KL રાહુલની સદી, જાડેજાએ ધોનીનો રેકોર્ડ તોડયો

અમદાવાદના નરેન્દ્ર મોદી સ્ટેડિયમમાં વેસ્ટ ઈન્ડિઝ સામે ચાલી રહેલી પ્રથમ ટેસ્ટ મેચમાં ભારતીય ટીમના ઓપનર કે. એલ. રાહુલે શુક્રવારે ધમાકેદાર પ્રદર્શન કર્યું છે. લાંબા સમયથી પ્રતિક્ષિત 11મી ટેસ્ટ સદી ફટકારીને રાહુલે એક ઐતિહાસિક સિદ્ધિ હાંસલ કરી છે. આ તેની ઘરઆંગણે 3211 દિવસ બાદ ફટકારવામાં આવેલી પહેલી ટેસ્ટ સદી છે, જેનાથી તેણે ઘરઆંગણે બે સદી વચ્ચેના સૌથી લાંબા ગાળાનો આર. અશ્વિનનો રેકોર્ડ તોડ્યો છે.

રાહુલની લાંબી પ્રતીક્ષાનો અંત

કે. એલ. રાહુલે તેની છેલ્લી ઘરેલુ સદી ડિસેમ્બર, 2016માં ચેન્નાઈમાં ઇંગ્લેન્ડ સામે ફટકારી હતી. આશરે નવ વર્ષના લાંબા અંતરાલ બાદ તેણે રોસ્ટન ચેઝના બોલ પર એક રન લઈને પોતાની સદી પૂરી કરી હતી. સદી ફટકાર્યા બાદ રાહુલે ભાવુક થઈને પોતાનું હેલ્મેટ ઉતારીને ઉજવણી કરી હતી. રાહુલની આ બે ઘરેલુ સદી વચ્ચેની 26 ઇનિંગ્સનું અંતર ભારતીય બેટ્સમેનોમાં ચોથું સૌથી વધુ અંતર છે.

જાડેજાએ ધોનીનો રેકોર્ડ તોડ્યો

રાહુલની સદીની સાથે, ઓલરાઉન્ડર રવીન્દ્ર જાડેજાએ પણ ધમાકેદાર ફોર્મ જાળવી રાખ્યું હતું. તેણે તેની ઇનિંગ્સમાં ૪ છગ્ગા ફટકારીને ટેસ્ટ ક્રિકેટમાં સૌથી વધુ સિક્સર મારવાનો એમ. એસ. ધોનીનો રેકોર્ડ તોડ્યો છે.

ધોનીનો રેકોર્ડ: 90 મેચમાં 78 છગ્ગા.

જાડેજાનો નવો રેકોર્ડ: 86 મેચમાં 79 છગ્ગા.

જાડેજાએ છેલ્લી 9 ઇનિંગ્સમાં આ 7મી વખત 50+નો સ્કોર બનાવ્યો છે. ભારત માટે હવે રિષભ પંત (90), વીરેન્દ્ર સેહવાગ (90) અને રોહિત શર્મા (88) જ તેનાથી આગળ છે.

કેપ્ટન શુભમન ગિલનો 'હાફ-સેન્ચુરી' રેકોર્ડ

નવા કેપ્ટન શુભમન ગિલે પણ 50 રનની શાનદાર ઇનિંગ્સ રમી હતી. કેપ્ટન તરીકે ઘરઆંગણે આ તેની પહેલી અર્ધસદી છે. રાહુલ અને ગિલે 98 રનની મહત્વપૂર્ણ ભાગીદારી કરીને ભારતને વેસ્ટ ઈન્ડિઝના 162 રનના સ્કોર સામે મજબૂત લીડ અપાવી છે. ભારતે 4 વિકેટના નુકસાને 230થી વધુ રન બનાવી લીધા છે અને મેચનું પરિણામ નિશ્ચિત માનવામાં આવી રહ્યું છે.