T20 વર્લ્ડ કપમાં ભારત અને પાકિસ્તાન વચ્ચેની મેચ પહેલા મેદાનની બહાર ચાલી રહેલા વિવાદનો આખરે અંત આવ્યો છે. ભારત સામે બહિષ્કારની મોટી ધમકીઓ આપનાર પાકિસ્તાન ક્રિકેટ બોર્ડ (PCB) ને આંતરરાષ્ટ્રીય ક્રિકેટ પરિષદ (ICC) સામે ઝૂકવાની ફરજ પડી છે. પાકિસ્તાને જે રીતે આ મામલે યુ-ટર્ન લીધો છે, તે સાબિત કરે છે કે વૈશ્વિક ક્રિકેટમાં ભારત અને ICC ના પ્રભાવ સામે પાકિસ્તાનનું કોઈ જોર ચાલ્યું નથી.
શું હતો વિવાદ અને પાકિસ્તાનની દલીલ ?
T20 વર્લ્ડ કપના શેડ્યૂલ મુજબ ભારત સામેની મેચને લઈને PCB એ અનેક વાંધાઓ ઉઠાવ્યા હતા. પાકિસ્તાન બોર્ડે એવી રણનીતિ અપનાવી હતી કે જો તેમની શરતો સ્વીકારવામાં નહીં આવે, તો તેઓ હાઈ-વોલ્ટેજ મેચનો બહિષ્કાર કરશે. પાકિસ્તાનનો આ દાવો માત્ર મેચ પૂરતો નહોતો, પરંતુ ક્રિકેટના આંતરરાષ્ટ્રીય માળખામાં પોતાની પકડ સાબિત કરવાનો એક નિષ્ફળ પ્રયાસ હતો.
ICC ના કડક વલણથી PCB માં ફફડાટ :&nbsp;
પાકિસ્તાનની બહિષ્કારની ચીમકી પર ICC એ નરમ પડવાને બદલે અત્યંત આકરું વલણ અપનાવ્યું હતું. ICC એ સ્પષ્ટ કર્યું કે નિર્ધારિત સમય અને શેડ્યૂલ મુજબ જ મેચ યોજાશે. જો પાકિસ્તાન રમવાની ના પાડશે, તો તેને નિયમોનું ઉલ્લંઘન ગણી વોકઓવર જાહેર કરવામાં આવશે. આ ઉપરાંત પાકિસ્તાન પર ભારે નાણાકીય દંડ અને પોઈન્ટ કાપવાની પણ ચેતવણી આપવામાં આવી હતી.
કેમ નરમ પડ્યું પાકિસ્તાન ?
ICC ની કડક ચેતવણી બાદ પાકિસ્તાન બોર્ડની ચિંતા વધી ગઈ હતી. જો પાકિસ્તાન મેચ ન રમે તો તેને કરોડો રૂપિયાની પ્રસારણ આવક ગુમાવવી પડે તેમ હતી. આર્થિક સંકટનો સામનો કરી રહેલા PCB માટે ICC નું ફંડ બંધ થવું આત્મઘાતી સાબિત થઈ શકે તેમ હતું. આ આર્થિક અને રાજકીય દબાણને કારણે પાકિસ્તાને 48 કલાકની અંદર પોતાની તમામ શરતો પાછી ખેંચી લીધી અને ભારત સામે મેદાનમાં ઉતરવાની તૈયારી દર્શાવી દીધી છે.
ભારત અને પાકિસ્તાન વચ્ચેનો મુકાબલો ક્રિકેટની દુનિયા માટે સૌથી વધુ કમાણી કરાવનારી ઈવેન્ટ છે. આ મેચ રમાવાનો રસ્તો સાફ થતા જ ક્રિકેટ ચાહકો અને બ્રોડકાસ્ટર્સમાં રાહતની લાગણી જોવા મળી રહી છે.

ભારત વિરુદ્ધ પાકિસ્તાન મેચ વિવાદ

ભારત સામે મેચનો બહિષ્કાર કરવાની ધમકી આપનાર પાકિસ્તાને 48 કલાકમાં જ કેમ લીધો યુ-ટર્ન?

February 10, 2026 | 16:29 IST