T20 વર્લ્ડ કપ: આફ્રિકા સામે ભારતનો કારમો પરાજય

અમદાવાદના નરેન્દ્ર મોદી સ્ટેડિયમમાં રમાયેલા ટી20 વર્લ્ડ કપના સુપર-8 તબક્કાના અત્યંત રસાકસીભર્યા મુકાબલામાં ભારતીય ટીમનો પરાજય થયો છે. સાઉથ આફ્રિકાએ શાનદાર રમતનું પ્રદર્શન કરતા ભારતને 76 રનના મોટા અંતરથી હરાવ્યું છે. ઉલ્લેખનીય છે કે, ભારતીય ટીમ સતત 12 આંતરરાષ્ટ્રીય ટી20 મેચ જીત્યા બાદ આ હારનો સામનો કરી રહી છે, જેણે હવે સુપર-8ના ગ્રુપ સમીકરણોને વધુ જટિલ બનાવી દીધા છે.

પાવરપ્લેમાં જ મેચ ભારતની પકડમાંથી છૂટી : 

187 રનના મોટા સ્કોરનો પીછો કરવા ઉતરેલી ભારતીય ટીમની શરૂઆત આશાસ્પદ રહી નહોતી. મેચ બાદ નેતૃત્વ સંભાળતા સૂર્યકુમાર યાદવે પણ સ્વીકાર્યું હતું કે જ્યારે તમે 180થી વધુ રનનો પીછો કરી રહ્યા હોવ ત્યારે શરૂઆતની ઓવરો ખૂબ જ મહત્વની હોય છે. ભારતે પાવરપ્લેની છ ઓવરમાં જ ત્રણ મુખ્ય વિકેટો ગુમાવી દીધી હતી. મધ્યમ ક્રમના બેટ્સમેનો વચ્ચે કોઈ મોટી ભાગીદારી ન થવાને કારણે રન રેટનું દબાણ સતત વધતું રહ્યું અને અંતે ટીમ લક્ષ્યથી ઘણી પાછળ રહી ગઈ.

અભિષેક શર્માની નિષ્ફળતા અને મિલરની આક્રમક બેટિંગ : 

ટીમ ઇન્ડિયા માટે સૌથી ચિંતાનો વિષય ઓપનિંગ જોડી અને ટોપ ઓર્ડરનું ફોર્મ રહ્યું છે. વિશ્વના ટોચના બેટ્સમેન ગણાતા અભિષેક શર્મા માત્ર 14 રન બનાવીને પેવેલિયન ભેગા થતા ફરી એકવાર સવાલો ઉભા થયા છે. બીજી તરફ, સાઉથ આફ્રિકાના ડેવિડ મિલરે મેદાનની ચારેબાજુ ફટકાબાજી કરી હતી. મિલરે માત્ર 35 બોલમાં 63 રનની ઇનિંગ રમીને પોતાની ટીમને મજબૂત સ્થિતિમાં પહોંચાડી હતી. તેની આ ઇનિંગને કારણે તેને 'પ્લેયર ઓફ ધ મેચ' જાહેર કરવામાં આવ્યો હતો.

હાર છતાં રણનીતિ પર મક્કમ ભારત : 

પરાજય બાદ ભારતીય કેમ્પમાં નિરાશા હોવા છતાં આત્મવિશ્વાસ ડગ્યો નથી. કેપ્ટને સ્પષ્ટ કર્યું છે કે આ પરિણામને આંચકા તરીકે જોવાને બદલે એક શીખ તરીકે લેવામાં આવશે. ટીમ પોતાની આક્રમક શૈલીમાં કોઈ જ ફેરફાર કરવાની નથી અને આગામી મેચોમાં પણ આ જ અભિગમ સાથે મેદાનમાં ઉતરશે. ટીમ મેનેજમેન્ટ હાલમાં પ્લેઈંગ ઈલેવનમાં કોઈ મોટા ફેરફાર કરવાના મૂડમાં નથી.

સેમીફાઈનલનું ગણિત: હવે શું થશે ?

આ હાર બાદ હવે ભારત માટે આગળનો રસ્તો પડકારજનક બન્યો છે. સેમીફાઈનલમાં સુરક્ષિત રીતે પ્રવેશવા માટે ભારતે હવે પછીની બંને મેચો, જે ઝિમ્બાબ્વે અને વેસ્ટ ઈન્ડિઝ સામે છે, તે જીતવી અનિવાર્ય બની ગઈ છે. ભારતની આગામી મેચ ચેન્નાઈના મેદાન પર રમાશે. જો સાઉથ આફ્રિકા તેની બાકીની મેચોમાં પ્રભુત્વ જાળવી રાખે તો ભારત માટે રન રેટ અને પોઈન્ટ ટેબલની ગણતરીઓ મહત્વની બની જશે.