30 નવેમ્બરથી શરુ થયેલી ODIમાં ભારતીય ખેલાડીઓનો દબદબો જોવા મળ્યો છે. ભારતીય ક્રિકેટ ટીમના સ્ટાર બેટ્સમેન વિરાટ કોહલીએ દક્ષિણ આફ્રિકા સામે રાંચીના&nbsp;JSCA ઇન્ટરનેશનલ સ્ટેડિયમ ખાતે રમાયેલી પ્રથમ ODI મેચમાં ધમાકેદાર બેટિંગ કરીને પોતાની કારકિર્દીની 52મી ODI સદી ફટકારી હતી. કોહલીએ આ મેચમાં પોતાનું 'વિન્ટેજ બેસ્ટ' પ્રદર્શન આપતા દર્શકોને અભિભૂત કર્યા હતા.
કોહલીએ સદી પૂરી કરવાની સાથે જ જોરદાર છલાંગ લગાવીને ઉત્સાહ સાથે ઉજવણી કરી હતી. જોકે, તેમની આ ઉજવણીમાં સામેલ થવા એક વિરાટ ફેને કૂદકો મારી કોહલીને પીચ પર મળવા માટે પહોંચી ગયો હતો.&nbsp;
જેમ વિરાટ કોહલી સદી પૂરી કરીને આનંદ વ્યક્ત કરી રહ્યા હતા, તે જ ક્ષણે એક યુવાન ફેન સુરક્ષા વ્યવસ્થાને તોડીને મેદાનમાં દોડી આવ્યો હતો અને સીધો વિરાટ કોહલીના પગે પડ્યો હતો.
સુરક્ષાકર્મીઓએ તાત્કાલિક એલર્ટ થઇને યુવાન ચાહકને કોહલીથી અલગ કર્યો હતો. આ ઘટના બાદ કોહલીએ પોતાની સદીની ઉજવણી પૂરી કરી હતી.&nbsp;
ઇનિંગ્સની મુખ્ય ઝલક
કોહલીએ આ મેચમાં પ્રથમ બોલે જ બાઉન્ડ્રી ફટકારીને પોતાની મજબૂત શરૂઆત કરી હતી. ત્યારબાદ તેણે નાન્દ્રે બર્ગર સામે સીધી ડ્રાઇવ મારીને ચોગ્ગો ફટકાર્યો અને લોફ્ટેડ ડ્રાઇવથી એક સનસનાટીભર્યો છગ્ગો પણ ફટકાર્યો. કોહલીએ 48 બોલમાં પોતાની 76મી ODI અડધી સદી પૂરી કરી હતી.
કોહલીએ કેપ્ટન રોહિત શર્મા (57 રન, 51 બોલ) સાથે મળીને બીજી વિકેટ માટે 136 રનની વિશાળ ભાગીદારી કરી હતી. રોહિત શર્માએ આ ઇનિંગ્સ દરમિયાન ODI ક્રિકેટમાં સૌથી વધુ છગ્ગા ફટકારવાનો વિશ્વ રેકોર્ડ પણ તોડ્યો હતો. કોહલીએ માર્કો જૅન્સેનને થર્ડ મેન તરફ બાઉન્ડ્રી માટે ગાઇડ કરીને પોતાની 102 બોલમાં સદી પૂરી કરી. રાંચીમાં કોહલીની આ ત્રીજી સદી હતી.
વિરાટ કોહલી અંતે 135 રન (120 બોલ) બનાવીને આઉટ થયા હતા. નાન્દ્રે બર્ગરે ધીમી ડિલિવરીથી તેમને આઉટ કર્યા. તેમની ઇનિંગ્સમાં 11 ચોગ્ગા અને 7 છગ્ગા સામેલ હતા.

ફેન કિંગ કોહલીને મળવા પહોંચ્યો

રાંચીમાં કિંગ કોહલીનું વિન્ટેજ પ્રદર્શન, ODIની 52મી સદી ફટકારી સચિનનો રેકોર્ડ તોડ્યો..

December 1, 2025 | 12:28 IST