એશિયન ગેમ્સથી દૂર નીરજ ચોપરાનું દર્દ છલકાયું!

Neeraj Chopra Asian Games 2026: ભારતના સ્ટાર જેવલિન થ્રોઅર અને ટોક્યો ઓલિમ્પિક ગોલ્ડ મેડલિસ્ટ નીરજ ચોપરા એશિયન ગેમ્સ 2026માં ભાગ લઈ શકશે નહીં. તાલીમ દરમિયાન થયેલી પગની ઘૂંટીની લિગામેન્ટ ઈજાને કારણે નીરજે નાગોયા એશિયન ગેમ્સમાંથી નામ પાછું ખેંચ્યું છે. એશિયન ગેમ્સ સાથે નીરજની ખાસ યાદો જોડાયેલી છે, કારણ કે તેણે 2018 જકાર્તા અને 2023 હાંગઝોઉ એશિયન ગેમ્સમાં જેવલિન થ્રોમાં ગોલ્ડ મેડલ જીત્યો હતો.

નીરજ ચોપરાએ વ્યક્ત કર્યું દુઃખ
લગભગ એક મહિના બાદ નીરજ ચોપરાએ એશિયન ગેમ્સ 2026માંથી બહાર રહેવા અંગે પોતાની લાગણી વ્યક્ત કરી છે. નીરજે જણાવ્યું કે એશિયન ગેમ્સે તેની કારકિર્દીની કેટલીક સૌથી ખાસ ક્ષણો આપી છે અને આ વખતે ભારતનું પ્રતિનિધિત્વ ન કરી શકવું તેના માટે મુશ્કેલ છે. નીરજે કહ્યું કે તે એશિયન ગેમ્સમાં સ્પર્ધા કરવાનું અને ભારતીય ટીમ સાથે રહેવાનું ચૂકી જશે. જોકે, નાગોયા પહોંચેલી ભારતીય ટીમને શુભેચ્છા પાઠવતા તેણે સ્પષ્ટ કર્યું કે તે બહારથી ભારતીય ખેલાડીઓને સપોર્ટ કરતો રહેશે.

એન્કલ લિગામેન્ટ ઈજાથી મોટો ઝટકો
નીરજ ચોપરાના જણાવ્યા પ્રમાણે તે એન્કલ લિગામેન્ટ ઈજાથી પરેશાન છે. ઘણી વિચારણા બાદ તેણે એશિયન ગેમ્સમાં ભાગ ન લેવાનો નિર્ણય લીધો. તેના માટે દેશનું પ્રતિનિધિત્વ કરવું સન્માનની વાત છે, પરંતુ આ તક ગુમાવવી દુઃખદાયક છે. આ ઈજાના કારણે નીરજ માત્ર એશિયન ગેમ્સ જ નહીં, પરંતુ ડાયમંડ લીગ ફાઇનલમાં પણ ભાગ લઈ શકશે નહીં. તેની છેલ્લી મોટી સ્પર્ધા લોઝાન ડાયમંડ લીગ હતી, જ્યાં તે શ્રીલંકાના રુમેશ પાથિરાજા બાદ બીજા સ્થાને રહ્યો હતો.

નીરજની કારકિર્દીમાં અગાઉ પણ ઈજાના પડકાર
નીરજ ચોપરાની કારકિર્દીમાં ઈજાઓ અગાઉ પણ પડકાર બની ચૂકી છે. 2019માં તેની જમણી કોણીની સર્જરી થઈ હતી. 2022માં ગ્રોઇન ઈજાના કારણે તે કોમનવેલ્થ ગેમ્સમાંથી બહાર રહ્યો હતો. ત્યારબાદ સ્નાયુઓની ઈજા અને એડક્ટર સંબંધિત સમસ્યાએ પણ તેની સ્પર્ધાઓને અસર કરી હતી. હવે એન્કલ લિગામેન્ટ ઈજાએ તેની 2026ની એશિયન ગેમ્સની સફર અટકાવી છે.

‘મારા મિત્રો પગની ઘૂંટી વિશે પૂછતા નથી’
નીરજે પોતાની પોસ્ટમાં ઈજાના સમય દરમિયાન મિત્રો પાસેથી મળતા સહયોગ વિશે પણ વાત કરી. તેણે જણાવ્યું કે રમતગમતમાં ઈજા એક ભાગ છે અને દરેક પરિસ્થિતિને નિયંત્રિત કરી શકાતી નથી. નીરજના કહેવા પ્રમાણે, તેના કેટલાક મિત્રો જાણે છે કે તે હાલમાં મુશ્કેલ સમયમાંથી પસાર થઈ રહ્યો છે, પરંતુ તેઓ ફોન પર તેની એન્કલ ઈજા વિશે પ્રશ્નો કરતા નથી. તેના બદલે તેઓ તેની સાથે વાત કરે છે, હસે છે, જૂની યાદો તાજી કરે છે અને મળવાની યોજના બનાવે છે. નીરજે કહ્યું કે આવા સંબંધો તેને યાદ અપાવે છે કે જીવન માત્ર આગામી સ્પર્ધા પૂરતું મર્યાદિત નથી.

એશિયન ગેમ્સ 2026નો પ્રારંભ
એશિયન ગેમ્સ 2026નો પ્રારંભ 19 સપ્ટેમ્બરે જાપાનના આઈચી-નાગોયામાં થયો છે. ભારત માટે આ વખતે નીરજ ચોપરાની ગેરહાજરી જેવલિન થ્રો સહિત એથ્લેટિક્સમાં નોંધપાત્ર રહેશે. એશિયન ગેમ્સ 2026નું ભારતમાં લાઇવ કવરેજ Sony Sports Network અને SonyLIV પર ઉપલબ્ધ છે.