મનુ ભાકર, ડી.ગુકેશ સહિત 4 ખેલાડીને ખેલ રત્ન એવોર્ડ

ભારત માટે ઓલિમ્પિકમાં મેડલ જીતનાર શૂટર મનુ ભાકરને ભારે હોબાળા બાદ ખેલ રત્ન એવોર્ડથી સન્માનિત કરવામાં આવ્યા છે. અગાઉ જ્યારે મેજર ધ્યાનચંદ ખેલ રત્ન પુરસ્કારની જાહેરાત કરવામાં આવી હતી ત્યારે મનુ ભાકરનું નામ તેમાં સામેલ નહોતું. મનુ ભાકરના પિતાએ પણ આ અંગે નિરાશા વ્યક્ત કરી હતી. આ પછી મનુ ભાકરને ખેલ રત્ન આપવાની જાહેરાત કરવામાં આવી છે. મનુ ભાકર ઉપરાંત ત્રણ અન્ય ખેલાડીઓને પણ ખેલ રત્ન પુરસ્કારથી સન્માનિત કરવામાં આવ્યા છે.

મનુ ભાકરની સાથે તાજેતરમાં ચેસમાં વર્લ્ડ ચેમ્પિયન બનેલા ડી ગુકેશને પણ ખેલ રત્ન એવોર્ડ આપવામાં આવ્યો છે. આ સિવાય ભારતીય હોકી ટીમના સ્ટાર ખેલાડી હરમનપ્રીત સિંહને પણ ખેલ રત્નથી સન્માનિત કરવામાં આવ્યા છે. પેરા એથ્લેટ પ્રવીણ કુમારને ભારતના સર્વોચ્ચ ખેલ રત્નથી પણ સન્માનિત કરવામાં આવ્યા છે. રમતગમત મંત્રાલયે એક નિવેદનમાં કહ્યું કે, સમિતિની ભલામણો અને સરકાર દ્વારા કરવામાં આવેલી તપાસના આધારે ખેલાડીઓ, કોચ, યુનિવર્સિટીઓને એવોર્ડ આપવાનો નિર્ણય લેવામાં આવ્યો છે.

34 ખેલાડીઓને અર્જુન એવોર્ડ આપવામાં આવશે

ખેલ રત્ન ઉપરાંત, 34 ખેલાડીઓને 2024 માં રમતગમતમાં તેમના ઉત્કૃષ્ટ પ્રદર્શન માટે અર્જુન પુરસ્કારથી સન્માનિત કરવામાં આવશે, જેમાંથી એથ્લેટ સુચા સિંહ અને પેરા સ્વિમર મુરલીકાંત રાજારામ પેટકરને અર્જુન પુરસ્કાર લાઇફટાઇમ એવોર્ડથી સન્માનિત કરવામાં આવશે. બહેતર કોચિંગ આપવા માટે પાંચ લોકોને દ્રોણાચાર્ય પુરસ્કાર આપવામાં આવશે, જેમાં બેડમિન્ટન કોચ એસ મુરલીધરન અને ફૂટબોલ કોચ અરમાન્ડો એગ્નેલો કોલાકોને આજીવન કેટેગરીમાં સામેલ કરવામાં આવ્યા છે. ફિઝિકલ એજ્યુકેશન ફાઉન્ડેશન ઓફ ઈન્ડિયા નેશનલ સ્પોર્ટ્સ પ્રમોશન એવોર્ડ મેળવશે. દરમિયાન, ચંડીગઢ યુનિવર્સિટીને મૌલાના અબુલ કલામ આઝાદ (MAKA) ટ્રોફી એકંદર યુનિવર્સિટી વિજેતા તરીકે પ્રાપ્ત થશે.