T20 વર્લ્ડ કપ: ઝિમ્બાબ્વેએ ઓસ્ટ્રેલિયાને હરાવ્યું

ચાલુ T20 વર્લ્ડ કપમાં નાની ટીમોનું પ્રભુત્વ સતત વધી રહ્યું છે. અત્યાર સુધી પાકિસ્તાન અને ભારત જેવી ટીમોએ સંઘર્ષ કરવો પડ્યો હતો, પરંતુ કોલંબોના પ્રેમદાસા સ્ટેડિયમમાં રમાયેલી મેચમાં ઝિમ્બાબ્વેએ ઓસ્ટ્રેલિયા જેવી દિગ્ગજ ટીમને ૨૩ રને હરાવીને ટૂર્નામેન્ટનો સૌથી મોટો અપસેટ સર્જ્યો છે.

ઝિમ્બાબ્વેની મજબૂત બેટિંગ : 

પ્રથમ બેટિંગ કરતા ઝિમ્બાબ્વેએ ઓસ્ટ્રેલિયન બોલરોનો મક્કમતાથી સામનો કરીને ૨ વિકેટે ૧૬૯ રનનો પડકારજનક સ્કોર બનાવ્યો હતો. બ્રાયન બેનેટે શાનદાર બેટિંગ કરતા ૫૬ બોલમાં અણનમ ૬૪ રન ફટકાર્યા હતા. આ ઉપરાંત મારુમની અને રાયન બર્લે ૩૫-૩૫ રનનું યોગદાન આપ્યું હતું, જ્યારે અંતિમ ઓવરોમાં સિકંદર રઝાએ ૧૨ બોલમાં ૨૫ રન ઝુડીને ટીમનો સ્કોર મજબૂત કર્યો હતો.

ઓસ્ટ્રેલિયાના ટોચના ક્રમનું પતન : 

૧૭૦ રનના લક્ષ્યાંકનો પીછો કરવા ઉતરેલી ઓસ્ટ્રેલિયન ટીમની શરૂઆત અત્યંત નબળી રહી હતી. જોશ ઈંગ્લિશ અને ટ્રેવિસ હેડ સસ્તામાં પેવેલિયન ભેગા થયા હતા. ત્યારબાદ કેમરુન ગ્રીન અને ટીમ ડેવિડ શૂન્ય રને આઉટ થતા કાંગારૂ ટીમ ભારે મુશ્કેલીમાં મુકાઈ ગઈ હતી. પાવરપ્લેમાં જ ચાર વિકેટ ગુમાવ્યા બાદ ઓસ્ટ્રેલિયા દબાણ હેઠળ આવી ગયું હતું.

મેટ રેનશોનો સંઘર્ષ એળે ગયો : 

મધ્યક્રમમાં ગ્લેન મેક્સવેલે ૩૧ રન બનાવીને થોડી આશા જગાડી હતી, પરંતુ તે લાંબી ઇનિંગ રમી શક્યો નહીં. ઓસ્ટ્રેલિયા તરફથી મેટ રેનશોએ સૌથી વધુ લડત આપી હતી. તેણે ૪૪ બોલમાં ૬૫ રન બનાવીને ટીમને જીત તરફ લઈ જવાનો પ્રયાસ કર્યો હતો, પરંતુ મુઝારબાનીની બોલિંગમાં તે આઉટ થતા જ ઓસ્ટ્રેલિયાની આશા પર પાણી ફરી વળ્યું હતું.

મુઝારબાનીની ઘાતક બોલિંગ : 

ઝિમ્બાબ્વેની જીતનો અસલી હીરો બોલર મુઝારબાની રહ્યો હતો. તેણે માત્ર ૧૭ રન આપીને ૪ મહત્વની વિકેટો ઝડપી હતી. અંતિમ ઓવરમાં ઓસ્ટ્રેલિયાને ૨૯ રનની જરૂર હતી, પરંતુ આખી ટીમ ૧૪૬ રનમાં ઓલઆઉટ થઈ ગઈ હતી. ઝિમ્બાબ્વેની આ શાનદાર બોલિંગ અને ફિલ્ડિંગને કારણે વર્લ્ડ કપમાં મોટો ઉલટફેર જોવા મળ્યો છે.