પાક. ક્રિકેટર મોહમ્મદ નવાઝ ડોપિંગ કેસમાં દોષિત

ICC's big decision in Mohammad Nawaz doping case: પાકિસ્તાની ઓલરાઉન્ડર મોહમ્મદ નવાઝ ડોપિંગમાં દોષિત ઠરતાં ICC દ્વારા ત્રણ મહિનાનો પ્રતિબંધ મૂકવામાં આવ્યો છે. ICC એ શુક્રવારે, 17 જુલાઈના રોજ પ્રેસ રિલીઝમાં આ વાતનો ખુલાસો કર્યો. ચોંકાવનારી વાત એ છે કે, નવાઝ T20 વર્લ્ડ કપ 2026 દરમિયાન કરવામાં આવેલા ડોપ ટેસ્ટમાં દોષિત ઠર્યો હતો. ત્યારબાદ, ICC એ સજા ફટકારી. નવાઝ T20 વર્લ્ડ કપ દરમિયાન પાકિસ્તાની ટીમનો મુખ્ય ભાગ હતો અને સમગ્ર ટુર્નામેન્ટ દરમિયાન રમ્યો હતો.

ICC દ્વારા જાહેર કરાયેલી માહિતી અનુસાર, નવાઝનો ડોપ ટેસ્ટ ભારત અને શ્રીલંકામાં યોજાયેલા T20 વર્લ્ડ કપ 2026માં પાકિસ્તાન અને નેધરલેન્ડ્સ વચ્ચેની મેચ પછી લેવામાં આવ્યો હતો. પાકિસ્તાનની પહેલી મેચ 7 ફેબ્રુઆરીએ નેધરલેન્ડ્સ સામે કોલંબોમાં યોજાઈ હતી. વર્લ્ડ એન્ટી-ડોપિંગ કોડના નિયમો અનુસાર ટુર્નામેન્ટ દરમિયાન કોઈપણ ખેલાડીનો મેચ પછી ગમે ત્યારે ડોપિંગ ટેસ્ટ થઈ શકે છે. નવાઝે પણ ટેસ્ટ કરાવ્યો હતો. તે ટેસ્ટમાં પાકિસ્તાની સ્પિનરને દોષિત જાહેર કરવામાં આવ્યો હતો.

ICC એ જણાવ્યું હતું કે, નેધરલેન્ડ્સ સામેની મેચ પછી લેવામાં આવેલા નવાઝના નમૂનામાં પ્રતિબંધિત પદાર્થ કાર્બોક્સી-THC હોવાનું જાણવા મળ્યું હતું. આ ICC એન્ટી-ડોપિંગ કોડનું ઉલ્લંઘન છે. 32 વર્ષીય પાકિસ્તાની સ્પિનર ​​મોહમ્મદ નવાઝે પોતાનો ગુનો સ્વીકાર્યો હતો. તેણે એમ પણ કહ્યું હતું કે પ્રતિબંધિત પદાર્થનો ઉપયોગ ટુર્નામેન્ટ પહેલા કરવામાં આવ્યો હતો. તેનો ઉપયોગ પ્રદર્શન વધારવા માટે કરવામાં આવ્યો ન હતો.

 

Pakistan spin-bowling all-rounder has been sanctioned under the ICC Anti-Doping Code.https://t.co/GzjhKhKOWa

— ICC (@ICC) July 17, 2026

 

એન્ટી-ડોપિંગ કોડના ઉલ્લંઘન બાદ ICC એ નવાઝ પર 1 મે, 2026થી ત્રણ મહિનાનો પ્રતિબંધ લાદ્યો છે. ICC ની માહિતી અનુસાર, નવાઝે આ સમયથી તેમનું કામચલાઉ સસ્પેન્શન શરૂ કર્યું છે. નવાઝે ICC દ્વારા પૂરા પાડવામાં આવેલા ડોપિંગ રિહેબિલિટેશન પ્રોગ્રામમાં ભાગ લેવાનો નિર્ણય લીધો છે. પરિણામે, માત્ર અઢી મહિના પછી તેમનો પ્રતિબંધ હટાવી લેવામાં આવ્યો છે. જેનાથી તે કોઈપણ પ્રકારના ક્રિકેટમાં ભાગ લઈ શકશે. બાકીના પ્રતિબંધમાંથી સંપૂર્ણપણે મુક્તિ મેળવતા પહેલા નવાઝે તેમનો પુનર્વસન કાર્યક્રમ પૂર્ણ કરવો પડશે.

આંતરરાષ્ટ્રીય ક્રિકેટ કાઉન્સિલ (ICC) કોઈપણ ક્રિકેટરને જ્યારે પ્રતિબંધિત દવાઓનો ઉપયોગ કરવાનો દોષિત ઠેરવે છે ત્યારે તે વર્લ્ડ એન્ટી-ડોપિંગ એજન્સી (WADA) ના નિયમો હેઠળ કાર્યવાહી કરે છે. મોહમ્મદ નવાઝે T20 વર્લ્ડ કપ 2026 દરમિયાન ખરેખર પ્રતિબંધિત દવાઓનું સેવન કર્યું હોય અને ડોપિંગનો દોષિત સાબિત થાય તો નવાઝને ક્રિકેટમાંથી આજીવન પ્રતિબંધનો સામનો કરવો પડી શકે છે.

એવો અહેવાલ છે કે, પહેલી વાર ગુનો કરનારને સામાન્ય રીતે બે વર્ષનો પ્રતિબંધ મળે છે. તપાસમાં તમામ પાસાઓ ધ્યાનમાં લેવામાં આવે છે. જેમાં ખેલાડીએ આકસ્મિક રીતે ડ્રગ્સનું સેવન કર્યું હતું કે નહીં. જો કે, વારંવાર ડોપિંગ દોષિત ઠેરવવાથી આજીવન પ્રતિબંધ લાગી શકે છે. ભારતીય ક્રિકેટર પૃથ્વી શોએ 2019 માં સૈયદ મુશ્તાક અલી ટ્રોફી ટુર્નામેન્ટ દરમિયાન આકસ્મિક રીતે પ્રતિબંધિત દવાઓનું સેવન કર્યું હતું. તેમ છતાં તેને આઠ મહિનાનો પ્રતિબંધનો સામનો કરવો પડ્યો હતો.

ઉલ્લેખનીય છે કે, 32 વર્ષીય નવાઝે આ વર્ષે શ્રીલંકામાં યોજાયેલા T20 વર્લ્ડ કપમાં પાકિસ્તાન માટે સાત મેચ રમી હતી. ટીમ સુપર 8 તબક્કામાં બહાર થઈ ગઈ હતી. આ સમયગાળા દરમિયાન તેણે 15 રન બનાવ્યા અને 7 વિકેટ લીધી હતી. નવાઝે પાકિસ્તાન માટે 98 જેટલી T20 આંતરરાષ્ટ્રીય મેચ રમી છે. તે ટીમના વ્હાઇટ-બોલ સેટઅપમાં નિયમિત રહ્યો છે અને તેના ડાબા હાથના સ્પિન અને નીચલા ક્રમની બેટિંગ માટે જાણીતો છે.