરવામાં આવી શકે છે. મૃતદેહોને પોસ્ટમોર્ટમ (PM) માટે પ્રાંતિજ સરકારી દવાખાને ખસેડવામાં આવ્યા છે. આ ઘટના અંગે પોલીસે ગુનો નોંધી વધુ તપાસ હાથ ધરી છે, જેથી અકસ્માતનું ચોક્કસ કારણ જાણી શકાય. આ ઘટનાએ ફરી એકવાર લાંબા અંતરની મુસાફરી કરતી બસોની સુરક્ષા અને ડ્રાઈવરોની બેદરકારીના મુદ્દાને ચર્ચામાં લાવ્યો છે.

આ પણ વાંચો : Surat માં ધોધમાર વરસાદ, પ્રિ-મોન્સૂન કામગીરીની પોલ ખૂલી, અનેક વિસ્તારો જળબંબાકાર!