કોહલી અને ગંભીરનો વાયરલ વીડિયો ફેક

ન્યૂઝીલેન્ડ સામેની વનડે શ્રેણીમાં ભારતીય ટીમની હાર બાદ સોશિયલ મીડિયા પર એક વીડિયોએ ભારે ચર્ચા જગાવી છે. આ વીડિયોમાં ઇન્દોરના હોલકર સ્ટેડિયમમાં દર્શકો હેડ કોચ ગૌતમ ગંભીર વિરુદ્ધ સૂત્રોચ્ચાર કરતા અને વિરાટ કોહલી તેના પર ગુસ્સે થતો દેખાય છે. જોકે, ઊંડાણપૂર્વકની તપાસમાં જાણવા મળ્યું છે કે આ વીડિયો સંપૂર્ણપણે એડિટ કરેલો અને ભ્રામક છે.

ઓડિયો અન્ય મેચનો અને વીડિયો ઇન્દોરનો : 

વાયરલ થઈ રહેલા વીડિયોના દ્રશ્યો ઇન્દોર વનડે બાદના જ છે, જેમાં વિરાટ કોહલી, કેએલ રાહુલ અને શ્રેયસ અય્યર જેવા ખેલાડીઓ મેદાન પર હાજર છે. પરંતુ, આ વીડિયોમાં જે 'ગૌતમ ગંભીર હાય હાય' ના ઓડિયો સાંભળવા મળે છે તે વાસ્તવમાં ગયા વર્ષે ભારત અને દક્ષિણ આફ્રિકા વચ્ચે રમાયેલી ગુવાહાટી ટેસ્ટ દરમિયાનનો છે. તે સમયે ગંભીર વિરુદ્ધ ખરેખર નારાબાજી થઈ હતી, જેના ઓડિયોનો ઉપયોગ કરીને આ નવો વીડિયો બનાવવામાં આવ્યો છે.

મીડિયા રિપોર્ટ્સમાં પુષ્ટિનો અભાવ : 

ઇન્દોરમાં રમાયેલી મેચ દરમિયાન મેદાન પર હાજર રહેલા કોઈ પણ વિશ્વસનીય મીડિયા હાઉસ કે પત્રકારે ગંભીર વિરુદ્ધ આવી કોઈ નારાબાજી થઈ હોવાની પુષ્ટિ કરી નથી. ગુવાહાટીની ઘટના સમયે મીડિયામાં તાત્કાલિક અહેવાલો આવ્યા હતા, પરંતુ ઇન્દોરના કિસ્સામાં માત્ર એડિટ કરેલો વીડિયો જ સોશિયલ મીડિયા પર ફરતો થયો છે. ટેક્નિકલ રીતે જોતા, જૂના વીડિયોનો ઓડિયો નવા દ્રશ્યો સાથે જોડીને સોશિયલ મીડિયા યુઝર્સને ગેરમાર્ગે દોરવાનો પ્રયાસ કરવામાં આવ્યો છે.

ટીમ ઇન્ડિયા પર વધતું દબાણ : 

ભલે આ વીડિયો નકલી હોય, પરંતુ ગૌતમ ગંભીર પર સોશિયલ મીડિયામાં ચાહકોનો રોષ સતત વધી રહ્યો છે. ઘરઆંગણે ન્યૂઝીલેન્ડની પ્રમાણમાં નબળી ટીમ સામે મળેલી હારને કારણે ફેન્સ નારાજ છે. ભારતીય ટીમ પોતાની સંપૂર્ણ તાકાત સાથે રમવા છતાં કિવી ટીમે પ્રથમ વાર ભારતમાં વનડે શ્રેણી જીતીને ઇતિહાસ રચ્યો છે, જેના કારણે કોચિંગ સ્ટાફ અને ખેલાડીઓ પર સવાલો ઉઠી રહ્યા છે.