વિજય હજારે ટ્રોફી: હાર્દિક પંડ્યાની તોફાની સદી

વિજય હજારે ટ્રોફી: હાર્દિક પંડ્યાએ રાજકોટમાં મચાવી ધમાલ, માત્ર 68 બોલમાં ફટકારી આક્રમક સદી

રાજકોટના નિરંજન શાહ સ્ટેડિયમમાં રમાઈ રહેલી વિજય હજારે ટ્રોફી 2025-26માં ભારતીય ઓલરાઉન્ડર હાર્દિક પંડ્યાએ બેટિંગમાં આતશબાજી કરી છે. બરોડા તરફથી રમતા પંડ્યાએ વિદર્ભના બોલરોની જોરદાર ધોલાઈ કરી માત્ર 68 બોલમાં પોતાની સદી પૂર્ણ કરી હતી.

મુશ્કેલ સમયે સંભાળી બાજી : 

જ્યારે હાર્દિક પંડ્યા બેટિંગ કરવા મેદાનમાં ઉતાર્યા ત્યારે બરોડાની સ્થિતિ અત્યંત નાજુક હતી. ટીમે માત્ર 71 રનમાં પોતાની 5 મહત્વની વિકેટ ગુમાવી દીધી હતી. સાતમા નંબરે બેટિંગમાં આવેલા પંડ્યાએ શરૂઆતમાં સંયમપૂર્વક રમત રમી હતી, પરંતુ ત્યારબાદ આક્રમક વલણ અપનાવ્યું હતું. તેમણે 39મી ઓવરમાં સ્પીનર પાર્થ રેખાડેના બોલ પર 5 છગ્ગા અને 1 ચોગ્ગો ફટકારીને એક જ ઓવરમાં 34 રન ઝૂડી કાઢ્યા હતા.

રેકોર્ડબ્રેક ઇનિંગ : 

હાર્દિક પંડ્યાએ પોતાની શાનદાર ઇનિંગ દરમિયાન કુલ 93 બોલમાં 133 રન બનાવ્યા હતા. આ ઇનિંગમાં તેમણે 11 ગગનચુંબી છગ્ગા અને 4 ચોગ્ગા ફટકાર્યા હતા. લિસ્ટ-એ ક્રિકેટમાં આ તેમનો સર્વશ્રેષ્ઠ સ્કોર છે. આ અગાઉ તેમનો શ્રેષ્ઠ સ્કોર ઓસ્ટ્રેલિયા સામે 92 રન અણનમ હતો. લાંબા સમય બાદ 50 ઓવરના ફોર્મેટમાં પરત ફરેલા હાર્દિકે પોતાની ફિટનેસ અને ફોર્મની સાબિતી આપી દીધી છે.

બરોડાનો પડકારજનક સ્કોર : 

હાર્દિક પંડ્યાની આ વિસ્ફોટક બેટિંગના દમ પર બરોડાની ટીમે નિર્ધારિત 50 ઓવરમાં 9 વિકેટના નુકસાન પર 293 રનનો મજબૂત સ્કોર બનાવ્યો છે. વિદર્ભ તરફથી વાય.આર. ઠાકુરે સૌથી વધુ ચાર વિકેટ ઝડપી હતી, પરંતુ હાર્દિકના આક્રમણ સામે વિદર્ભના બોલરો લાચાર દેખાતા હતા.