RBIના નામે મેસેજ આવ્યો, પછી ₹1.50 કરોડ ટ્રાન્સફર

Ahmedabad BOSS Scam Cyber Fraud News: અમદાવાદ સાયબર ક્રાઇમ બ્રાન્ચે આંતરરાષ્ટ્રીય BOSS Scam સામે મોટી કાર્યવાહી કરી છે. પોલીસે ભારત, ચીન અને પાકિસ્તાન સાથે જોડાયેલા સાયબર ફ્રોડ નેટવર્કની તપાસમાં પશ્ચિમ બંગાળથી 2 મુખ્ય આરોપીઓની ધરપકડ કરી છે. આ ગેંગ પર અમદાવાદના એક વેપારી સાથે ₹1.50 કરોડની સાયબર છેતરપિંડી કરવાનો આરોપ છે. ઝડપી કાર્યવાહી દરમિયાન પોલીસે ફ્રોડની રકમમાંથી ₹1,13,53,700 રિકવર કરીને ફ્રીઝ કરાવવામાં સફળતા મેળવી છે.

RBIના નામે WhatsApp મેસેજ મોકલી વેપારીને ફસાવ્યો
આ કેસનો ખુલાસો અમદાવાદના વેપારી પ્રવીણભાઈ નાગજીભાઈ બવાડિયાની ફરિયાદ બાદ થયો હતો. 23 જૂન 2026ના રોજ તેમના મોબાઈલ પર અજાણ્યા WhatsApp નંબર પરથી ZIP ફાઈલ મોકલવામાં આવી હતી. મેસેજમાં RBIના રિસ્ક કંટ્રોલ વિભાગના નામે ખોટી માહિતી આપીને કંપનીના બેંક એકાઉન્ટમાં અસામાન્ય ટ્રાન્ઝેક્શન થઈ રહ્યા હોવાનું જણાવાયું હતું. ત્યારબાદ 24 જૂને આરોપીઓએ ફરિયાદીના નામે તેમના એકાઉન્ટન્ટને WhatsApp મેસેજ કર્યો હતો. કંપનીના ફાઇનાન્સ વિભાગના નામે તાત્કાલિક નાણાં ટ્રાન્સફર કરવાની સૂચના આપી RTGS મારફતે ₹1.50 કરોડ એકાઉન્ટમાં ટ્રાન્સફર કરાવી લેવાયા હતા.

1930 પર ફોન કરતાં કરોડોનું નુકસાન અટક્યું
ફ્રોડની જાણ થતાં ફરિયાદીએ તાત્કાલિક સાયબર ક્રાઇમ હેલ્પલાઇન 1930 પર સંપર્ક કર્યો હતો. અમદાવાદ સાયબર ક્રાઇમ ટીમે ઝડપી કાર્યવાહી કરીને ફ્રોડમાં ગયેલી રકમમાંથી ₹1.13 કરોડથી વધુ રકમ ફ્રીઝ કરાવી રિફંડ મેળવવામાં સફળતા મેળવી હતી.

IP લોગ્સ અને ટેકનિકલ એનાલિસિસથી આરોપીઓ સુધી પહોંચ્યા
કેસની તપાસમાં સાયબર ક્રાઇમ બ્રાન્ચે આરોપીઓ દ્વારા ઉપયોગમાં લેવાયેલા મોબાઈલ નંબર, SIM કાર્ડ, હેન્ડસેટ અને IP લોગ્સનું ટેકનિકલ એનાલિસિસ કર્યું હતું. વિવિધ ડિજિટલ પુરાવાઓનું ક્રોસ-વેરિફિકેશન કર્યા બાદ આરોપીઓનું લોકેશન પશ્ચિમ બંગાળમાં હોવાનું સામે આવ્યું હતું. ત્યારબાદ અમદાવાદ સાયબર ક્રાઇમની વિશેષ ટીમે પશ્ચિમ બંગાળમાં કાર્યવાહી કરીને ઈમરાન અલી પિયાદા (25) અને ઈન્જામુલ મોલ્લા (30) ની ધરપકડ કરી હતી.

ડમી SIM અને OTPનો ગેરકાયદેસર ધંધો
પોલીસ તપાસ મુજબ આરોપી ઈન્જામુલ આંતરરાષ્ટ્રીય સાયબર ફ્રોડ નેટવર્કના સંપર્કમાં હતો અને ડમી SIM, ફેક મોબાઈલ નંબર તથા WhatsApp આધારિત સંચાર વ્યવસ્થા ઉભી કરવામાં મદદ કરતો હતો. બીજો આરોપી ઈમરાન વિવિધ ટેલિકોમ કંપનીઓના POS એજન્ટ તરીકે કામ કરતો હતો. પોલીસના જણાવ્યા મુજબ, તે ગ્રાહકોના બાયોમેટ્રિક અને અન્ય પ્રક્રિયાનો દુરુપયોગ કરીને ડમી SIM કાર્ડ એક્ટિવેટ કરતો અને OTP સાયબર ગુનેગારોને વેચતો હતો. પોલીસ તપાસમાં છેલ્લા 5 વર્ષમાં ઈમરાને આશરે 21,000 ઈ-કોમર્સ અને ગેમિંગ OTP તથા આશરે 900 WhatsApp એક્ટિવેશન OTP વેચ્યા હોવાનું સામે આવ્યું છે.

