4 રનમાં બે વિકેટ અને 87 રનની હાર! ન્યૂઝીલેન્ડ સામે ટીમ ઈન્ડિયા સાથે એવું તો શું થયું?

India vs New Zealand 4th T20I: ન્યૂઝીલેન્ડ સામેની ચોથી T20Iમાં ટીમ ઈન્ડિયાને શરમજનક હારનો સામનો કરવો પડ્યો છે. ઓકલેન્ડના ઇડન પાર્કમાં રમાયેલી મેચમાં ગ્લેન ફિલિપ્સની વિસ્ફોટક સદી અને માઈકલ બ્રેસવેલની તોફાની બેટિંગના દમ પર ન્યૂઝીલેન્ડે ભારત સામે 259 રનનો વિશાળ સ્કોર ખડક્યો હતો. 260 રનના લક્ષ્યનો પીછો કરવા ઉતરેલી ભારતીય ટીમ 20 ઓવરમાં 9 વિકેટે માત્ર 172 રન જ બનાવી શકી હતી. આ સાથે ન્યૂઝીલેન્ડે ચોથી T20Iમાં ભારતને 87 રનથી હરાવ્યું હતું. જોકે, પાંચ મેચની T20I શ્રેણીમાં ભારત હજુ પણ 3-1થી આગળ છે.

ફિલિપ્સ અને બ્રેસવેલની તોફાની બેટિંગ
ટોસ જીતીને ભારતીય કેપ્ટન શ્રેયસ અય્યરે પ્રથમ બોલિંગ કરવાનો નિર્ણય લીધો હતો. જોકે, ભારતીય બોલરો ન્યૂઝીલેન્ડના બેટ્સમેનો સામે સંપૂર્ણપણે નિષ્ફળ રહ્યા હતા. શરૂઆતમાં ટિમ સીફર્ટ માત્ર 3 રન બનાવીને મયંક યાદવનો શિકાર બન્યો હતો. ત્યારબાદ ફિન એલન અને ડેરિલ મિચેલે આક્રમક બેટિંગ કરી હતી. મિચેલે 9 બોલમાં 24 રન અને એલને 17 બોલમાં 31 રન બનાવ્યા હતા. ત્યારબાદ ગ્લેન ફિલિપ્સે ભારતીય બોલરોની ધોલાઈ શરૂ કરી હતી. તેણે માત્ર 49 બોલમાં 6 ચોગ્ગા અને 10 છગ્ગાની મદદથી 107 રનની વિસ્ફોટક સદી ફટકારી હતી. બીજી તરફ, માઈકલ બ્રેસવેલે પણ 25 બોલમાં 65 રન બનાવીને ભારતની મુશ્કેલી વધારી હતી. બંનેની આક્રમક બેટિંગના કારણે ન્યૂઝીલેન્ડે 20 ઓવરમાં 7 વિકેટે 259 રનનો વિશાળ સ્કોર નોંધાવ્યો હતો. આ ટીમનો સર્વોચ્ચ T20I સ્કોર બન્યો હતો. ભારત તરફથી મયંક યાદવે ત્રણ વિકેટ ઝડપી હતી, જ્યારે પ્રિન્સ યાદવ, અક્ષર પટેલ અને નીતિશ કુમાર રેડ્ડીને એક-એક વિકેટ મળી હતી.

4 રનમાં જ ભારતે ગુમાવી બે વિકેટ
260 રનના મુશ્કેલ લક્ષ્યનો પીછો કરવા ઉતરેલી ભારતીય ટીમની શરૂઆત અત્યંત ખરાબ રહી હતી. સંજુ સેમસન માત્ર 4 રન બનાવીને આઉટ થયો હતો, જ્યારે ઈશાન કિશન ખાતું પણ ખોલાવી શક્યો નહોતો. જેકબ ડફીએ બંનેને પેવેલિયનનો રસ્તો બતાવ્યો હતો. ત્યારબાદ અભિષેક શર્મા અને કેપ્ટન શ્રેયસ અય્યર પાસેથી મોટી ઇનિંગ્સની આશા હતી, પરંતુ બંને લાંબો સમય ટકી શક્યા નહોતા. અભિષેકે 15 બોલમાં 27 રન બનાવ્યા, જ્યારે શ્રેયસ અય્યર 11 બોલમાં 22 રન બનાવીને આઉટ થયો હતો. પાવરપ્લેમાં જ ભારતે ચાર મહત્વની વિકેટ ગુમાવી દીધી હતી. અક્ષર પટેલ 7 રન બનાવીને નિષ્ફળ રહ્યો હતો, જ્યારે નીતિશ કુમાર રેડ્ડીએ 10 બોલમાં 21 રન ફટકાર્યા હતા. નમન ધીરે 13 બોલમાં 28 રનની ઝડપી ઇનિંગ રમી હતી. જોકે, તિલક વર્મા 35 બોલમાં 35 રન બનાવી શક્યો હતો. અંતે ભારતની ટીમ 20 ઓવરમાં 9 વિકેટે 172 રન સુધી જ પહોંચી શકી હતી.

જેકબ ડફીની ઘાતક બોલિંગ
બેટિંગ બાદ ન્યૂઝીલેન્ડના બોલરોએ પણ શાનદાર પ્રદર્શન કર્યું હતું. જેકબ ડફીએ ચાર ઓવરમાં માત્ર 23 રન આપીને ચાર વિકેટ ઝડપી હતી. કેપ્ટન મિચેલ સેન્ટનરે બે વિકેટ લીધી હતી, જ્યારે મેથ્યુ ફિશરને પણ બે સફળતા મળી હતી. આ જીત સાથે ન્યૂઝીલેન્ડે સાત વર્ષ બાદ ઘરઆંગણે ભારત સામે T20Iમાં જીત મેળવી હતી. બીજી તરફ, ઓકલેન્ડમાં ભારતને પ્રથમ T20I હારનો સામનો કરવો પડ્યો હતો. શ્રેણીમાં 3-1ની સરસાઈ હોવા છતાં ચોથી મેચમાં ભારતીય ટીમની બોલિંગ અને બેટિંગ બંને વિભાગની નિષ્ફળતા ચર્ચાનો વિષય બની છે.