વિરાટ કોહલીનું ઇન્સ્ટાગ્રામ એકાઉન્ટ ગાયબ

ભારતીય ક્રિકેટ ટીમના દિગ્ગજ બેટ્સમેન વિરાટ કોહલીના ચાહકો માટે 29 જાન્યુઆરીની રાત્રિ મૂંઝવણભરી રહી હતી. વિશ્વભરમાં કરોડો ચાહકો ધરાવતા કોહલીનું અધિકૃત ઇન્સ્ટાગ્રામ એકાઉન્ટ પ્લેટફોર્મ પરથી અચાનક અદ્રશ્ય થઈ ગયું હતું. સર્ચ કરવા છતાં પ્રોફાઇલ ન દેખાતા સોશિયલ મીડિયા પર અનેક અટકળો શરૂ થઈ હતી.

શું એકાઉન્ટ હેક થયું હતું કે સસ્પેન્ડ ?

વિરાટ કોહલીના 274 મિલિયનથી વધુ ફોલોઅર્સ છે. રાત્રિના સમયે જ્યારે ફેન્સે તેની પ્રોફાઇલ જોવાનો પ્રયાસ કર્યો ત્યારે ‘પેજ નોટ અવેલેબલ’ નો મેસેજ જોવા મળ્યો હતો. આ ઘટના બાદ ચાહકોએ સોશિયલ મીડિયા પર સવાલોનો મારો ચલાવ્યો હતો. ઘણા લોકોનું માનવું હતું કે એકાઉન્ટ હેક થયું છે, જ્યારે કેટલાક તેને ટેકનિકલ ખામી ગણાવી રહ્યા હતા. જોકે, રાહતની વાત એ છે કે 30 જાન્યુઆરીની સવારે વિરાટનું એકાઉન્ટ ફરી એક્ટિવ થઈ ગયું હતું.

કમાણી અને સોશિયલ મીડિયા પ્રભાવ : 

વિરાટ કોહલી રમતગમતની દુનિયામાં ક્રિસ્ટિયાનો રોનાલ્ડો અને લિયોનેલ મેસ્સી પછી ત્રીજા ક્રમનો સૌથી વધુ ફોલોઅર્સ ધરાવતો ખેલાડી છે. અહેવાલો મુજબ, કોહલી ઇન્સ્ટાગ્રામ પર એક પ્રમોશનલ પોસ્ટ કરવા માટે અંદાજે ₹12 કરોડથી ₹14 કરોડ જેટલી જંગી રકમ લે છે. તાજેતરમાં તેણે ઘણી બ્રાન્ડ પોસ્ટ્સ ડિલીટ કરીને ક્રિકેટ અને પરિવાર પર ધ્યાન કેન્દ્રિત કરવાનો સંકેત પણ આપ્યો હતો.

આંતરરાષ્ટ્રીય કારકિર્દી પર એક નજર : 

કોહલીએ ક્રિકેટના મેદાનમાં અનેક શિખરો સર કર્યા છે. તેની કારકિર્દીના મુખ્ય આંકડા નીચે મુજબ છે:

કુલ આંતરરાષ્ટ્રીય સદી: 85

ટેસ્ટ ક્રિકેટ: 123 મેચમાં 9,230 રન (30 સદી)

ODI ક્રિકેટ: 311 મેચમાં 14,797 રન (54 સદી)

T20 આંતરરાષ્ટ્રીય: 4,188 રન (હાલમાં ટેસ્ટ અને T20 માંથી નિવૃત્ત)

હાલમાં વિરાટ કોહલી માત્ર વન-ડે ફોર્મેટમાં ભારતનું પ્રતિનિધિત્વ કરી રહ્યો છે. એકાઉન્ટ પરત આવતા લાખો ચાહકોએ હાશકારો અનુભવ્યો છે.