IPL 2026: BCCI ના નવા કડક નિયમો જાહેર

ઇન્ડિયન પ્રીમિયર લીગ (IPL) 2026 ની સીઝન શરૂ થાય તે પહેલા ભારતીય ક્રિકેટ કંટ્રોલ બોર્ડ (BCCI) એ તમામ 10 ટીમો માટે નિયમોની નવી યાદી જાહેર કરી છે. આ ફેરફારો પાછળનો મુખ્ય ઉદ્દેશ્ય ટુર્નામેન્ટ દરમિયાન ખેલાડીઓમાં શિસ્ત જાળવવી, ટીમના આંતરિક વાતાવરણમાં વ્યાવસાયિકતા લાવવી અને મેદાનની મર્યાદા જાળવવાનો છે.

મુસાફરીમાં સમાનતા અને ટીમ એકતા : 

BCCI એ ખેલાડીઓની અવરજવરને લઈને એક મહત્વપૂર્ણ નિર્ણય લીધો છે. હવેથી તમામ ખેલાડીઓએ પ્રેક્ટિસ સત્રો અને મેચોમાં ફરજિયાતપણે ટીમ બસમાં જ મુસાફરી કરવી પડશે. અગાઉ એવું જોવા મળતું હતું કે સ્ટાર ખેલાડીઓ અથવા સ્થાનિક ખેલાડીઓ પોતાના ખાનગી વાહનોનો ઉપયોગ કરતા હતા. બોર્ડનું માનવું છે કે સાથે મુસાફરી કરવાથી ટીમમાં એકતા વધશે અને તમામ ખેલાડીઓ વચ્ચે સમાનતા જળવાઈ રહેશે.

પરિવાર અને મિત્રો માટે નવી મર્યાદાઓ : 

આ વખતે ખેલાડીઓના પરિવારજનો અને મિત્રો માટે પણ સ્પષ્ટ સૂચનાઓ આપવામાં આવી છે. પરિવારના સભ્યોને ટીમ બસમાં મુસાફરી કરવાની મંજૂરી આપવામાં આવશે નહીં, તેમણે અલગ વાહનનો ઉપયોગ કરવો પડશે. સૌથી મોટો ફેરફાર એ છે કે ડ્રેસિંગ રૂમમાં પરિવાર કે મિત્રોનો પ્રવેશ સંપૂર્ણપણે બંધ કરી દેવામાં આવ્યો છે. પ્રેક્ટિસના દિવસોમાં પણ જો તેઓ હાજર રહેવા માંગતા હોય, તો તેમણે માત્ર નિર્ધારિત હોસ્પિટાલિટી એરિયામાં જ બેસવું પડશે.

મેદાન અને પિચની જાળવણી : 

મેચના દિવસે મેદાન પર થતા પ્રેક્ટિસ સત્રો પર હવે પ્રતિબંધ લાદવામાં આવ્યો છે. પિચની ગુણવત્તા જાળવી રાખવા માટે મુખ્ય ચોકની આસપાસ ફિટનેસ ટેસ્ટ લેવાની પણ મનાઈ કરવામાં આવી છે. આ નિર્ણય ગ્રાઉન્ડ સ્ટાફને પિચ તૈયાર કરવા માટે પૂરતો સમય અને જગ્યા આપવા માટે લેવામાં આવ્યો છે.

ઓરેન્જ અને પર્પલ કેપનું સન્માન : 

ટુર્નામેન્ટના ટોપ પર્ફોર્મર્સ માટે પણ નવા નિયમો છે. ઓરેન્જ કેપ અને પર્પલ કેપ ધારકોએ મેચ દરમિયાન તે કેપ પહેરવી ફરજિયાત રહેશે. જો કોઈ ખેલાડી આખી મેચ દરમિયાન કેપ પહેરવા ન માંગતો હોય, તો પણ તેણે મેચની શરૂઆતની પ્રથમ બે ઓવર દરમિયાન તે પહેરવી જ પડશે, જેથી બ્રોડકાસ્ટિંગ ટીમ ચાહકોને તે સ્પષ્ટ રીતે બતાવી શકે.

ડ્રેસ કોડ અને મેચ પ્રેઝન્ટેશન : 

BCCI એ ખેલાડીઓના પહેરવેશ પર પણ નજર રાખી છે. મેચ પછીની પ્રેઝન્ટેશન સેરેમનીમાં હવે સ્લીવલેસ જર્સી કે ફ્લોપી હેટ (ટોપી) પહેરવાની મંજૂરી આપવામાં આવશે નહીં. ખેલાડીઓએ નિર્ધારિત ડ્રેસ કોડનું પાલન કરવું પડશે. નિયમનો પ્રથમ વખત ભંગ કરનારને ચેતવણી અપાશે, જ્યારે વારંવાર ભૂલ કરનાર ખેલાડીને ભારે દંડ ફટકારવામાં આવશે.