ઇસ્લામાબાદ બ્લાસ્ટ: શ્રીલંકા ક્રિકેટ ટીમ અસમંજસમાં

ઈસ્લામાબાદમાં થયેલા આત્મઘાતી હુમલાએ પાકિસ્તાનની સુરક્ષા વ્યવસ્થા પર ફરી એકવાર સવાલો ઊભા કર્યા છે. આ બ્લાસ્ટને કારણે પ્રવાસે ગયેલી શ્રીલંકન ક્રિકેટ ટીમ (SL vs PAK) ડરના માહોલમાં મુકાઈ છે અને કેટલાક ખેલાડીઓ તરત જ પાકિસ્તાન છોડવા માગે છે. જોકે, શ્રીલંકા ક્રિકેટ બોર્ડ (SLC)એ ખેલાડીઓ અને સપોર્ટ સ્ટાફને સ્પષ્ટ ચેતવણી આપી છે કે જો તેઓ બોર્ડના આદેશ વિરુદ્ધ જઈને દેશ છોડશે, તો તેમને ગંભીર શિસ્તભંગના પગલાંનો સામનો કરવો પડશે.

કાર બોમ્બ ધમાકાથી ખેલાડીઓમાં ભય

મંગળવારે ઇસ્લામાબાદમાં થયેલા કાર બૉમ્બ ધમાકાને કારણે શ્રીલંકન ક્રિકેટ કેમ્પમાં ગભરાહટ ફેલાયો હતો. અહેવાલો મુજબ, આ ધમાકા સમયે પાકિસ્તાની ટીમ પણ તે જ વિસ્તારમાં હાજર હતી. આ ઘટનાના પગલે, શ્રીલંકા ટીમના આઠ ખેલાડીઓ અને કેટલાક સપોર્ટ સ્ટાફે પાકિસ્તાનમાં સ્થિતિ બગડી રહી હોવાનું જણાવીને તાત્કાલિક સ્વદેશ પાછા ફરવાની ઈચ્છા વ્યક્ત કરી. તેમનું માનવું છે કે હવે પાકિસ્તાનમાં રહેવું સુરક્ષિત નથી.

બોર્ડે પરત ફરવાનો નિર્ણય નકાર્યો

શ્રીલંકા ક્રિકેટ બોર્ડે ખેલાડીઓના પ્રવાસ રદ કરીને પરત ફરવાના નિર્ણયને સ્પષ્ટપણે નકારી દીધો છે. SLCનું કહેવું છે કે પાકિસ્તાન ક્રિકેટ બોર્ડ (PCB) અને સ્થાનિક વહીવટીતંત્ર દ્વારા ટીમને સંપૂર્ણ સુરક્ષાની ખાતરી આપવામાં આવી છે, તેથી કોઈએ પણ પાછા ફરવાની જરૂર નથી. બોર્ડે સત્તાવાર નિવેદનમાં કડક શબ્દોમાં ચેતવણી આપી કે જો કોઈ ખેલાડી કે સ્ટાફ બોર્ડના આદેશનો ભંગ કરીને પાકિસ્તાન છોડશે, તો શ્રીલંકા પરત ફર્યા બાદ તેમની સામે ઔપચારિક તપાસ કરવામાં આવશે અને શિસ્તભંગના પગલાં લેવામાં આવશે.

મેચોની તારીખોમાં ફેરફાર

સૂત્રોના જણાવ્યા અનુસાર, ખેલાડીઓએ પ્રવાસ અધવચ્ચે રદ કરીને પાકિસ્તાનમાંથી બહાર નીકળવાની માંગ કરી હતી. ટીમે અત્યાર સુધી માત્ર એક વનડે રમી છે અને હજુ બે વનડે અને ઝિમ્બાબ્વે સાથેની T20 સિરીઝ બાકી છે. ખેલાડીઓની ગંભીર ચિંતાને ધ્યાનમાં રાખીને, PCB અધ્યક્ષ મોહસિન નકવીએ બાકીની બે વનડે મેચોની તારીખમાં ફેરફાર કરીને હવે 14 અને 16 નવેમ્બરે યોજવાની જાહેરાત કરી છે. આ ઘટના પાકિસ્તાનની યજમાનીની ક્ષમતા અને આંતરરાષ્ટ્રીય ક્રિકેટમાં તેની છબી માટે મોટો ફટકો છે.