26 રાજ્યોની 251 સાયબર ક્રાઇમ ફરિયાદો સાથે કનેક્શન
આરોપીઓ પાસેથી મળેલા SIM કાર્ડ અને ડિજિટલ ડેટાના વિશ્લેષણમાં મોટો ખુલાસો થયો છે. પોલીસ મુજબ, NCRP પર દેશના 26 રાજ્યોમાંથી નોંધાયેલી 251 સાયબર ક્રાઇમ ફરિયાદો સાથે આ નેટવર્કની કડીઓ સામે આવી છે. આમાં 194 ઓનલાઈન ફાઇનાન્શિયલ ફ્રોડ, 3 BOSS Scam, 29 સોશિયલ મીડિયા સંબંધિત ગુનાઓ સહિત અન્ય કેટેગરીની ફરિયાદોનો સમાવેશ થાય છે.

ચીન-પાકિસ્તાન કનેક્શનની પણ તપાસ
I4C અને અમદાવાદ સાયબર ક્રાઇમ બ્રાન્ચના ટેકનિકલ એનાલિસિસમાં આ નેટવર્કમાં ભારત ઉપરાંત ચીન, પાકિસ્તાન અને હોંગકોંગ સાથે જોડાયેલા ડિજિટલ ઈન્ફ્રાસ્ટ્રક્ચરના ઉપયોગના સંકેતો મળ્યા છે. તપાસમાં 'Zean' નામના માલવેર અને ચીન આધારિત VPN સર્વિસના ઉપયોગ અંગે પણ મહત્વપૂર્ણ વિગતો સામે આવી હોવાનું પોલીસ દ્વારા જણાવાયું છે. પોલીસ હવે આ આંતરરાષ્ટ્રીય સાયબર નેટવર્કના અન્ય આરોપીઓ અને તેમની નાણાકીય કડીઓ અંગે વધુ તપાસ કરી રહી છે.

કેવી રીતે કામ કરતો હતો BOSS Scam?
BOSS Scamમાં આરોપીઓ પહેલા RBI અથવા અન્ય બેંકિંગ સંસ્થાના અધિકારી બનીને કંપનીના CEO, ડાયરેક્ટર અથવા વરિષ્ઠ અધિકારીને WhatsApp અથવા ઈ-મેઈલ કરે છે. ત્યારબાદ ZIP ફાઈલ મારફતે માલવેર ફેલાવવામાં આવે છે. માલવેર સિસ્ટમમાં પ્રવેશ્યા બાદ WhatsApp Web Session હાઇજેક કરવાનો પ્રયાસ કરવામાં આવે છે. ત્યારબાદ આરોપીઓ CEO અથવા બોસના નામે ફેક WhatsApp નંબર બનાવીને કંપનીના Accounts અથવા Finance વિભાગને તાત્કાલિક પૈસા ટ્રાન્સફર કરવાનો આદેશ આપે છે. આ રીતે CEO Impersonation, WhatsApp Hijacking, Malware, Dummy SIM અને OTPનો ઉપયોગ કરીને કંપનીના બેંક ખાતામાંથી કરોડો રૂપિયા ટ્રાન્સફર કરાવવામાં આવતા હોવાનું તપાસમાં સામે આવ્યું છે.

સાયબર ફ્રોડથી બચવા અમદાવાદ પોલીસની સલાહ
સાયબર ક્રાઇમ બ્રાન્ચે લોકોને અજાણ્યા નંબર પરથી આવતી ZIP, EXE, DLL અથવા APK ફાઈલ ઓપન ન કરવા સૂચના આપી છે. WhatsApp અથવા ઈ-મેઈલ મારફતે નાણાં ટ્રાન્સફરની સૂચના મળે તો સંબંધિત અધિકારીનો વૈકલ્પિક નંબર અથવા વીડિયો કોલ દ્વારા ફરજિયાત ચકાસણી કરવી જોઈએ. WhatsAppના Linked Devices નિયમિત રીતે ચેક કરવા અને Two-Factor Authentication ચાલુ રાખવાની પણ સલાહ આપવામાં આવી છે. કંપનીઓને IT Security Policy, Antivirus અને Software Restriction Policy મજબૂત બનાવવાની સૂચના આપવામાં આવી છે. સાયબર ફ્રોડનો ભોગ બન્યા હોવ તો વિલંબ કર્યા વગર 1930 પર સંપર્ક કરવો અને અધિકૃત સાયબર ક્રાઇમ પોર્ટલ પર ફરિયાદ નોંધાવવી જરૂરી છે.